សហជីព​​​មួយ​​ចំនួន​​រង​​ការ​​រិះ​គន់​​​ថា​​នៅ​​ខាង​​ក្រុម​ហ៊ុន​ មិន​​ការ​ពារ​​អត្ថ​ប្រយោជន៍​​កម្មករ

មិន​​ខុស​​ពី​​រាល់​​ឆ្នាំ​ សហជីព​​ភាគ​ច្រើន​​លើស​លប់​ តែង​​​នាំ​គ្នា​​បោះ​ឆ្នោត​​មិន​​ឱ្យ​​មាន​​ការ​​ដំឡើង​​ប្រាក់​​ឈ្នួល​​ដល់​​កម្មករ​ ខណៈ​​ការ​​ដំឡើង​ ២​ ដុល្លារ​ បែរ​ជា​​​ធ្វើ​ឡើង​​ដោយ​សារ​​ការ​​អន្តរា​គមន៍​​របស់​​នាយក​រដ្ឋ​មន្ត្រី។

ជាក់ស្ដែង​ នៅក្នុង​កិច្ចប្រជុំ​ចុងក្រោយ​របស់​ក្រុមប្រឹក្សា​ជាតិ​ប្រាក់ឈ្នួល​អប្បបរមា​ ដែល​មាន​សមាសភាព​​ត្រីភាគី​ កាល​​ពី​ថ្ងៃទី​​៣០​ ខែកញ្ញា​ សមាជិក​ភាគច្រើន​​ក្នុង​ចំណោម​សមាជិក​ក្រុមប្រឹក្សា​​សរុប​​ ៥១​ រូប​ បាន​បោះ​ឆ្នោត​​​គាំទ្រ​តួលេខ​​ប្រាក់​ឈ្នួល​​អប្បបរមា​ ២១០​ ដុល្លារ។ ក្នុង​នោះ​ សមាជិក​ចំនួន​ ៤៧​ រូប​ បាន​​បោះឆ្នោត​​គាំទ្រ​តួលេខ​ ២១០​ ដុល្លារ​​​ដដែល​ ពោល​គឺ​មិន​ដំឡើង​ប្រាក់ឈ្នួល​ ខណៈ​សមាជិក​ ៣​ រូប ​បាន​គាំទ្រ​តួលេខ​ ២២៥​ ដុល្លារ​​​ ដែល​ស្នើឡើង​ដោយ​​សហជីព​ និង​សន្លឹកឆ្នោត​មួយ​​មិនបាន​ការ។

បន្ទាប់ពី​ការ​បោះឆ្នោត​រួចមក​ រដ្ឋមន្ត្រី​ក្រសួង​ការងារ​ លោក ហេង សួរ ប្រាប់​អ្នកសារព័ត៌មាន​ថា​ លោក​នាយក​រដ្ឋមន្ត្រី ហ៊ុន ម៉ាណែត បាន​សម្រេច​បន្ថែម​ប្រាក់​ចំនួន​ ២​ ដុល្លារ​ ទៅលើ​​តួលេខ​ ២១០​ ដុល្លារ​ សម្រាប់​ឆ្នាំ​​២០២៧​​ កើនឡើង​ដល់​ ២១២​ ដុល្លារ។

ទោះបី​មាន​ឈ្មោះ​ថា​បាន​ដំឡើង​ប្រាក់ឈ្នួល​ និង​មាន​​ការ​ប្រៀបធៀប​ប្រាក់ឈ្នួល​កម្មករ​ខ្មែរ​ជាមួយ​ប្រទេស​ក្រីក្រ​ និង​​មធ្យម​​មួយ​ចំនួន​ជាហូរហែ​ ប៉ុន្តែ​អ្នកឃ្លាំមើល​ សហជីព​ រួមទាំង​សង្គម​ស៊ីវិល​ បាន​​លើក​ជា​ចម្ងល់​ និង​​ការ​សង្ស័យ​ថា​ តើ​សហជីព​​ទាំងនោះ​ត្រូវបាន​បង្កើត​ឡើង​ក្នុង​គោលបំណង​អ្វី​ឱ្យ​ប្រាកដ។

