ការ​តស៊ូ​មតិ​របស់​អ្នក​ស្រី សែម សុខគា នៅ​​តំបន់​អន្ទង់​អាំង​ទទួល​បាន​ដំណោះ​ស្រាយ

បញ្ហា​វិវាទ​ដីធ្លី​​របស់​អ្នក​ស្រី សែម សុខគា នៅ​​តំបន់​អន្ទង់​អាំង​​ ​ឬ​ភ្នំ​១៥០០ ក្នុង​ស្រុក​​វាល​វែង​ ខេត្ត​ពោធិ៍​​សាត់​ ត្រូវ​បាន​​ដោះ​ស្រាយ​​បញ្ចប់​ហើយ ដោយ​​អ្នក​ស្រី​ព្រម​ទទួល​​យក​​ការ​​ដោះ​ដូរ​​​ដី​​ដែល​ជា​​គោល​​នយោ​​បាយ​​​របស់​រដ្ឋ ជា​​ថ្នូរ​​នឹង​​ការ​​​ប្រគល់​​ដី​របស់​អ្នក​ស្រី​ទៅ​​​ឱ្យ​​រដ្ឋ​គ្រប់​គ្រង និង​​រក្សា​​​ជា​តំបន់​​ទេស​ចរណ៍។

នេះ​​បើ​តាម​កំណត់​ហេតុ​សាកសួរ និង​ស្តាប់កា​របំភ្លឺ​របស់​អ្នកស្រី​ សែម សុខគា ដែលកត់ត្រាដោយ​ក្រសួ​ងយុត្តិ​ធ​ម៌ ក្នុង​កិច្ច​ប្រជុំ​រក​ដំណោះស្រាយ​លើបញ្ហាវិវាទ​​ដីធ្លី នៅតំបន់សហគមន៍​កា​រពារ​ធម្មជាតិ (តំបន់អភិរក្ស​​អន្ទង់អាំង) នៅ​ភូមិក្រហម ឃុំ​អន្លង់រាប ស្រុកវាលវែង​ ខេត្តពោធិ៍សាត់ របស់ក្រសួង​យុត្តិធម៌ នៅ​ថ្ងៃទី​០៦ ខែ​​តុលា ឆ្នាំ​២០២៦​នេះ។

ក្នុង​កំណត់ហេតុនោះ បានលើកឡើងថា អ្នកស្រី សែម សុខភា បាន​សុខចិត្ត​ប្រគល់ដី​ដែលគាត់​បាន​ទាម​ទារ​​​​ស្ថិត​នៅ​​តំបន់​អភិរក្ស​អន្ទង់អាំង និង​ដីមួយកន្លែងទៀត​​ដែល​កំពុង​តម្កល់នៅធនាគារ​ ប្រគល់ជូន​រដ្ឋ​វិញ និង​​សុខចិត្ត​ទទួល​​យក​នូ​វដីដែល​ជាគោលនយោបាយ​របស់​រដ្ឋ។

វីអូឌី មិនអាចសុំការ​បញ្ជាក់ជុំវិញបញ្ហានេះ ពីអ្នកស្រី សែម សុខគា ផ្ទាល់បានទេនៅរសៀល​ថ្ងៃ​អង្គារ​នេះ។

យ៉ាងណា​​ លោកនាយករដ្ឋមន្ត្រី ហ៊ុន ម៉ាណែត ក៏បានលើកឡើងក្នុងទំព័រ​ហ្វេសប៊ុក​របស់​លោក​ ដោយ​បាន​អរគុណ​ចំពោះ​អ្នកស្រី សែម សុខគា ដែល​បាន​ឆ្លើយតបនឹងកា​រអំពាវនាវរបស់លោក កាលពីថ្ងៃទី​១ ខែ​តុលា ដើម្បី​​ចូល​មក​ដោះ​ស្រាយ​​បញ្ហា​ដីធ្លីនេះ ​ហើយលោក​ក៏បាន​​​​អរគុណដល់មន្ត្រីក្រោម​ឱវាទ ដែលបានដោះ​ស្រាយ​​បញ្ហាដីធ្លី​នៅតំបន់​នេះ ស្រប​តាម​គោល​នយោ​បាយ​ឈ្នះ-ឈ្នះ​របស់​រដ្ឋាភិបាល។ 

