អ្នកបើកបរម៉ូតូកង់បីដែលដាក់ប្រព័ន្ធអេប(App)ជាច្រើននាក់ បាននាំគ្នាតវ៉ានៅមុខក្រុមហ៊ុន PassApp នាថ្ងៃទី៣០ ខែកញ្ញា ឆ្នាំ២០២៦ ទាមទារឱ្យក្រុមហ៊ុនលុបចោលកម្មវិធីប្រូម៉ូសិន តុកតុក សេវលុយ (TukTuk Save Luy) និងបញ្ចុះកម្រៃជើងសារ ព្រមទាំងគោរពកិច្ចព្រមព្រៀងដែលធ្លាប់ធ្វើកន្លងមក ខណៈពួកគេថាការបន្តរំលោភកិច្ចព្រមព្រាងរបស់ក្រុមហ៊ុន បានប៉ះពាល់ដល់ការរកចំណូលរបស់ពួកគាត់ ជាពិសេសអំឡុងពេលប្រេងឥន្ធនៈឡើងថ្លៃនេះ។
លោក រស់ សំអឿន អ្នកបើកបរម៉ូតូកង់បី បានថ្លែងប្រាប់អ្នកសារព័ត៌មាននៅកន្លែងតវ៉ាមុខក្រុមហ៊ុន PassApp ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញថា បើទោះបីជាមានកិច្ចព្រមព្រាងរវាងបណ្តាក្រុមហ៊ុនប្រើប្រាស់ប្រព័ន្ធអេប(App) ជាមួយនឹងតំណាងអ្នកបើកបរ ក្រោមការសម្របសម្រួលរបស់ក្រសួងពាណិជ្ជកម្ម កាលពីថ្ងៃទី១៨ ខែកញ្ញា ឆ្នាំ២០២៦ ដែលតម្រូវឱ្យក្រុមហ៊ុនប្រើប្រាស់ប្រព័ន្ធអេបទាំងអស់ លុបចោលកម្មវិធីប្រូមូសិនក៏ដោយ ប៉ុន្តែខាងក្រុមហ៊ុន PassApp នៅមិនទាន់លុបចោលនៅឡើយ ខណៈក្រុមហ៊ុនផ្សេងទៀត បានលុបអស់ហើយ។
ការណ៍នេះ លោកថា នាំឱ្យអ្នកបើកបរមិនសុខចិត្ត និងបានប្រមូលផ្តុំតវ៉ា ទាមទារឱ្យក្រុមហ៊ុនលុបកម្មវិធីប្រូម៉ូសិននេះចោល និងទាមទារលក្ខខណ្ឌមួយចំនួនទៀត។
លោកថា៖ «កម្មវិធីធម្មតាហ្នឹង គឺវាអត់ស្មើគ្នាទេ ឧទាហរណ៍ថា ឥឡូវកម្មវិធីតុកតុកសេវលុយហ្នឹងនៅមាន ភ្ញៀវគេធ្លាប់ប្រើតែអាហ្នឹងវាធូរថ្លៃ គេចុចតែអាហ្នឹងទេ ហើយអាពួកកម្មវិធីធម្មតាដែលធ្លាប់ប្រើតម្លៃដែលបានតម្លៃសមរម្យហ្នឹង គឺអត់បានចូលទេ អត់បានទម្លាក់ភ្ញៀវឱ្យទេ។ ឯកភាពអស់ហើយ នៅសល់តែ PassApp ហ្នឹងមួយទេ ហើយ PasApp ហ្នឹងក៏គាត់បានស៊ីញ៉េនៅក្នុងកិច្ចព្រមព្រៀងរបស់ក្រសួងពាណិជ្ជកម្មដែរ គឺថ្ងៃទី១៨ហ្នឹងត្រូវតែលុប តែមកដល់ថ្ងៃនេះហើយ គាត់អត់ទាន់លុបទេ»។
អ្នកបើកបរម៉ូតូកង់បីម្នាក់ទៀត លោក ហួន កុសល បានលើកឡើងអំឡុងពេលតវ៉ាដែរថា ការបន្តទុកកម្មវិធីប្រូម៉ូសិន តុកតុកសេវលុយ និងការដំឡើងកម្រៃជើងសារពី ១៥ភាគរយ ទៅ១៨ភាគរយនេះ បានប៉ះពាល់ដល់ការរកចំណូល និងជីវភាពរបស់ពួកគាត់ជាខ្លាំង ជាពិសេសអំឡុងពេលហ្គាសឡើងថ្លៃនេះ។
