ជនរងគ្រោះដែលជាប់ពន្ធនាគារជិត ១ឆ្នាំ យ៉ាងអយុត្តិធម៌ ដោយសារការចាប់ខុសមនុស្ស បានប្តឹងប្រធានមន្ទីរបរិស្ថានខេត្តស្ទឹងត្រែង លោក ស្រេង ជាហេង និងនាយកដែននៃមន្ទីរបរិស្ថានខេត្តនេះ លោក ទូច វិចិត្រ ទៅកាន់សាលាឧទ្ធរណ៍ត្បូងឃ្មុំ ដើម្បីឱ្យអគ្គព្រះរាជអាជ្ញាធ្វើអធិការកិច្ចពីភាពមិនប្រក្រតី នៃការស៊ើបអង្កេតធូររលុងរបស់មន្ត្រីទាំងនេះ។
លោក ណុះ សូឡេះ ត្រូវជាប្អូនថ្លៃជនរងគ្រោះ ឱ្យដឹងនៅថ្ងៃទី២៩ ខែកញ្ញា ថា ពាក្យបណ្តឹងរបស់លោក មានបំណងឱ្យអគ្គព្រះរាជអាជ្ញាត្បូងឃ្មុំ ពិនិត្យពីភាពមិនប្រក្រតីនៃសំណុំរឿងនេះ ដែលមន្ត្រីនគរបាលយុត្តិធម៌ ស៊ើបអង្កេតមិនច្បាស់លាស់ ដោយបានចាប់មនុស្សដាក់គុកទាំងគ្មានកំហុស។ លោកថា ពាក្យបណ្តឹងរបស់លោក ទាមទារឱ្យលោក ស្រេង ជាហេង ប្រធានមន្ទីរបរិស្ថានខេត្តស្ទឹងត្រែង និងមន្ត្រីបរិស្ថាន លោក ទូច វិចិត្រ ទទួលខុសត្រូវតាមផ្លូវច្បាប់ និងវិន័យរដ្ឋបាល។
លោកថា៖ «ចាប់មនុស្សនេះ គឺចាប់មនុស្សម្នាក់ទៀតទេ! ចុះហេតុអ្វីមកចាប់បងខ្ញុំ? ឱ្យគាត់មានដំណោះស្រាយ ឱ្យគាត់ត្រូវធ្វើអ្វី ឱ្យគាត់មានការទទួលខុសត្រូវ កុំឱ្យគាត់ធ្វើអ្វីលេះរខេះ ដូចល្បែងក្មេងលេង ដូចអត់មានការទទួលខុសត្រូវសោះ។ មន្ត្រីរបស់គាត់មកបំភ្លឺថា ឮគេថា នៅតុលាការ។ ខ្ញុំចង់ឈឺឈាមណាស់បង! ខ្ញុំចង់ប្រាប់អញ្ចេះ»។
ខ្លឹមសារពាក្យបណ្តឹងចុះថ្ងៃទី២៨ ខែកញ្ញា ឆ្នាំ២០២៦ សរសេរថា កាលពីថ្ងៃទី០៦ ខែតុលា ឆ្នាំ២០២៥ ខ្ញុំបាទ ស្លេះ ហ្វឺត ត្រូវបានកម្លាំងនគរបាលក្រុងស្ទឹងត្រែងមកចាប់ខ្លួនដល់ផ្ទះនៅក្រុងស្ទឹងត្រែង។ ពេលនោះមាននគរបាលចំនួន ៦នាក់ បានអានដីកាបង្គាប់ឱ្យចាប់ខ្លួន ដែលចេញដោយលោក ហូយ សេរីវឌ្ឍនពិសិដ្ឋ ចៅក្រមស៊ើបសួរសាលាដំបូងខេត្តស្ទឹងត្រែង។
