អ្នកឃ្លាំមើលមួយចំនួន ចាត់ទុកសារ «ស្លឹកឈើជ្រុះមិនឆ្ងាយពីគល់» របស់លោក ហ៊ុន សែន ថាគឺជាការពិត ខណៈទាំងលោក ហ៊ុន សែន និងលោក ហ៊ុន ម៉ាណែត គឺជាមេដឹកនាំផ្តាច់ការដូចគ្នា ដឹកនាំប្រទេសធ្វើឱ្យបាត់បង់ទឹកដីដូចគ្នា និងខ្លាំងបានតែជាមួយខ្មែរគ្នាឯងដូចគ្នា ប៉ុន្តែខ្លាចមិនហ៊ានតតាំងជាមួយវៀតណាម និងសៀម ដែលរំលោភឈ្លានពានទឹកដី។
ប្រតិកម្មទាំងនេះ កើតមានឡើង បន្ទាប់ពីលោក ហ៊ុន សែន ប្រធានព្រឹទ្ធសភា កាលពីថ្ងៃទី២៩ ខែកញ្ញា បានបង្ហោះសារខ្លីមួយលើហ្វេសប៊ុក ពីលើរូបថតរបស់លោកនិងរូបថតលោក ហ៊ុន ម៉ាណែត ចុះជួយពលរដ្ឋរងគ្រោះដោយទឹកជំនន់ថា «ស្លឹកឈើជ្រុះមិនឆ្ងាយពីគល់។ រូបភាពឆ្នាំ២០០០ និងរូបភាពឆ្នាំ២០២៦ មានអ្វីប្លែកគ្នា»។
លោក ប៉ែន បូណា អ្នកនាំពាក្យរដ្ឋាភិបាល បានធ្វើអត្ថាធិប្បាយបញ្ជាក់បន្ថែមពីលើសាររបស់លោក ហ៊ុន សែន «ស្លឹកឈើជ្រុះមិនឆ្ងាយពីគល់» នេះថា មេដឹកនាំគណបក្សប្រជាជនកម្ពុជា គឺមានប្រពៃណីផ្សារភ្ជាប់ជាមួយប្រជាពលរដ្ឋ រួមសុខរួមទុក្ខជាមួយប្រជាពលរដ្ឋ បម្រើប្រជាពលរដ្ឋ គឺជាគុណធម៌ និងជាអត្តសញ្ញាណរបស់រាជរដ្ឋាភិបាលគណបក្សប្រជាជនកម្ពុជា ដែលបន្តពីជំនាន់មួយទៅជំនាន់មួយដោយឥតប្រែប្រួលឡើយ។ លោកថា ជាក់ស្តែង លោក ហ៊ុន សែន បានបង្ហោះរូបថតពីរសន្លឹក ក្នុងនោះ១សន្លឹកជារូបរបស់លោក ជួបជាមួយប្រជាពលរដ្ឋរងគ្រោះដោយទឹកជំនន់ កាលពីឆ្នាំ២០០០ ដែលលោកនៅជានាយករដ្ឋមន្ត្រី។
លោកថា៖ «មួយសន្លឹកទៀតជារូបលោក ហ៊ុន ម៉ាណែត នាយករដ្ឋមន្ត្រីបច្ចុប្បន្ន ចុះជួបប្រជាពលរដ្ឋរងគ្រោះដោយទឹកជំនន់ក្នុងឆ្នាំ២០២៦នេះ អមដោយចំណងជើងខ្លី និងមានអត្ថន័យជ្រាលជ្រៅថា ស្លឹកឈើជ្រុះមិនឆ្ងាយពីគល់ ដែលមានន័យថា ថ្នាក់ដឹកនាំរាជរដ្ឋាភិបាលចេញពីគណបក្សប្រជាជនកម្ពុជា តែងតែបន្តប្រពៃណីរួមសុខទុក្ខជាមួយប្រជាពលរដ្ឋជានិច្ច ដោយអត់ប្រែប្រួល មិនខុសពីរៀមច្បងថ្នាក់ដឹកនាំរបស់ខ្លួនឡើយ ពោលគឺ ទីណាពលរដ្ឋមានទុក្ខ មានមុខសម្តេចតេជោធិបតី និងមន្ត្រីថ្នាក់ដឹកនាំគ្រប់លំដាប់ថ្នាក់ ចាំជួយប្រជាពលរដ្ឋជានិច្ច»។
