កងឆ្មាំបដិវត្តន៍ឥស្លាមរបស់អ៊ីរ៉ង់ បានអំពាវនាវដល់ម្ចាស់ឆ្នោតអាមេរិក ឱ្យបោះឆ្នោតទម្លាក់ក្រុមលោក ដូណាល់ ត្រាំ ចេញពីសភា និងបដិសេធការគាំទ្ររបស់សហរដ្ឋអាមេរិកចំពោះអ៊ីស្រាអែល ខណៈកងទ័ពអាមេរិកដកថយចេញពីមូលដ្ឋានក្នុងប្រទេសអ៊ីរ៉ាក់ កាលពីថ្ងៃទី៣០ ខែកញ្ញា ដែលជាការចាកចេញមួយត្រូវបានអបអរសាទរដោយក្រុងតេអេរ៉ង់។
ទន្ទឹមនឹងនេះ ប្រទេសកាតារកំពុងបន្តការទូតសម្របសម្រួល ដើម្បីបញ្ចប់សង្គ្រាមរយៈពេល ៧ខែ រវាងអ៊ីរ៉ង់ និងអាមេរិក ខណៈលោក ត្រាំ ព្យាករណ៍ជាថ្មីថាអ៊ីរ៉ង់នឹងចុះចាញ់យ៉ាងឆាប់រហ័ស។
លិខិត ២៦ទំព័ររបស់កងឆ្មាំបដិវត្តន៍ បានអំពាវនាវឱ្យប្រជាជនអាមេរិកទម្លាក់មេដឹកនាំបច្ចុប្បន្ន និងបដិសេធការគាំទ្ររបស់អាមេរិកចំពោះអ៊ីស្រាអែល ក៏ដូចជាការជ្រៀតជ្រែកយោធានៅបរទេស។ សារនេះចង្អុលបង្ហាញពីបញ្ហាដែលអ្នកវិភាគនិយាយថា កំពុងប្រឆាំងនឹងលោក ត្រាំ និងគណបក្សសាធារណរដ្ឋ នៅមុនការបោះឆ្នោតសភាថ្ងៃទី៣ ខែវិច្ឆិកា។
លិខិតនោះលើកឡើងថា «ចូរទម្លាក់អ្នកនយោបាយដ៏អាក្រក់ បោកប្រាស់ និងហិង្សា ដែលជាអ្នកទទួលខុសត្រូវចំពោះស្ថានភាពបច្ចុប្បន្នរបស់អាមេរិកចេញពីអំណាច»។
លោក ត្រាំ បានឃោសនានៅឆ្នាំ២០២៤ ដោយសន្យាជៀសវាងសង្គ្រាម និងកាត់បន្ថយអតិផរណា ប៉ុន្តែសង្គ្រាមជាមួយអ៊ីរ៉ង់បានធ្វើឱ្យតម្លៃប្រេងឥន្ធនៈពិភពលោកកើនឡើង។
ការស្ទង់មតិរបស់ Reuters បង្ហាញថា មានតែ ១៧% ប៉ុណ្ណោះដែលអនុម័តលើការដោះស្រាយរបស់លោក ត្រាំ ចំពោះការចំណាយលើការរស់នៅ ហើយ ៣៤% អនុម័តលើការវាយប្រហារលើអ៊ីរ៉ង់។ លោក ត្រាំ បានអនុញ្ញាតឱ្យមានការដកទ័ពចុងក្រោយចេញពីអ៊ីរ៉ាក់ ដែលត្រូវបានព្រមព្រៀងគ្នានៅឆ្នាំ២០២៤ ដោយអតីតប្រធានាធិបតី ចូ បៃដិន។ ការដកទ័ពនេះកើតឡើង ២៣ឆ្នាំ បន្ទាប់ពីអាមេរិកបានផ្តួលរំលំលោក សាដាំ ហ៊ូសេន។
សង្គ្រាមនេះបានទាញសម្ព័ន្ធមិត្តអ៊ីរ៉ង់នៅយេម៉ែន លីបង់ និងអ៊ីរ៉ាក់ ឱ្យចូលរួម ហើយអ៊ីរ៉ង់ចាត់ទុកការដកទ័ពរបស់អាមេរិកថាជាជ័យជម្នះសម្រាប់ «អ័ក្សនៃការពុះពារ» របស់ខ្លួន។ អាមេរិក និងអ៊ីរ៉ង់ មិនទាន់រកឃើញផ្លូវចេញពីសង្គ្រាមនៅឡើយទេ ហើយការចរចានៅអង្គការសហប្រជាជាតិមិនទាន់ទទួលបានកិច្ចព្រមព្រៀងដើម្បីបើកច្រកសមុទ្រ ហ័រមូស ឡើងវិញនោះទេ ដែលជាច្រកដឹកជញ្ជូនថាមពល ២០% នៃពិភពលោក។
កាតារកំពុងបន្តដើរតួជាអ្នកសម្របសម្រួល។ អ្នកនាំពាក្យក្រសួងការបរទេសកាតារ លោក Majed al-Ansari បានថ្លែងថា «យើងកំពុងធ្វើការដើម្បីបង្កើតគោលជំហររួមមួយ ដើម្បីឈានទៅដល់កិច្ចព្រមព្រៀងជួយសង្គ្រោះយើងទាំងអស់គ្នាពីជម្លោះនេះ»។
លោក ត្រាំ ប្រកាសជំហរថា អ៊ីរ៉ង់មិនត្រូវទទួលបានអាវុធនុយក្លេអ៊ែរឡើយ ហើយសង្គ្រាមនឹងបញ្ចប់ឆាប់ៗ ដោយលោកបញ្ជាក់ថា «ពួកគេនឹងបោះបង់»។
នៅអង្គការសហប្រជាជាតិ អ៊ីរ៉ង់បានលើកឡើងនូវសំណើសន្តិភាពដើម្បីបើកច្រកសមុទ្រ និងផ្អាកការប្រយុទ្ធ ប៉ុន្តែលោក ត្រាំ បានបដិសេធ។ លោក ត្រាំ លើកឡើងថា ការធ្វើឱ្យសមត្ថភាពនុយក្លេអ៊ែររបស់អ៊ីរ៉ង់ចុះខ្សោយ ជាគោលដៅសង្គ្រាមមួយរបស់លោក។ ចំណែកអ៊ីរ៉ង់ដែលមិនមានអាវុធនុយក្លេអ៊ែរ បានបដិសេធថាខ្លួនមិនបានស្វែងរកអាវុធទាំងនោះទេ ហើយបញ្ជាក់ថាខ្លួនមានសិទ្ធិអភិវឌ្ឍបច្ចេកវិទ្យានុយក្លេអ៊ែរសម្រាប់គោលបំណងសន្តិវិធី៕