ក្រោយ​បញ្ចប់​ការ​បោះឆ្នោត​ដំឡើង​​ប្រាក់ឈ្នួល​នេះ​ដែរ​ សហជីព​មួយ​ចំនួន​​បាន​ផ្ដល់​​បទសម្ភាសន៍​​ដល់​ស្ថាប័ន​​សារព័ត៌​មាន​​ក្នុង​​ស្រុក​ ​ប្រាប់​​មិន​ឱ្យ​កម្មករ​ជឿ​លើ​មតិ​​ដែល​លើកឡើង​ជំរុញ​​ឱ្យ​មាន​ការ​ដំឡើង​ប្រាក់ខែ​ ដោយ​​ចោទ​ថា​មតិ​ទាំង​នោះ​​ជា​​ការ​រិះគន់​ ដើម្បី​ប្រយោជន៍​នយោបាយ​បក្ស​ប្រឆាំង។

ប្រធាន​​អង្គការ​ប្រជាធិបតេយ្យ​ខ្មែរ​ លោក ស៊ឹង សែន​ករុណា ប្រាប់​វីអូឌី​ថា​ បច្ចុប្បន្ន​មាន​សហជីព​តិចតួច​បំផុត​​ដែល​​មាន​​ភាព​ឯករាជ្យ​ ការពារ​ផលប្រយោជន៍​កម្មករ​ ខណៈ​សហជីព​មួយ​ចំនួន​មាន​ចរិត​ការពារ​ប្រយោជន៍​​ថៅកែ​ និង​រដ្ឋាភិបាល។ លោក​បន្ត​ថា​ វត្តមាន​​សហជីព​​ប្រភេទ​នេះ​ គឺជា​ឧបសគ្គ​សម្រាប់​កម្មករ​ក្នុង​ការ​ទាមទារ​​នូវ​សិទ្ធិ​ និង​ផលប្រយោជន៍​របស់​ខ្លួន​ ពិសេស​គឺ​ការ​ដំឡើង​ប្រាក់ឈ្នួល​នេះ​តែម្តង។

​លោក​គូសបញ្ជាក់​ថា​ ក្នុង​ស្ថានភាព​សេដ្ឋកិច្ច​កាន់តែ​មាន​​អតិផរណា​ ទំនិញ​ឡើងថ្លៃ​ កម្មករ​ត្រូវ​ពិនិត្យ​តាមដាន​​ទៅ​លើ​​អត្ត​ចរិត​សហជីព​ដែល​ខ្លួន​ជ្រើសរើស​ ដើម្បី​ធានា​ថា​ពួកគេ​ពិតជា​បាន​ការពារ​ផលប្រយោជន៍​កម្មករ​ពិតប្រាកដ​មែន។

លោក ស៊ឹង សែនករុណា ថ្លែងថា៖​ «យើង​(កម្មករ)​គប្បី​មាន​ការ​ពិនិត្យ​ទៅ​លើ​អ្នក​ដែល​ជា​តំណាង​របស់​យើង ដែល​ជា​ស​ហជីព​​ហ្នឹង ថា​ដើរ​តួ​បម្រើផ​លប្រ​យោជន៍​មក​ដល់​យើង​ឬ​អត់? ប្រសិន​ជា​មិន​បាន​ទេ គួរ​តែ​បញ្ឈប់​ក្នុង​ការ​គាំទ្រ ហើយ​ស្វះ​ស្វែង​រក​សហជីព​ណា​ដែល​មាន​ភាព​ឯករាជ្យ ហ៊ាន​ចេញ​មុខ​ទាម​ទារ​ការ​ពារ​នូវ​សិទ្ធិ និង​ផល​ប្រយោជន៍​​របស់​​កម្មករ​ពិត​ប្រាកដ អាហ្នឹង​ទើប​សិទ្ធិ និង​សេរី​ភាព និង​ផល​ប្រយោជន៍​ផ្សេងៗ​នឹង​អាច​ធ្លាក់​មក​ដល់​ពួក​គាត់»។