ប៉ុន្តែយ៉ាងណាក្តី អ្នកឃ្លាំមើលមួយចំនួន បានបង្ហាញពីការយល់ឃើញផ្សេងខុសពីការលើកឡើងរបស់លោក ប៉ែន បូណា ដោយផ្តោតទៅលើចំណុចអវិជ្ជមានរបស់មេដឹកនាំទាំងពីររូប។
លោក អ៊ុំ សំអាន អតីតតំណាងរាស្ត្រគណបក្សសង្គ្រោះជាតិ បានថ្លែងថា អ្វីដែលលោក ហ៊ុន សែន បានលើកឡើងថា «ស្លឹកឈើជ្រុះមិនឆ្ងាយពីគល់» ដែលសំដៅលើការដឹកនាំរបស់លោក ហ៊ុន ម៉ាណែត ដូចការដឹកនាំរបស់គាត់នោះ គឺជាការត្រឹមត្រូវ។ ប៉ុន្តែលោកថា ពលរដ្ឋខ្មែរមិនមានអ្វីត្រូវសាទរនោះទេ ព្រោះទាំងលោក ហ៊ុន សែន និងលោក ហ៊ុន ម៉ាណែត សុទ្ធតែកាន់អំណាចផ្តាច់ការដូចគ្នា ដឹកនាំប្រទេសធ្វើឱ្យបាត់បង់ទឹកដីដូចគ្នា បំផ្លិចបំផ្លាញធនធានធម្មជាតិឱ្យវិនាសអន្តរាយដូចគ្នា បើកដៃឱ្យអ្នកមានអំណាចប្លន់យកដីធ្លីផ្ទះសំបែងរបស់ប្រជាពលរដ្ឋ ធ្វើឱ្យប្រជាពលរដ្ឋរងទុក្ខវេទនាដូចគ្នាជាដើម។
លោកថា៖ «ក្រោមការដឹកនាំឪកូនហ្នឹង គឺបំផ្លិចបំផ្លាញធនធានធម្មជាតិ ធ្វើឱ្យបាត់បង់ទឹកដីទាំងខាងលិចទាំងខាងកើត ហើយខ្លាំងបានតែជាមួយខ្មែរគ្នាឯង កម្ចាត់តែខ្មែរគ្នាឯង។ ជាមួយខ្មែរងើបមួយវាយមួយ ប៉ុន្តែជាមួយវៀតណាម ជាមួយសៀម អត់ហ៊ានជាមួយគេទេ ធ្វើឱ្យមានការបែកបាក់ជាតិ មានវិបត្តិចាក់ស្រេះ ធ្វើឱ្យមនឧកញ៉ាបោកប្រាស់ប្រជាពលរដ្ឋច្រើនណាស់ ហើយមួយទៀតយើងឃើញថា ក្រោមការដឹកនាំរបស់ត្រកូលហ៊ុនហ្នឹង មានឧក្រិដ្ឋកម្មឆបោកតាមអនឡាញដែលអាសោចពេញពិភពលោក អាហ្នឹងយើងឃើញជាក់ស្តែង»។
មន្ត្រីបក្សប្រឆាំងរូបនេះ លើកឡើងទៀតថា បើទោះបីជាលោក ហ៊ុន ម៉ាណែត បានទៅរៀននៅប្រទេសសេរីយ៉ាងណាក្តី ក៏ប៉ុន្តែក្រោមការដឹកនាំរបស់លោក ហ៊ុន ម៉ាណែត ក្នុងរយៈពេល៣ឆ្នាំកន្លងមកនេះ មិនត្រឹមតែមិនបានធ្វើឱ្យកម្ពុជាមានភាពល្អប្រសើរនោះទេ ថែមទាំងធ្វើឱ្យកើតមានវិបត្តិចាក់ស្រេះកាន់តែធ្ងន់ធ្ងរខ្លាំងឡើងថែមទៀត។ ការបន្តតាមកម្ទេចតាមកម្ចាត់ខ្មែរគ្នាឯង ធ្វើឱ្យមានការបែកបាក់ជាតិកាន់តែខ្លាំង ធ្វើឱ្យខ្មែរចុះខ្សោយ ការកើតឱ្យមានអំពើឆបោកគ្រប់ទម្រង់ ដែលរុញច្រានប្រជាពលរដ្ឋកាន់តែច្រើន ឱ្យកាន់តែធ្លាក់ខ្លួនក្រីក្រជំពាក់បំណុលគេវ័ណ្ឌកកាន់តែច្រើន ហើយពលរដ្ឋបន្តចេញទៅស៊ីឈ្នួលគេនៅក្រៅប្រទេសដើម្បីចិញ្ចឹមជីវិតកាន់តែច្រើនជាដើម។