នៅគ្រានោះ ខ្ញុំបាទ និងក្រុមគ្រួសារ បានប្រាប់មន្ត្រីនគរបាលទាំងនោះថា ចាប់មនុស្សច្រឡំហើយ ហើយអត្តសញ្ញាណខាងលើមិនមែនជារូបខ្ញុំទេ ព្រោះឈ្មោះ ស្លេះ ហ្វឺត មិនមែនឈ្មោះ ស្លេះ វ៉ើត ទេ ប៉ុន្តែពួកគេមិនស្តាប់ការបកស្រាយនេះឡើយ។ ក្រោយមក ក្រុមសមត្ថកិច្ចទាំងនោះបាននាំខ្លួនខ្ញុំបញ្ជូនទៅតុលាការ និងបញ្ជូនទៅឃុំខ្លួនក្នុងពន្ធនាគារខេត្តស្ទឹងត្រែង។
វីអូឌី មិនទាន់អាចទាក់ទងសុំការបំភ្លឺបន្ថែមជុំវិញរឿងនេះ ពីអ្នកនាំពាក្យអគ្គព្រះរាជអាជ្ញាអមសាលាឧទ្ធរណ៍ត្បូងឃ្មុំ លោក ទុំ សោភ័ណ្ឌ បាននៅឡើយទេ គិតត្រឹមម៉ោងផ្សាយនេះ។
លោក ស្លេះ ហ្វឺត ជនជាតិខ្មែរ-ឥស្លាម អាយុ ៥៦ ឆ្នាំ រស់នៅខេត្តស្ទឹងត្រែង។ លោកត្រូវបានសមត្ថកិច្ចចាប់ខ្លួន និងឃុំខ្លួនក្នុងពន្ធនាគារជិត ១ ឆ្នាំ ចាប់តាំងពីខែតុលា ឆ្នាំ២០២៥ ដោយសារតែការភាន់ច្រឡំអត្តសញ្ញាណ ជាមួយបុគ្គលម្នាក់ទៀតឈ្មោះ ស្លេះ វ៉ើត។
បុរសរូបនេះ ត្រូវបានតុលាការដោះលែងឱ្យមានសេរីភាពវិញនៅថ្ងៃទី២៧ ខែសីហា ឆ្នាំ២០២៦ ក្រោយពីមានការតវ៉ា និងមានកិច្ចអន្តរាគមន៍ពីប្រធានគណបក្សដើម្បីកម្ពុជា លោក ឯម សុខសុវណ្ណ ដែលបានបញ្ជូនមេធាវីការពារក្តីឱ្យជនរងគ្រោះ ដើម្បីស្វែងរកយុត្តិធម៌។
ប្រធានគណបក្សដើម្បីកម្ពុជា លោក ឯម សុខសុវណ្ណ ដែលតាមដានរឿងនេះ បានស្នើឱ្យអគ្គព្រះរាជអាជ្ញាអមសាលាឧទ្ធរណ៍ត្បូងឃ្មុំ ពន្លឿនការដោះស្រាយសំណុំរឿងនេះដោយយុត្តិធម៌ មិនត្រូវអូសបន្លាយពេលនោះទេ។ លោកថា មន្ត្រីនគរបាលយុត្តិធម៌ មានតួនាទីកសាងសំណុំរឿងដោយតម្លាភាព និងវិជ្ជាជីវៈ ក៏ប៉ុន្តែបើមន្ត្រីប្រព្រឹត្តកំហុស ក៏ត្រូវតែទទួលខុសត្រូវតាមផ្លូវច្បាប់ និងវិន័យរដ្ឋបាល។
លោក ឯម សុខសុវណ្ណ ថ្លែងថា៖ «សូមឱ្យអគ្គព្រះរាជអាជ្ញាហ្នឹងធ្វើឱ្យលឿនមែនទែន ហើយធ្វើឱ្យលឿន ធ្វើឱ្យលះ មិនមែនពលរដ្ឋប្តឹងទៅកន្លែងមានអំណាចហើយ ស្រាប់តែមកដល់ធ្វើឱ្យប្រជាពលរដ្ឋយូរៗទៅ ធ្វើឱ្យរឿងហ្នឹងភ្លេចណា កាលណាធ្វើឱ្យភ្លេចទៅ ដំណើរការធ្វើឱ្យភ្លេចទៅ អត់ខ្វល់ អាហ្នឹងមានន័យថា ធានាស្អីគេ? ធានាសុខសុវត្ថិភាព ធានាដល់សណ្ដាប់ធ្នាប់សង្គមឬក៏ម៉េច? ដូច្នេះកាលណាគេប្តឹងទៅ ខ្លួនឯងមានអំណាចតើ ធ្វើឱ្យលឿនមក ធ្វើឱ្យលះ កុំធ្វើលបៗចឹង អាហ្នឹងវាខ្មាស់គេ»។