លោកថា៖ «ស្របពេលដែលសេដ្ឋកិច្ចរបស់យើងដែលកំពុងតែជួបបញ្ហាកន្លងមក រហូតមកដល់ឥឡូវក៏យើងនៅជួបវិបត្តិប្រេងឧស្ម័នហ្គាសហ្នឹងទៀត ចឹងសម្រាប់បងប្អូនអ្នកដែលរត់កង់បីយើងនេះ ក្នុងមួយថ្ងៃ សឹងតែរក ៥ម៉ឺន[រៀល]លែងចង់ឃើញហើយ[…] នៅពេលដែលហ្គាសកំពុងតែឡើងថ្លៃហើយ បែរទៅជាក្រុមហ៊ុនហ្នឹងដំឡើងភាគរយ[កម្រៃជើងសារពី១៥ទៅ១៨ភាគរយ]ទៀត»។
ការណ៍នេះ អ្នកបើកម៉ូតូកង់បីរូបនេះ បង្ហាញការឈឺចាប់ដែលក្រុមហ៊ុនរំលោភកិច្ចព្រមព្រាងរបស់ខ្លួនជាមួយអ្នកបើកបរ ហើយឆ្លៀតឱកាសបង្កើតនូវកម្មវិធីថ្មី ដែលប៉ះពាល់ដល់ការរកចំណូលរបស់ពួកគាត់ថែមទៀត។
លោកបន្តថា៖ «សេវាកម្មថ្មីហ្នឹង មិនមែនកើតឡើងតាំងពីយូរហើយទេ កើតឡើងខណៈពេលដែលយើងកំពុងតែតវ៉ា កំពុងតែសុំឱ្យក្រុមហ៊ុនហ្នឹងដំឡើងតម្លៃឱ្យវាស្របទៅនឹងតម្លៃចាស់យើងពីមុន ប៉ុន្តែក្រុមហ៊ុនបែរទៅជាឆ្លៀតឱកាសបង្កើតនូវកម្មវិធីថ្មីហ្នឹងឡើង តុកតុកសេវលុយ[…] សួរថាវាសមទេៗ វាអត់សមទេ ចឹងបានពួកយើងឈឺចាប់ណាស់ ឈឺចាប់ក្នុងការនិយាយតែម្តង ចឹងបានយើងមកនេះ គឺដើម្បីឱ្យក្រុមហ៊ុនលុបកម្មវិធីហ្នឹងចោលតែម្តង»។
អ្នកបើកបរម៉ូតូកង់បីម្នាក់ទៀត លោក ហេង ហុង បានចាត់ទុកទង្វើរបស់ក្រុមហ៊ុន PassApp ដែលបង្កើតកម្មវិធីប្រូម៉ូសិនថ្មីៗ និងកំណត់តម្លៃសេវាស្តង់ដារពីរ ជាការធ្វើទុក្ខបុកម្នេញលើអ្នកបើកបរ ដែលកំពុងតែរកប្រាក់ចំណូលមិនបាន ក្នុងអំឡុងសេដ្ឋកិច្ចជួបវិបត្តិ។
លោកថា៖ «ពីមុនមកអាចថា ត្រឹម ១០ម៉ោងអីចឹង អាចចូលផ្ទះបានចឹងណា ឥឡូវនេះបងប្អូនសឹងថា ១៥ម៉ោង ខ្លះទៅ១៦ម៉ោង ខ្លះពេលខ្លះ នឹកឃើញថាអញ្ចេក នឹកឃើញថារកលុយអត់បាន ដេកលើកង់បីតែម្តងទៅ ចឹងខាងបងប្អូនអ្នកសារព័ត៌មានក៏ធ្លាប់បានចុះដែរ អ្នកខ្លះសម្រាន្តលើកង់បីទៅក៏ខ្យល់គស្លាប់នៅលើកង់បី អាហ្នឹងជាកត្តាមួយដែលប្រយោល ដែលក្រុមហ៊ុនធ្វើបាបដោយប្រយោល»។
វីអូឌី មិនអាចសុំការអត្ថាធិប្បាយជុំវិញករណីនេះ ពីតំណាងក្រុមហ៊ុនPass App និងអ្នកនាំពាក្យក្រសួងប្រៃសណីយ៍បានទេ នៅរសៀលថ្ងៃពុធនេះ។
គួររម្លឹកថា កន្លងមក អ្នកបើកបររថយន្តតាក់ស៊ី និងកង់បី ដែលដាក់ប្រព័ន្ធអេប (App) បាននាំគ្នាតវ៉ាជាច្រើនលើកច្រើនសារមកហើយ តាំងពីនៅមុខរដ្ឋបាលរាជធានីភ្នំពេញ និងដល់អន្តរក្រសួង ដោយសុំឱ្យក្រុមហ៊ុនប្រព័ន្ធអេបចំនួន ៧ បញ្ចុះតម្លៃកម្រៃជើងសារដែលធ្លាប់កាត់ពី អ្នកបើកបរ ចន្លោះពីជាង ១៧ភាគរយ ទៅ ៣០ភាគរយ នោះឱ្យមកនៅត្រឹម ១៥ភាគរយ ឬក្រោមនេះ ដើម្បីជួយសម្រួលដល់ជីវភាពរស់នៅរបស់ពួកគាត់ ដែលកំពុងខ្វះខាត។
