ប្រធានាធិបតីកូរ៉េខាងត្បូង លោក លី ជេម្យុង នៅថ្ងៃទី២ ខែតុលានេះ បានព្រមានចាត់វិធានការប្រឆាំងនឹងប្រទេសអ៊ុយក្រែន លុះត្រាតែក្រុងកៀវទទួលស្គាល់នូវអ្វីដែលក្រុងសេអ៊ូលនិយាយថា ជាកិច្ចព្រមព្រៀងរក្សាការសម្ងាត់លើការបញ្ជូនទាហានកូរ៉េខាងជើងពីរនាក់ ដែលត្រូវបានចាប់ខ្លួនមកកាន់កូរ៉េខាងត្បូង និងធ្វើការសុំទោស។
លោក លី បានសរសេរនៅក្នុងការបង្ហោះលើបណ្តាញសង្គម X ថា៖ «ប្រសិនបើការបដិសេធមិនទទួលស្គាល់ការពិត និងការចេញលិខិតសុំទោសជាសាធារណៈនៅតែបន្តកើតមាន យើងនឹងចាត់វិធានការបន្ថែម»។
លោក លី ក៏បានសម្តែង «ការសោកស្តាយយ៉ាងខ្លាំង» ចំពោះអ្វីដែលលោកបានពិពណ៌នាថា ជាការលើកឡើងរបស់អ៊ុយក្រែន អំពីការប៉ះទង្គិចគ្នាតាមផ្លូវយោធារវាងកូរ៉េខាងជើង និងកូរ៉េខាងត្បូង ដោយនិយាយថា វាស្មើនឹងការលើកទឹកចិត្តឱ្យមានសង្គ្រាមនៅលើឧបទ្វីបកូរ៉េ។
ក្រុងសេអ៊ូល និងក្រុងកៀវ បានជាប់គាំងនៅក្នុងជម្លោះការទូត ចាប់តាំងពីប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានប្រកាសនៅអង្គការសហប្រជាជាតិកាលពីខែមុនថា អ៊ុយក្រែនបានបញ្ជូនទាហានឈ្លើយសឹកកូរ៉េខាងជើងពីរនាក់ ដែលត្រូវបានចាប់ខ្លួនពេលប្រយុទ្ធឱ្យរុស្ស៊ី ទៅឱ្យកូរ៉េខាងត្បូង។ ក្រុងសេអ៊ូល បានចោទប្រកាន់ក្រុងកៀវថា បានរំលោភលើកិច្ចព្រមព្រៀងរក្សាការសម្ងាត់នៃការបញ្ជូននេះ ដើម្បីការពារទាហានទាំងនោះ ខណៈដែលមន្ត្រីអ៊ុយក្រែននិយាយថា មិនដែលមានកិច្ចព្រមព្រៀងបែបនេះទេ។
ទោះជាយ៉ាងណា ប្រព័ន្ធផ្សព្វផ្សាយបានរាយការណ៍ថា រដ្ឋមន្ត្រីការបរទេសអ៊ុយក្រែន លោក Andrii Sybiha កំពុងស្វែងរកការសម្របសម្រួលទំនាក់ទំនងជាមួយកូរ៉េខាងត្បូង ដោយបានប្រាប់អ្នកសារព័ត៌មានថា រឿងនេះគ្រាន់តែជា «ការយល់ច្រឡំផ្នែកការទូត» ប៉ុណ្ណោះ។
ជម្លោះនេះកើតឡើងចំពេលមានពេលវេលាដ៏រសើបសម្រាប់រដ្ឋបាលរបស់ លោក លី ដែលកំពុងព្យាយាមកាត់បន្ថយភាពតានតឹងជាមួយកូរ៉េខាងជើង និងកំពុងដោះស្រាយផលប៉ះពាល់ផ្នែកនយោបាយពីឧប្បត្តិហេតុគ្រាប់មីននៅ DMZ ផងដែរ។ អ្នកវិភាគនៅវិទ្យាស្ថានកូរ៉េសម្រាប់ការបង្រួបបង្រួមជាតិ បាននិយាយថា វិធានការបន្ថែមណាមួយទំនងជានឹងពាក់ព័ន្ធនឹងជំនួយមនុស្សធម៌ និងហិរញ្ញវត្ថុដែលកូរ៉េខាងត្បូងកំពុងផ្តល់ឱ្យអ៊ុយក្រែន។ លោកបានបន្ថែមថា អ៊ុយក្រែនមានអ្វីដែលត្រូវបាត់បង់ច្រើនជាងកូរ៉េខាងត្បូង ប៉ុន្តែគ្មានភាគីណាមួយទទួលបានផលប្រយោជន៍ពីការប្រឈមមុខដាក់គ្នាយូរអង្វែងនោះទេ ព្រោះកូរ៉េខាងត្បូង ក៏ត្រូវពឹងផ្អែកលើអ៊ុយក្រែនសម្រាប់ព័ត៌មានយោធារបស់កូរ៉េខាងជើងផងដែរ៕