បញ្ហា​ប្រាក់ឈ្នួល​ទាប​ បាន​បង្ក​បញ្ហា​ប្រឈម​ជាច្រើន​ដល់​ការ​រស់នៅ​ និង​សុខភាព​របស់​កម្មករ។

បើ​តាម​អង្គការ​សង់ត្រាល់ ​បាន​ឱ្យ​ដឹង​ថា​ គ្រួសារ​កម្មករ​កាត់ដេរ​ចំនួន​ ៧៥%​​ ជំពាក់​បំណុល​ ហើយ​កម្មករ​ចំនួន​ ៥៦%​ ពឹងផ្អែក​លើ​ការ​ធ្វើ​ការងារ​បន្ថែម​ម៉ោង។ ជា​លទ្ធផល​ គ្រួសារ​របស់​កម្មករ​ត្រូវបាន​បង្ខំចិត្ត​កាត់បន្ថយ​​ការ​ចំណាយ​លើ​ម្ហូបអាហារ​ និង​ការ​អប់រំ​ ដើម្បី​ទូទាត់​ថ្លៃ​ចំណាយ​សម្រាប់​ការ​រស់នៅ។

តាមរយៈ​បញ្ហា​ប្រឈម​នេះ​ ក្រុម​អង្គការ​សង្គម​ស៊ីវិល ​បាន​អំពាវនាវ​នៅ​មុន​ការ​ប្រជុំ​សម្រេច​​ទៅកាន់​ក្រុមប្រឹក្សា​​ជាតិ​​ប្រាក់ឈ្នួល​អប្បបរមា​ និង​បាន​ដាក់​លិខិត​ស្នើសុំ​ជា​ថ្មី​ម្តងទៀត​ ​នៅ​ថ្ងៃទី​​​៥​ ខែតុលា​ ស្នើ​ឱ្យ​រដ្ឋាភិបាល​ពិចារណា​ឡើងវិញ​​ លើ​​ការ​ដំឡើង​ប្រាក់ឈ្នួល​ ផ្អែក​​លទ្ធផល​នៃ​ការ​ស្ទង់មតិ​ឆ្នាំ​​២០២៦​ អំពី​ការ​ចំណាយ​​​របស់​គ្រួសារ​ក្នុង​ចំណោម​កម្មករ​​កម្ពុជា​ ព្រមទាំង​បាន​ទាមទារ​ឱ្យ​មាន​ការ​ដំឡើង​​ប្រាក់ឈ្នួល​អប្បបរមា​​ដល់​កម្រិត​ ២៥០,៦៦​​ ដុល្លារ​អាមេរិក។

ប្រធាន​សហព័ន្ធ​សហជីព​កម្ពុជា​ (CATU) អ្នកស្រី យ៉ាង សុភ័ណ្ឌ បញ្ជាក់​ថា​ តួលេខ​នេះ​ គឺ​កើតឡើង​ពី​ការ​​ចង់បាន​របស់​​កម្មករ​ និង​ផ្អែក​លើ​ស្ថានភាព​សេដ្ឋកិច្ច​បច្ចុប្បន្ន​ ដើម្បី​ផ្ដល់​ជីវភាព​សមរម្យ​មួយ​ដល់​កម្មករ​និយោជិត។ អ្នកស្រី​បន្ត​​​​ថា​ តាមរយៈ​ការ​បោះឆ្នោត​ក្រុមប្រឹក្សា​ជាតិ​ប្រាក់ឈ្នួល​អប្បបរមា​ វា​គឺជា​សេរីភាព​ក្នុង​ការ​សម្រេចចិត្ត​​របស់​សហជីព​​នីមួយៗ​ តែ​វា​ក៏​បង្ហាញ​ឱ្យ​ឃើញ​ថា​តើ​សហជីព​ណា​ជា​សហជីព​ដែល​ជួយ​​កម្មករ​​ពិតប្រាកដ​ ហើយ​សហជីព​ណា​បម្រើ​​ឆន្ទៈ​របស់​កម្មករ​ពិតប្រាកដ។