ការតវ៉ានេះ បានឈានទៅដល់ការចរចារកដំណោះស្រាយ ក្រោមការសម្របសម្រួលរបស់អន្តរក្រសួង ដោយខាងក្រុមហ៊ុនឯកភាពលុបចោលកម្មវិធីប្រូម៉ូសិន និងរក្សាកម្រៃជើងសារត្រឹម ១៥ភាគរយសិន រងចាំការវាយតម្លៃរបស់អន្តរក្រសួង ថាតើត្រូវកំណត់កម្រៃជើងសារថ្មីប៉ុន្មានភាគរយ?។
សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា IDEA លោក វន់ ពៅ សង្កេតឃើញថា ក្រុមហ៊ុន PassApp ជាក្រុមហ៊ុនដែលមិនមានក្រមសីលធម៌ និងមិនគិតពីតម្រូវការរបស់អ្នកបើកបរ ដោយកាត់កម្រៃជើងសារតាមអំពើចិត្ត ដាក់ប្រូម៉ូសិនផ្សេងៗដែលធ្វើឱ្យខាតប្រាក់ចំណូលរបស់អ្នកបើកបរ និងបានប្លុកអ្នកបើកបរដោយគ្មានហេតុផលជាដើម ក្នុងបរិបទដែលសេដ្ឋកិច្ចកំពុងធ្លាក់ចុះដុនដាបខ្លាំង ទំនិញឡើងថ្លៃ ការរកប្រាក់ចំណូលមិនមានតុល្យភាពនឹងការចំណាយ។
មួយវិញទៀត លោកថា ការចរចារកដំណោះស្រាយរវាងតំណាងក្រុមហ៊ុនប្រព័ន្ធអេប និងអ្នកបើកបរ ក្រោមការដឹកនាំដោយអន្តរក្រសួង ក៏ហាក់មិនសូវមានមូលដ្ឋានគ្រឹះណាមួយក្នុងការចាប់បង្ខំឱ្យក្រុមហ៊ុនអនុវត្តតាមកិច្ចព្រមព្រៀងនោះទេ ដូច្នេះហើយបានជាក្រុមហ៊ុនមួយចំនួន ហ៊ានបំពានបែបនេះ។
លោកថា៖ «ខ្ញុំឃើញសមត្ថភាពរបស់ក្រសួងនៅស្រុកយើង វាហាក់ដូចមានទំនោរច្រើនជាមួយថៅកែជាមួយក្រុមហ៊ុនអេប ប៉ុន្តែទំនោរការពារទៅលើអ្នកបើកបរ ទៅលើកម្មករ វាហាក់ដូចមានកម្រិតតិចតួច មិនមានទំនោរចាប់បង្ខំឱ្យថៅកែហ្នឹង ឆ្លើយតបនឹងតម្រូវការរបស់កម្មករ ឬតម្រូវការរបស់អ្នកបើកបរតាមប្រព័ន្ធអេបនេះឯង»។
ជាមួយគ្នានេះ លោកជំរុញឱ្យអ្នកបើកបរកង់បី និងរថយន្តតាក់ស៊ីដែលប្រើប្រាស់ប្រព័ន្ធអេបទាំងអស់ គួរសហការគ្នាត្រូវរកសំឡេងរួមតែមួយ ដើម្បីទៅចរចាជាមួយខាងក្រុមហ៊ុន ជៀសវាងការបែងចែកគ្នាជាក្រុមតូចៗ ហើយតវ៉ា ដែលធ្វើឱ្យក្រុមហ៊ុនមិនខ្លាចរអានឹងការតវ៉ារបស់ក្រុមតូចៗទាំងនោះទេ។
កន្លងមក សមាគម IDEA អ្នកបើកបរតាក់ស៊ី និងកង់បី ក៏ធ្លាប់បានដាក់ញត្តិដោយមានភ្ជាប់ស្នាមមេដៃរបស់សមាជិកប្រមាណជិត ១០០០នាក់ ក្នុងចំណោមសមាជិក ២ម៉ឺន៥ពាន់នាក់ ដែលសមាគមគ្រោងប្រមូល ទៅកាន់ក្រុមហ៊ុន Grap ក្រសួងប្រៃសណីយ៍ និងស្ថាប័នពាក់ព័ន្ធមួយចំនួន សុំឱ្យមានអន្តរាគមន៍ដោះស្រាយបញ្ហានេះ៕
