សាលាដំបូងរាជធានីភ្នំពេញ បានសម្រេចផ្តន្ទាទោសសកម្មជនសង្គម កញ្ញា ហ៊ីម មុំ ហៅ ខែម ស្រីមុំ ដាក់ពន្ធនាគារ ២ឆ្នាំ និងពិន័យជាប្រាក់ ៤លានរៀល ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថ»ជុំវិញភាពសកម្ម ចូលរួមជំរុញតម្លាភាពសង្គម និងចែករំលែករឿងថៃឈ្លានពានកម្ពុជា។
កញ្ញា ហ៊ីម មុំ ត្រូវបានសមត្ថកិច្ចឆ្មក់ចូលចាប់ខ្លួន កាលពីយប់ថ្ងៃទី១៥ ខែឧសភា ឆ្នាំ២០២៦ នៅបន្ទប់ជួលមួយកន្លែង ក្នុងរាជធានីភ្នំពេញ បន្ទាប់ពីសកម្មជនរូបនេះ ចែករំលែកបញ្ហាសង្គមលើហ្វេសប៊ុក ដូចជា ព័ត៌មានអន្តរជាតិ បញ្ហាអយុត្តិធម៌សង្គម ករណីចាប់ខ្លួនសកម្មជនចលនាមាតាធម្មជាតិ សកម្មភាពចូលរួមកិច្ចការសង្គម និងព័ត៌មានពាក់ព័ន្ធនឹងការឈ្លានពានរបស់ថៃ មកលើបូរណភាពទឹកដីកម្ពុជាជាដើម។
មន្ត្រីគោលនយោបាយ និងតស៊ូមតិនៃអង្គការភាពជាដៃគូដើម្បីបរិស្ថាន និងការអភិវឌ្ឍ កញ្ញា ហេង គឹមសួ ដែលបានស្តាប់ការប្រកាសសាលក្រមរបស់តុលាការ នៅរសៀលថ្ងៃទី៣០ ខែកញ្ញា បានឱ្យដឹងថា តុលាការបានសម្រេចផ្តន្ទាទោស កញ្ញា ហ៊ីម មុំ ឱ្យជាប់ពន្ធនាគារ ២ឆ្នាំ និងពិន័យជាប្រាក់ ៤លានរៀល ដោយលើកហេតុផលថា អ្វីដែលសកម្មជនរូបនេះបានបង្ហោះ និងខំមិន(Comment)នៅលើបណ្តាញសង្គមបង្កភាពវឹកវរធ្ងន់ធ្ងរដល់សង្គម។
យ៉ាងណា កញ្ញា គឹមសួ យល់ថា សាលក្រមនេះ ជារឿងអយុត្តិធម៌សម្រាប់កញ្ញា ហ៊ីម មុំ ដែលជាអ្នកខ្វល់ខ្វាយពីបញ្ហាសង្គម ប្រជាធិបតេយ្យ និងសិទ្ធិមនុស្សនៅកម្ពុជា បែរជាត្រូវជាប់ទោសទៅវិញ។
កញ្ញាថា៖ «សម្រាប់ខ្ញុំ នៅតែគិតថាវាជាភាពអយុត្តិធម៌មួយ ពីព្រោះថា ការដែលគាត់ស៊ែ(Share)ហ្នឹង គឺជាការបញ្ចេញមតិរបស់គាត់ក្នុងនាមជាពលរដ្ឋ ប៉ុន្តែត្រូវបានជាប់ពន្ធានគារទៅវិញ។ ហើយកន្លងមក គាត់ត្រឹមតែជាកម្មករកម្មការិនីរោងចក្រទេ ដែលគាត់បានត្រឹមរៀនចប់ត្រឹមថ្នាក់ទី៥ គាត់មិនមានសិទ្ធិអំណាចណាមួយ ដើម្បីទៅគៀងប្រមូលឱ្យមានការញុះញង់ ឬក៏ការប្រមាថអីណាមួយទេ ហើយចៅក្រមបានផ្តន្ទាទោសគាត់ពីបទ ញុះញង់ ហើយពីបទប្រមាថទៀត»។
