ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelenskiy) បាននិយាយកាលពីថ្ងៃទី២៨ ខែកញ្ញា ថា មានកងទ័ពកូរ៉េខាងជើងជាង ៨,០០០ នាក់ នៅលើទឹកដីរុស្ស៊ី ហើយការរៀបចំកំពុងត្រូវបានធ្វើឡើង ដើម្បីបញ្ជូនកងទ័ពចំនួន ១០,០០០ នាក់បន្ថែមទៀត។
ដោយដកស្រង់ “ទិន្នន័យថ្មី” ស្តីពីការបញ្ជូនកងទ័ពកូរ៉េខាងជើងទៅកាន់ប្រទេសរុស្ស៊ី លោក ហ្សេឡេនស្គី បាននិយាយនៅក្នុងអត្ថបទមួយលើបណ្តាញសង្គម X ថា ពួកគេកំពុង “ត្រូវបានជ្រើសរើសសម្រាប់ការហ្វឹកហ្វឺន និងការបញ្ជូនបន្តបន្ទាប់ទៅកាន់ប្រទេសរុស្ស៊ី”។
ប្រធានាធិបតីអ៊ុយក្រែនរូបនេះ បាននិយាយកាលពីខែសីហា ថា ទាហានកូរ៉េខាងជើងរហូតដល់ ៥០,០០០ នាក់ អាចត្រូវបានបញ្ជូនទៅប្រយុទ្ធឱ្យប្រទេសរុស្ស៊ី ហើយបានអំពាវនាវឱ្យកូរ៉េខាងត្បូងផ្តល់ការគាំទ្រដល់ប្រព័ន្ធការពារអាកាសរបស់អ៊ុយក្រែន។
កូរ៉េខាងត្បូង បានប្រកាសកាលពីខែកក្កដា នូវកញ្ចប់ជំនួយចំនួន ១០០ លានដុល្លារ សម្រាប់អ៊ុយក្រែន ទោះបីជាវារាប់មិនបញ្ចូលអាវុធប្រល័យជីវិតក៏ដោយ។
ការអត្ថាធិប្បាយរបស់លោក ហ្សេឡេនស្គី កាលពីថ្ងៃទី២៨ ខែកញ្ញា បានធ្វើឡើងបន្ទាប់ពីទីក្រុងសេអ៊ូល និងទីក្រុងគៀវ មានការខ្វែងគំនិតគ្នាជុំវិញការប្រកាសរបស់លោក កាលពីសប្តាហ៍មុនថា អ៊ុយក្រែនបានបញ្ជូនទាហានកូរ៉េខាងជើង ២ នាក់ ដែលចាប់ខ្លួនបានទៅឱ្យកូរ៉េខាងត្បូង។
ទីក្រុងសេអ៊ូល បានសម្តែងការសោកស្តាយចំពោះការប្រកាសរបស់លោក ដោយដកស្រង់កិច្ចព្រមព្រៀងរក្សាការបញ្ជូននេះជាការសម្ងាត់។ កូរ៉េខាងត្បូង ក៏បានតវ៉ាប្រឆាំងនឹងអ្វីដែលខ្លួនហៅថា ជាសេចក្តីថ្លែងការណ៍មិនពិតចេញពីការិយាល័យប្រធានាធិបតីអ៊ុយក្រែន ដែលបានបដិសេធថា គ្មានកិច្ចព្រមព្រៀងរក្សាការសម្ងាត់បែបនេះឡើយ។
យោងតាមការប៉ាន់ប្រមាណរបស់អ៊ុយក្រែន និងកូរ៉េខាងត្បូង កូរ៉េខាងជើងបានបញ្ជូនកងទ័ពប្រហែល ១៤,០០០ នាក់ ទៅ ១៥,០០០ នាក់ ដើម្បីគាំទ្រសង្គ្រាមរបស់រុស្ស៊ីនៅអ៊ុយក្រែនចាប់តាំងពីឆ្នាំ២០២៤ ដោយភាគច្រើនត្រូវបានពង្រាយនៅក្នុងតំបន់ Kursk ដើម្បីជួយរុញច្រានការវាយលុករបស់អ៊ុយក្រែន។
យោងតាមការវាយតម្លៃរបស់អ៊ុយក្រែន និងអង្គការឯករាជ្យ ទីក្រុងព្យុងយ៉ាង ក៏បានផ្គត់ផ្គង់ដល់ប្រទេសរុស្ស៊ីនូវគ្រាប់កាំភ្លើងធំ និងគ្រាប់កាំភ្លើងត្បាល់រាប់លានគ្រាប់ ព្រមទាំងមីស៊ីលបាលីស្ទិក ប្រព័ន្ធកាំភ្លើងធំចម្ងាយឆ្ងាយ និងប្រព័ន្ធរ៉ុក្កែតបាញ់ច្រើនដើមផងដែរ៕