អនុប្រធានផ្នែកសិទ្ធិមនុស្ស និងដីធ្លី នៃសមាគមអាដហុក លោក យិន ម៉េងលី សង្កេតឃើញថា សំណុំរឿងនេះគ្មានភស្តុតាងដាក់បន្ទុកដល់ជនរងគ្រោះនោះទេ ហេតុអ្វីចៅក្រមស៊ើបសួរមិនដោះលែងជនរងគ្រោះ ក្នុងដំណាក់កាលស៊ើបសួរ?។ លោកយល់ថា ស្ថាប័នពាក់ព័ន្ធត្រូវមានវិធានការរដ្ឋបាលដល់មន្ត្រីនគរបាលយុត្តិធម៌ទាំងឡាយណាដែលប្រព្រឹត្តកំហុស រួមទាំងអ្នកពាក់ព័ន្ធ ឱ្យទទួលខុសត្រូវតាមផ្លូវច្បាប់ ដើម្បីព្រមានដល់មន្ត្រីផ្សេងទៀត។
លោកថា៖ «ខ្សែសង្វាក់គ្នាបានច្រើនណាស់ គ្រប់ដំណាក់កាលទាំងអស់ យើងជំរុញឱ្យមានការ គណៈកម្មការមួយចេញពីក្រសួងយុត្តិធម៌ ពិនិត្យមើលបែបបទនីតិវិធី។ តើកំហុសហ្នឹងនៅទាក់ទិនត្រង់ណា? ខាងណាផ្តើមមកខុស? ដើម្បីដោះស្រាយបញ្ហានេះ ត្រូវមានសំណងដល់ជនរងគ្រោះ ហើយបើអ្នកពាក់ព័ន្ធ បើមិនមានវិធានការផ្លូវច្បាប់ទេ ក៏ត្រូវតែមានវិធានការរដ្ឋបាលដែរ ដកបញ្ឈរជើង ដកអីចឹង ដើម្បីជាការព្រមានដល់មន្ត្រីផ្សេងៗទៀត»។
ក្រោយពីតុលាការខេត្តស្ទឹងត្រែងដោះលែង លោក ស្លេះ ហ្វឺត កាលពីចុងខែសីហា ឆ្នាំ២០២៦ ជនរងគ្រោះរូបនេះ បានប្តឹងចៅក្រមស៊ើបសួរនៃសាលាដំបូងខេត្តស្ទឹងត្រែង លោក ហួយ សេរីវឌ្ឍនពិសិដ្ឋ និងប្តឹងលោក ជា សុភ័ក្ត្រ ព្រះរាជអាជ្ញារងខេត្តស្ទឹងត្រែង ទៅកាន់ក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រម ដើម្បីសុំឱ្យពិនិត្យភាពមិនប្រក្រតីលើចំណាត់ការរបស់មន្ត្រីតុលាការទាំងនេះមកលើរូបលោក យ៉ាងអយុត្តិធម៌។ មកទល់ម៉ោងនេះ សំណុំរឿងនេះ មិនទាន់មានចំណាត់ការបែបណាពីឧត្តមក្រុមប្រឹក្សានៃអង្គចៅក្រមនៅឡើយទេ៕