ចំណែក លោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា បានថ្លែងថា ពាក្យ «ស្លឹកឈើជ្រុះមិនឆ្ងាយពីគល់» របស់លោក ហ៊ុន សែន ត្រូវបានគេផ្តល់អត្ថន័យបន្ថែមថា ឪដឹកនាំប្រទេសបានធ្វើឱ្យបាត់ដីទៅវៀតណាម រីឯកូនដឹកនាំប្រទេស គឺធ្វើឱ្យបាត់ដីទៅថៃ។ សរុបទៅគឺទាំងឪពុកទាំងកូន គឺដឹកនាំប្រទេសធ្វើឱ្យបាត់បង់ទឹកដីទៅប្រទេសជិតខាងដូចគ្នា ដូច្នេះអ្វីដែលប្រធានគណបក្សប្រជាជនកម្ពុជារូបនេះលើកឡើងគឺត្រឹមត្រូវ។
បន្ថែមពីនេះ លោកថា ឪពុកដឹកនាំផ្តាច់ការ កូនក៏រៀនដឹកនាំតាមក្បួនផ្តាច់ការរបស់ឪពុកដែរ ហើយឪពុកដឹកនាំបែបពុករលួយ បក្ខពួកនិយម គ្រួសារនិយម ឯកូនធ្វើបានល្អជាងឪពុកដែរ គឺថា ពង្រីកសមាសភាពមន្ត្រីជាន់ខ្ពស់រដ្ឋាភិបាល ធ្វើឱ្យក្បាលម៉ាស៊ីនដឹកនាំរដ្ឋាភិបាលរីកកាន់តែធំ ចាយបំផ្លាញថវិកាជាតិដែលប្រជាពលរដ្ឋបង់ពន្ធកាន់តែច្រើនជាដើម។
លោកបញ្ជាក់ថា អ្វីដែលលោក ហ៊ុន សែន លើកឡើង អាចជាបំណងរបស់គ្រួសារដែលកូនចៅដើរតាមគន្លងរបស់ខ្លួន។ ប៉ុន្តែសម្រាប់ប្រជាជាតិខ្មែរ មិនត្រូវការការដឹកនាំតពូជដែលធ្វើឱ្យប្រទេសជាតិបាត់បង់ទឹកដី និងកើតមានវិបត្តិចាក់ស្រេះបែបនេះទេ។
អ្នកឃ្លាំមើលរូបនេះ បន្តថា កាលពីជំនាន់លោក ហ៊ុន សែន ដឹកនាំ គឺបានបំផ្លិចបំផ្លាញធនធានធម្មជាតិយ៉ាងច្រើនសម្បើម ហើយនៅពេលលោក ហ៊ុន ម៉ាណែត ឡើងមកដឹកនាំគឺបានបន្តបំផ្លិចបំផ្លាញធនធានធម្មជាតិបន្តទៀតតាមរយៈពួកឧកញ៉ា ពួកមន្ត្រីខិលខូចគ្រាក់ៗរបស់ខ្លួន។
លោកថា៖ «លោក ហ៊ុន សែន ដឹកនាំប្រទេសបានបង្ក្រាបធ្វើទុក្ខបុកម្នេញអ្នកប្រជាធិបតេយ្យ ដល់ពេលលោក ហ៊ុន ម៉ាណែត ជាកូនឡើងមកដឹកនាំបន្ត ក៏បន្តដឹកនាំដូចលោក ហ៊ុន សែន ដែរ។ បង្ក្រាបអ្នកប្រជាធិបតេយ្យ ចាប់មនុស្សដាក់គុកតាមទំនើងចិត្តដូចគ្នា អ៊ីចឹងហើយបញ្ហាឧក្រិដ្ឋកម្មអនឡាញដែលល្បីល្បាញអសោចលើឆាកអន្តរជាតិបច្ចុប្បន្នក៏អ៊ីចឹងដែរ»។
លោកបញ្ជាក់ថា លោក ហ៊ុន សែន បង្កើតឱ្យមានឧក្រិដ្ឋកម្មអនឡាញ ធ្វើឱ្យកម្ពុជាក្លាយទៅជាជម្រកក្រុមឧក្រិដ្ឋជន ដោយសារមានពួកមន្ត្រីជាន់ខ្ពស់ជំនិតរបស់គាត់មួយចំនួន ពាក់ព័ន្ធដោយផ្ទាល់នឹងឧក្រិដ្ឋកម្មនេះ។
