Social Issues, ព័ត៌មានជាតិ, សង្គម

រដ្ឋាភិបាលចាប់ផ្ដើមអនុវត្តវិធានគ្មានរង្វាន់ក្នុងក្រវិលកំប៉ុងស្រា នៅដើមខែតុលានេះ

រតនា ស្រីភាព
| ០១ តុលា ២០២៦
ម៉ោង ២០:២៧

រាជរដ្ឋាភិបាលកម្ពុជា បានដាក់ចេញនូវវិធានការតឹងរ៉ឹងជាលើកដំបូង ដោយបញ្ឈប់រាល់សកម្មភាពផ្ដល់រង្វាន់តាមរយៈក្រវិលកំប៉ុង គម្របដប ឬសំបកវេចខ្ចប់លើផលិតផលគ្រឿងស្រវឹង និងភេសជ្ជៈមានជាតិស្ករគ្រប់ប្រភេទទាំងស្រុង ចាប់ពីថ្ងៃទី១ ខែតុលា ឆ្នាំ២០២៦ នេះតទៅ។

ចំណាត់ការនេះ ធ្វើឡើងក្នុងគោលបំណងការពារសុខភាពសាធារណៈ កាត់បន្ថយគ្រោះថ្នាក់សង្គម និងកែប្រែទម្លាប់នៃការប្រើប្រាស់គ្រឿងស្រវឹង និងភេសជ្ជៈផ្អែមនៅក្នុងប្រទេស ដែលបានស្តែងចេញជាបញ្ហាប្រឈមធ្ងន់ធ្ងរនាពេលកន្លងមក។

មុនឈានដល់ការដាក់ចេញវិធានការនេះ កន្លងមក ការផ្សព្វផ្សាយរង្វាន់ធំៗ ដូចជាប្រាក់សុទ្ធ រថយន្ត ឬមាស បានក្លាយជាឧបករណ៍អូសទាញប្រជាពលរដ្ឋ ជាពិសេសក្រុមយុវជន និងអ្នកមានប្រាក់ចំណូលទាប ឱ្យបន្តទិញ និងទទួលទានហួសកម្រិតដើម្បីតែផ្សងសំណាង។

ទម្លាប់នៃការទទួលទានគ្រឿងស្រវឹង និងភេសជ្ជៈផ្អែមច្រើនលើសលប់ ដោយសារតែការចង់បានរង្វាន់នេះ បានបង្កជាគ្រោះថ្នាក់ចរាចរណ៍ អំពើហិង្សាក្នុងគ្រួសារ និងបទល្មើសផ្សេងៗនៅក្នុងសង្គម ព្រមទាំងជាប្រភពចម្បងនៃជំងឺមិនឆ្លងកាចសាហាវជាច្រើនប្រភេទ ដូចជា ទឹកនោមផ្អែម និងខ្សោយតម្រងនោមជាដើម។

វិធានការបញ្ឈប់ការដាក់រង្វាន់ក្នុងក្រវិលកំប៉ុង គម្របដប និងសំបកកញ្ចប់នេះ ត្រូវបានប្រកាសតាំងពីខែកក្កដា ឆ្នាំ២០២៦ មកម៉្លេះ។ ក្រសួងសេដ្ឋកិច្ច និងហិរញ្ញវត្ថុ បានណែនាំដល់គ្រប់សហគ្រាសផលិត អ្នកនាំចូល និងអាជីវករចែកចាយទាំងអស់ ឱ្យបញ្ឈប់ទាំងស្រុងនូវការបញ្ជាទិញ នាំចូល ឬផលិតថ្មីនូវក្រវិលកំប៉ុង និងគម្របដបដែលមានរង្វាន់។ ចំពោះរង្វាន់ចាស់ៗដែលនៅសេសសល់ អាជ្ញាធរបានកំណត់ឱសានុវាទចុងក្រោយនៃការផ្ដល់ និងប្តូររង្វាន់ត្រឹមថ្ងៃទី៣០ ខែកញ្ញា ឆ្នាំ២០២៦។

បន្ថែមពីនេះ រដ្ឋាភិបាលបានកំណត់ព្រំដែនប្រូម៉ូសិន ដោយអនុញ្ញាតត្រឹមតែការលក់បញ្ចុះតម្លៃពាណិជ្ជកម្ម (Trade Discount) មិនឱ្យលើសពី ១៥ភាគរយ ឬ ២៥ភាគរយ សម្រាប់ទំនិញជិតផុតកំណត់ និងការថែមសម្ភារបន្តិចបន្តួច ដូចជា កែវ អាវ ឬឆ័ត្រ ដែលមានតម្លៃមិនលើសពី ៥ភាគរយ នៃវិក្កយបត្រ។

អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់វីអូឌីថា នេះជាវិធានការមួយល្អ ដោយលោកចង់ឃើញវាដំណើរការទៅដោយរលូន និងគ្មានការអន្តរាគមន៍ណាមួយ បើកឱ្យមានការប្តូររង្វាន់វិញឡើយ។ លោកគូសបញ្ជាក់ថា តាមរយៈវិធានការនេះ វានឹងជួយកាត់បន្ថយការចំណាយលុយលើគ្រឿងស្រវឹង ជាពិសេសបញ្ហាដែលកើតចេញពីការសេពគ្រឿងស្រវឹង ដែលបំផ្លាញសុខភាពពលរដ្ឋ និងសន្តិសុខសង្គមនាពេលកន្លងមក។

លោក សេក សុជាតិ ថ្លែងថា៖ «រឿងរ៉ាវទាំងអស់ហ្នឹងគឺវាចាំបាច់ ហើយយើងចង់ឃើញការប្តេជ្ញាចិត្តរបស់រាជរដ្ឋាភិបាល របស់អាជ្ញាធរ ហើយនិងក្រុមហ៊ុន ក៏ដូចជាពលរដ្ឋ ធ្វើប្រការណាក៏ដោយ ជួយគ្នាតាមការការពារសុខភាពពលរដ្ឋ សុខក្សេមក្សាន្តសង្គម ដើម្បីឱ្យសង្គមយើងមានកម្លាំងមាំមួន ហើយនិងអាចអភិវឌ្ឍន៍សេដ្ឋកិច្ចរបស់ជាតិឱ្យបានកាន់តែល្អប្រសើរនៅពេលខាងមុខ»។

យុទ្ធនាការផ្តល់រង្វាន់នាពេលកន្លងមករបស់ក្រុមអ្នកធ្វើទីផ្សារផលិតផល បានបង្កការរិះគន់ពីពលរដ្ឋ និងអ្នកឃ្លាំមើលបញ្ហាសង្គម ដោយយល់ឃើញថា វាបានបង្កើតនិន្នាការនៃការញៀនទិញ ដែលបណ្តាលឱ្យកើតមានផលប៉ះពាល់ធ្ងន់ធ្ងរទាំងផ្នែកសុខភាព និងសេដ្ឋកិច្ចសង្គម ជាពិសេសទៅលើផលិតផលទាំងពីរប្រភេទនេះ។

ការទទួលទានគ្រឿងស្រវឹងហួសកម្រិត បង្កឱ្យមានជំងឺថ្លើម ជំងឺបេះដូង និងសរសៃឈាម សម្ពាធឈាមខ្ពស់ ព្រមទាំងបង្កើនហានិភ័យនៃជំងឺមហារីកជាច្រើនប្រភេទ។ ចំណែកឯការពិសារភេសជ្ជៈមានជាតិស្ករ និងភេសជ្ជៈកម្លាំងច្រើនពេក គឺជាមូលហេតុចម្បងនៃការកើតជំងឺទឹកនោមផ្អែមប្រភេទទី២ ជំងឺធាត់ជ្រុល ជំងឺពុកធ្មេញ និងបញ្ហាក្រលៀន។ ក្រៅពីបញ្ហាសុខភាព បញ្ហានេះក៏បានបណ្តាលឱ្យខាតបង់ថវិកាគ្រួសារ និងបាត់បង់ផលិតភាពការងារ ដែលជាធនធានមនុស្សយ៉ាងសំខាន់សម្រាប់ការអភិវឌ្ឍប្រទេសជាតិផងដែរ។

ក្រោយដាក់ចេញវិធានការនេះ ប្រជាពលរដ្ឋ អ្នកតាមដានសង្គម និងអ្នកជំនាញផ្នែកសុខភាព បានបង្ហាញការគាំទ្រ ដោយរំពឹងថានឹងជួយកាត់បន្ថយការពិសារគ្រឿងស្រវឹង និងភេសជ្ជៈផ្អែមនៅកម្ពុជា ឱ្យមកនៅត្រឹមកម្រិតមួយដែលមានសុវត្ថិភាព និងមានការទទួលខុសត្រូវខ្ពស់ក្នុងសង្គម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។