អ្នកស្រី យ៉ាង សុភ័ណ្ឌ ថ្លែងថា៖​ «អញ្ចឹងបើសិនជាអាច គួរតែរកវិធីសាស្ត្រ ឬក៏​រក​មធ្យោ​បាយ​ណា​នៅ​ក្នុង​ការ​គិត​គូរ នៅ​ក្នុង​ការ​ដំឡើង​ជូន​កម្មករ​សារ​ជា​ថ្មី ឬ​ក៏​​រក​មធ្យោ​បាយ​ក្នុង​ការ​ដោះ​ស្រាយ​បែប​ណា ដើម្បី​ធានា​នូវ​ការ​រស់​នៅរបស់​​កម្មករ​និយោ​ជិត។ ព្រោះ​ធម្មជា​ទូទៅ អ្នក​ដែល​មាន​សិទ្ធិ​នៅ​ក្នុង​ការ​ដំឡើង​ប្រាក់​ឈ្នួល​ជូន​កម្មករ​និយោ​ជិត គឺ​មាន​តែ​ប្រធាន​ក្រុម​ប្រឹក្សា​ជាតិ​ប្រាក់​ឈ្នួល​អប្បបរមា រួម​ទាំង​ប្រមុខ​រាជ​រដ្ឋា​ភិបាល គឺ​សម្តេច​ធិបតី​ហ្នឹង​ឯង ដែល​លោក​មាន​សិទ្ធិ​នៅ​ក្នុង​ការ​សម្រេច​ទៅ​លើ​ប្រាក់​ឈ្នួល​អប្បបរមា​របស់​កម្មករ​ថា តើ​ឆ្នាំ​២០២៧ ប្រាក់​ឈ្នួល​ប៉ុន្មាន ទើប​​អាច​​ឱ្យ​កម្មករ​និយោជិត​ហ្នឹង រ​ស់​នៅ​សមរម្យ ថ្លៃ​ថ្នូរ​ជា​មនុស្ស​នៅ​ក្នុង​​សង្គម»។

មន្ត្រី​ស៊ើបអង្កេត​ជាន់ខ្ពស់​នៃ​សមាគម​ការពារ​សិទ្ធិមនុស្ស​ លោក យី សុខសាន្ត លើក​ឡើង​​ថា​ ការ​ដំឡើង​ប្រាក់ឈ្នួល​​ឱ្យ​កម្មករ​មិន​អាច​​​ធ្វើឱ្យ​ពួកគេ​ក្លាយជា​អ្នកមាន​ឡើយ​ ដោយ​វា​អាច​​ជួយ​ត្រឹម​ធ្វើឱ្យ​ពួកគេ​មាន​ជីវភាព​​រស់នៅ​សមរម្យ​ ពិសេស​មាន​អាហារ​​ហូបចុក​ដែល​មាន​អាហាររូបត្ថម្ភ​ត្រឹមត្រូវ។ លោក​បន្ត​ថា​ ការ​ប្រៀប​​ធៀប​ប្រាក់ឈ្នួល​ជាមួយ​ប្រទេស​ផ្សេង​​ដែល​ទាបជាង​កម្ពុជា​ គឺ​មិនមែន​ជា​ដំណោះស្រាយ​ឡើយ​ តែ​វា​​អាច​​ធ្វើឱ្យ​ប៉ះពាល់​ដល់​រូបភាព​វិនិយោគ​ក្នុង​ប្រទេស​ផងដែរ។