លោកថា៖ «ដល់ពេលលោក ហ៊ុន ម៉ាណែត ឡើងមកកាន់តំណែងបន្តពីឪពុក ក៏ធ្វើបានដូចគ្នា គឺការពារពួកមនុស្សដែលជំនិតរបស់លោក ហ៊ុន សែន ទោះបីមានការបង្ក្រាបខ្លះមែន ក៏មេខ្លោងនៃបទឧក្រិដ្ឋហ្នឹងនៅតែបន្តកាងការពារដោយលោក ហ៊ុន ម៉ាណែត។ អ៊ីចឹងគឺថារៀនសូត្រពីឪពុកហ្នឹងគឺថាល្អ អាហ្នឹងហៅថាស្លឹកឈើជ្រុះមិនឆ្ងាយពីគល់ គឺដឹកនាំប្រទេសធ្វើឱ្យធ្លាក់ខ្លួននៅក្នុងស្ថានភាពអាសោចកេរ្តិ៍ឈ្មោះ ធ្វើឱ្យមានវិបត្តិចាក់ស្រេះពេញសង្គមហ្នឹងវាអ៊ីចឹង»។
ទាំងលោក អ៊ុំ សំអាន និងលោក ម៉ែន ណាត រួមទាំងអ្នកឃ្លាំមើលផ្សេងទៀត យល់ស្របគ្នាថា គ្មានសញ្ញាណាមួយដែលបង្ហាញថា លោក ហ៊ុន ម៉ាណែត ដឹកនាំប្រទេសអាចធ្វើឱ្យកម្ពុជាមានភាពល្អប្រសើរជាងឪពុករបស់លោកនោះទេ ព្រោះលោក ហ៊ុន ម៉ាណែត បានបង្ហាញឱ្យឃើញរួចហើយ ពីការមិនហ៊ានប្រកួតប្រជែងលើទីលានដោយតម្លាភាពនិងស្មើភាពនោះទេ គឺនៅតែបន្តប្រើដៃតុលាការ កម្ទេចកម្ចាត់ក្រុមប្រឆាំង ដើម្បីបានកាន់អំណាចតពូជ។ ដូចកាលពីលោក ហ៊ុន សែន គឺបានត្រួតត្រា គ.ជ.ប. ឱ្យរៀបចំការបោះឆ្នោតក្លែងក្លាយ និងបានប្រើប្រធានតុលាការកំពូល លោក ឌិត មន្ទីរ ដែលជាសមាជិកជាន់ខ្ពស់របស់គណបក្សប្រជាជនកម្ពុជា ឱ្យរំលាយគណបក្សសង្គ្រោះជាតិទាំងបំពាន។
ចំណែក សម័យលោក ហ៊ុន ម៉ាណែត បច្ចុប្បន្ន ក៏នៅតែបន្តត្រួតត្រា គ.ជ.ប. ផងដែរ និងនៅបន្តប្រើលោក ជាវ កេង ប្រធានតុលាការកំពូល ដែលក៏ជាសមាជិកជាន់ខ្ពស់របស់គណបក្សប្រជាជនកម្ពុជាផងដែរនោះ ឱ្យបន្តធ្វើទុក្ខបុកម្នេញលើក្រុមប្រឆាំងដដែលដូចជា ដកសិទ្ធិធ្វើនយោបាយពីលោក កឹម សុខា លោក រ៉ុង ឈុន និងអ្នកនយោបាយប្រឆាំងផ្សេងទៀត។
សម្រាប់ក្រុមអ្នកឃ្លាំមើល គ្មានសម័យណា ឬក៏មិនមានមេដឹកនាំប្រទេសណាមួយដែលចោទប្រកាន់ប្រជាពលរដ្ឋខ្លួនឯងថា ជាក្រុមឧទ្ទាមក្រៅច្បាប់ ឬពីបទញុះញង់ក្បត់ជាតិទៅលើប្រជាពលរដ្ឋដែលបញ្ចេញមតិខ្វល់ខ្វាយពីបញ្ហាជាតិ បញ្ហាទឹកដី និងការការពារធនធានធម្មជាតិហើយចាប់ដាក់គុក ដូចសម័យកាលដែលដឹកនាំដោយលោក ហ៊ុន សែន និងលោក ហ៊ុន ម៉ាណែត នេះឡើយ ដែលនេះបង្ហាញច្បាស់ថា «ស្លឹកឈើជ្រុះមិនឆ្ងាយពីគល់»៕