មន្ត្រីសង្គមស៊ីវិលរូបនេះ បន្តថា ប្រសិនបើនៅតែមានការចាប់ខ្លួន និងចោទប្រកាន់ទៅលើពលរដ្ឋ ឬសកម្មជនទៀតនោះ កម្ពុជានឹងបាត់បង់ធនធានមនុស្ស និងអ្នកដែលហ៊ានបញ្ចេញមតិរិះគន់ដើម្បីស្ថាបនា នៅក្នុងសង្គម។ ការណ៍នេះ កញ្ញា គឹមសួ បានអំពាវនាវដល់រដ្ឋាភិបាល បើកលំហសេរីភាពបញ្ចេញមតិឡើងវិញ ដើម្បីឱ្យប្រជាពលរដ្ឋមានសិទ្ធិសេរីភាពពេញលេញនៅពេលដែលគាត់ចង់បង្ហាញនូវមតិយោបល់របស់ពួកគាត់ ស្របទៅតាមរដ្ឋធម្មនុញ្ញនៃព្រះរាជាណាចក្រកម្ពុជា។
សកម្មជនសង្គម លោក ខាន់ ចាន់ថន ដែលបានទៅស្តាប់ការប្រកាសសាលក្រមដែរនោះ បានលើកឡើងថា កញ្ញា ហ៊ីម មុំ ជាស្ត្រីម្នាក់ដែលសកម្មក្នុងការងារសង្គម ជាពិសេសពាក់ព័ន្ធនឹងបញ្ហាសិទ្ធិដីធ្លី បរិស្ថាន សិទ្ធិមនុស្ស និងចង់ឃើញប្រជាពលរដ្ឋខ្មែរ និងប្រទេសជាតិមានសុខសន្តិភាព ដែលការណ៍នេះ តុលាការមិនគួរមានការផ្តន្ទាទោសលើកញ្ញា ហ៊ីម មុំ ឡើយ។
លោកថា៖ «តុលាការមិនផ្តល់ភាពយុត្តិធម៌សម្រាប់គាត់ទេ ព្រោះអ្វីដែលគាត់ធ្វើគឺជាភាពស្អាតស្អំ និងត្រឹមត្រូវ គឺគាត់ធ្វើទៅតាមសិទ្ធិពលរដ្ឋដែលមានចែងក្នុងរដ្ឋធម្មនុញ្ញ»។
បើតាមរបាយការណ៍នៅដើមខែកញ្ញា ឆ្នាំ២០២៦ របស់អង្គការការពារសិទ្ធិមនុស្សលីកាដូ គិតមកដល់បច្ចុប្បន្ន មានពលរដ្ឋជាសកម្មជនសង្គម សិទ្ធិមនុស្ស បរិស្ថាន និងនយោបាយចំនួន ១១៧នាក់ ត្រូវបានចាប់ខ្លួនឃុំឃាំង និងផ្ដន្ទាទោសដាក់ពន្ធនាគារ ដោយសារការប្រើសិទ្ធិបញ្ចេញមតិរបស់ពួកគេ ក្នុងនោះក៏មានសកម្មជនសង្គម កញ្ញា ហ៊ីម មុំ ហៅ ខែម ស្រីមុំ ផងដែរ។
កាលពីថ្ងៃទី៣១ ខែកក្កដា ឆ្នាំ២០២៦នេះ ក្នុងសន្និសីទសារព័ត៌មានក្រោយបិទបញ្ចប់បេសកកម្មផ្លូវការនៅកម្ពុជា អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្ស លោក ថម អេនឌ្រូ (Tom Andrews) បានវាយតម្លៃថា កម្ពុជានៅតែប្រឈមបញ្ហាសិទ្ធិមនុស្សធ្ងន់ធ្ងរ ស្របពេលដែលមនុស្សជាង ១០០នាក់ កំពុងត្រូវបានឃុំខ្លួនដោយសារតែការអនុវត្តសិទ្ធិមូលដ្ឋាន ខណៈលំហនយោបាយ សេរីភាពបញ្ចេញមតិកាន់តែរួមតូច។ ត្រង់ចំណុចនេះ លោកសង្កត់ធ្ងន់ថា គ្មាននរណាម្នាក់គួរត្រូវជាប់ពន្ធនាគារ ដោយសារការអនុវត្តសិទ្ធិជាមូលដ្ឋានដោយសន្តិវិធីឡើយ៕