លោក​បានគូស​បញ្ជាក់​ឡើង​វិញ​ដែរ​ថា តំបន់​អន្ទង់​អាំង ឬ​បុប្ផា​លាក់​ខ្លួន ​នៅ​ភ្នំ​១៥០០ នឹង​ត្រូវ​ថែ​រក្សា​ជាតំបន់​​សាធារណៈ​​របស់​រដ្ឋ ដោយ​នឹង​ត្រូវ​រៀបចំ​ដាំ​ដើ​ម​ឈើ​ឡើង​វិញ ក្នុង​គោល​ដៅប្រែ​​ក្លាយ​ទៅ​ជា​តំបន់​ទេស​ចរណ៍​ធម្មជាតិ សម្រាប់​ប្រជា​ពលរដ្ឋ និង​ទេស​ចរណ៍​អាច​ទៅ​កំសាន្ត​បាន។

គួររំលឹកថា ​កាលពីអំឡុង​ពាក់កណ្តាល​មីនា ឆ្នាំ​២០២៥ អាជ្ញាធរ​ខេត្ត​ពោធិ៍សាត់ បានដាក់កម្លាំងចុះ​​​​​​រុះ​រើ​​ផ្ទះ​ប្រជា​ពលរដ្ឋ​​​​​​ជាង ២០គ្រួសារ ឱ្យ​រាបដល់ដី នៅចំណុច​តំបន់​អន្ទង់អាំង ឬភ្នំ១៥០០ ក្នុង​​ឃុំ​អន្លង់​រាប ក្នុង​ស្រុកវាល​​​វែង ដោយ​​​​អាជ្ញាធរ​ចោទថាពលរដ្ឋ​ទាំងនោះថា ​រស់នៅ​ខុស​ច្បាប់​​​លើ​ដី​តំបន់​ការ​ពារ​បៃតង ខណៈ​ពលរដ្ឋ​មួយ​ចំនួន រួមទាំង​​អ្នក​ស្រី សែម សុខគា ផងដែរ បាន​​រង​ការ​ចោទប្រកាន់ថា ​បានទៅរុករានដីព្រៃ​​តំបន់ការ​ពារ​ដោយ​​ខុស​ច្បាប់​។

មកដល់ពេលនេះ ប្រជា​ពលរដ្ឋ​ដែលរ​ង​ការ​បណ្តេញ​ចេញ មានអ្នកខ្លះបាន​រត់​ភៀស​​​ខ្លួន​ទៅកាន់តំបន់ផ្សេង និងខ្លះទៀត​កំពុង​​ប្រឈមមុខនឹង​ការ​ចោទប្រកាន់​​​តាម​​​ប្រព័ន្ធ​តុលាការ ខណៈពលរដ្ឋមួយចំនួន​តូច បាន​ទៅរស់នៅតំបន់​ថ្មី ដែល​អាជ្ញាធរ​បានរៀបចំ​ឱ្យ នៅ​ឃុំប្រមោយ​ ស្រុកវាលវែង ដែលសង្គមស៊ីវិល​អះអាងថា មិនទាន់មានការ​រៀប​ចំ​ហេដ្ឋារចនាសម្ព័ន្ធគ្រប់គ្រាន់ មុនពេល​ជម្លៀស​ពលរដ្ឋ​ចេញ។ ​

សម្រាប់អ្នកស្រី សែម សុខគា ធ្លាប់បានអះអាងថា អ្នកស្រីបានទិញដីនៅតំបន់នោះ ​តពីគេ​​ទំហំ ១ហិកតា ដោយ​មាន​ប្លង់​រឹង​ និ​ងដី​២ហិកតាទៀត មានលិខិត​​ទិញ​លក់​ ទទួលស្គាល់ពីអាជ្ញាធរមូលដ្ឋាន កាលពីឆ្នាំ២០១៤ ​ប៉ុន្តែ​បែរ​ជា​អាជ្ញាធរ​​ថា​ជាដីតំបន់ការ​ពារ​ទៅ​វិញ និ​ង​បាន​ប្តឹង​​អ្នកស្រីទៅតុលាការ​​ ពីបទ រុករាន​ដីព្រៃតំបន់ការ​ពារថែមទៀត។ ការណ៍​នេះ បានធ្វើឱ្យ​អ្នកស្រីមិនសុខចិត្ត និង​បានតវ៉ា​តាំងពីនៅ​ថ្នាក់មូលដ្ឋាន រហូត​ដល់ក្រសួងស្ថាប័ននានានៅថ្នាក់​ជាតិ​ជាច្រើនលើកច្រើនសារ​ ដើម្បីទាមទារឱ្យ​មានដំណោះស្រាយ​សមរម្យសម្រាប់អ្នកស្រី៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