យន្តការដំឡើងប្រាក់ឈ្នួលកម្មករក្នុងវិស័យកាត់ដេរ សម្រាប់ឆ្នាំ២០២៧ ឡើងបានចំនួន ២ដុល្លារ ដែលជាការបន្ថែមពីនាយករដ្ឋមន្ត្រី លោក ហ៊ុន ម៉ាណែត បើទោះបីជាសហជីពឯករាជ្យ បានទាមទារឱ្យរដ្ឋដំឡើង ១៥ដុល្លារបន្ថែមលើប្រាក់ឈ្នួលដែលមានស្រាប់ឱ្យដល់ ២២៥ដុល្លារ ដើម្បីសម្រួលបន្ទុកកម្មករក្តី។
ក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា នៅថ្ងៃទី៣០ ខែកញ្ញានេះ ក្រុមប្រឹក្សាជាតិប្រាក់ឈ្នួល បានបោះឆ្នោតគាំទ្រតួលេខដែលស្នើដោយភាគីរោងចក្រ រក្សាចំនួន ២១០ដុល្លារដដែល។
ប៉ុន្តែថា លោក ហ៊ុន ម៉ាណែត បានបន្ថែមចំនួន ២ដុល្លារ ធ្វើឱ្យប្រាក់ឈ្នួលអប្បបរមារបស់កម្មករក្នុងវិស័យនេះ ឡើងដល់ ២១២ដុល្លារ ក្នុងមួយខែ សម្រាប់ឆ្នាំ២០២៧។
ជុំវិញយន្តការនេះ សហជីពមួយចំនួន ដែលគេដឹងថា ជាសហជីពឯករាជ្យ បានដាក់តួលេខស្នើឱ្យក្រសួងដំឡើងប្រាក់ឈ្នួលអប្បបរមាដល់កម្មករ ពី ២១០ដុល្លារ ដល់ ២២៥ដុល្លារ ក្រោមហេតុផលថា ដើម្បីសម្រួលបន្ទុករបស់កម្មករ ទោះពួកគេសិក្សារកឃើញថា ការចំណាយជាក់ស្តែង ឬចំណាយមូលដ្ឋានកម្មករម្នាក់ៗ ចំណាយអស់ខ្ទង់ជាង ៧០០ដុល្លារ ក្នុងមួយខែក្តី។
ជាការកត់សម្គាល់ មុនក្រុមប្រឹក្សាជាតិប្រាក់ឈ្នួល បើកកិច្ចប្រជុំដើម្បីពិភាក្សាពីលទ្ធភាពដំឡើងប្រាក់ឈ្នួលសម្រាប់កម្មករ ឆ្នាំ២០២៧ អតីតនាយករដ្ឋមន្ត្រី លោក ហ៊ុន សែន បានបង្ហោះសារលើបណ្តាញសង្គមរបស់លោក បង្ហាញថា ប្រាក់ឈ្នួលកម្មករកម្ពុជា បច្ចុប្បន្ន ខ្ពស់ជាងប្រាក់ឈ្នួលកម្មករនៅបណ្តាប្រទេសមួយចំនួន ដូចជាប្រទេសវៀតណាម ឡាវ និងមីយ៉ាន់ម៉ា ជាដើម។
ប៉ុន្តែ អ្នកតាមដានអះអាងថា ប្រទេសដែលមានប្រាក់ឈ្នួលទាបជាងកម្មករកម្ពុជា ដែលមេដឹកនាំបានលើកឡើងនោះ មានជីវភាពរស់នៅប្រសើរជាងកម្មករក្នុងវិស័យកាត់ដេរនៅកម្ពុជា ដោយសំអាងថា កម្មករនៅបណ្តាប្រទេសទាំងនោះ ពួកគេបានចំណាយតិចជាងកម្មករនៅកម្ពុជា លើតម្លៃទឹក ភ្លើង ផ្ទះជួល និងតម្លៃទំនិញនៅលើទីផ្សារជាដើម៕
