ក្រសួងការងារ និងបណ្តុះបណ្តាលវិជ្ជាជីវៈ បានណែនាំដល់ម្ចាស់រោងចក្រ សហគ្រាស និងគ្រឹះស្ថានទាំងអស់ឱ្យសម្រួលបើកប្រាក់ឈ្នួល ដល់កម្មករនិយោជិត ឱ្យបានមុនឱកាសពិធីបុណ្យភ្ជុំបិណ្ឌខាងមុខនេះ ដើម្បីសម្រួលដល់ការចំណាយផ្សេងៗ នៅក្នុងការធ្វើដំណើរទៅស្រុកកំណើត។
នេះបើតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ «ស្តីពីការអនុវត្តឈប់សម្រាកក្នុងពិធីបុណ្យភ្ជុំបិណ្ឌ» ចុះថ្ងៃទី១ ខែតុលា ឆ្នាំ២០២៦។
ក្រសួងបានបញ្ជាក់នៅក្នុងលិខិតនោះថា កម្មករនិយោជិតទាំងអស់ ត្រូវបានអនុញ្ញាតឱ្យឈប់សម្រាកពីការងារចំនួន ៣ ថ្ងៃ គឺចាប់ពីថ្ងៃទី ១០ ដល់ថ្ងៃទី ១២ ខែតុលា ឆ្នាំ២០២៦ ដោយទទួលបានប្រាក់ឈ្នួលពេញ ក្នុងអំឡុងពិធីបុណ្យភ្ជុំបិណ្ឌ៕