លោក យី សុខសាន្ត ថ្លែងថា៖​ «អញ្ចឹងបើសិនជាចង់ឱ្យកម្មករមានកម្លាំងពលំ​​សម្រាប់ជួយ​ទៅ​រដ្ឋាភិ​​បាល​ ក្នុង​ការ​ធ្វើ​គេ​​ហៅ​ថា​រោង​ចក្រ​សហគ្រាស​ល្អ មិន​ប៉ះ​ពាល់​ដល់​សុខ​ភាព​របស់​គាត់ គួរ​តែ​ពិចារណា​ទៅ​លើ​ការ​ដំឡើង​ប្រាក់​ខែ​ដល់​​ពួក​​គាត់! ការ​ស្នើ​សុំ​របស់​គាត់​នេះ ខ្ញុំ​ជឿ​ថា វា​មិន​ហួស​ហេតុ​ពេក​ទេ សម្រាប់​ត្រឹម​ ២៥០ អី​ហ្នឹង វា វា​មិន​គ្រប់​គ្រាន់​​ទេ ប៉ុន្តែ​វា​ល្អ​ជាង ២១២ សម្រាប់​ឆ្នាំ២០២៧»។

ក្នុង​សេចក្តីថ្លែងការណ៍​​​រួម​របស់​សហជីព​​ និង​សង្គម​ស៊ីវិល​ជាង​ ៧០​ ស្ថាប័ន​​ ចេញផ្សាយ​ថ្ងៃទី​៥​ ខែតុលា​ បាន​​លើក​ឡើង​​​​ដែរ​​​ថា​ ការ​​បោះ​ឆ្នោត​​របស់​​សមា​ជិក​​ភា​គ​ច្រើន​ ​លើសលប់​លើ​ការ​រក្សា​តួលេខ​ ២១០​ ដុល្លារ​អាមេរិក​ និង​​ការ​ចេញ​សេចក្តី​សម្រេច​ភ្លាមៗ​​​នៅ​ថ្ងៃ​ដដែល​ ប្រកាស​យក​តួលេខ​ ២១០​ ដុល្លារ​អាមេរិក​ ក្នុង​មួយ​​ខែ​ ​ជា​ប្រាក់ឈ្នួល​អប្បបរមា​សម្រាប់​ឆ្នាំ​​២០២៧​ នាំ​ឱ្យ​មាន​វិមតិសង្ស័យ​ជុំវិញ​ឯករាជ្យភាព​ តម្លាភាព​ សុចរិត​ភាព​​ និង​ប្រសិទ្ធភាព​ក្នុងការ​បំពេញ​តួនាទី​របស់​ក្រុមប្រឹក្សា​ជាតិ​​ប្រាក់ឈ្នួល​អប្បបរមា។

លិខិត​រួម​ដដែល ​បន្ត​ថា​ ការ​ដំឡើង​ចំនួន​ ២​ ដុល្លារ​​អាមេរិក​នេះ​ មាន​កម្រិត​ទាប​ខ្លាំង​បើ​ប្រៀបធៀប​ជាមួយ​សំណើ​​របស់​​សហព័ន្ធ​សហជីព​ តាមរយៈ​លិខិត​ចុះ​នៅ​ថ្ងៃទី​​១៤​ ខែកញ្ញា​ ឆ្នាំ​ ២០២៦​ ផ្ញើ​ជូន​រដ្ឋមន្ត្រី​ក្រសួង​​​​ការងារ​ និង​ជា​ប្រធាន​ក្រុមប្រឹក្សា​ជាតិ​ប្រាក់ឈ្នួល​អប្បបរមា​ ដែល​ស្នើ​ដំឡើង​ប្រាក់ឈ្នួល​ចំនួន​ ២៥០,៦៦​ ដុល្លារ។

សំណើ​របស់​សហព័ន្ធ​សហជីព​ក្នុងការ​ដំឡើង​​ប្រាក់ឈ្នួល​អប្បបរមា​ចំនួន​ ២៥០,៦៦​ ដុល្លារ​នេះ​ ទទួលបាន​ការ​គាំទ្រ​យ៉ាង​ច្រើន​​ពី​សហព័ន្ធ​សហជីព​ និង​អង្គការ​សង្គម​ស៊ីវិល​ប្រមាណ​ជាង​ ១០០​ ស្ថាប័ន​តាមរយៈ​សេចក្តី​ថ្លែងការណ៍​រួម​ ព្រម​ទាំង​ទទួលបាន​ការ​គាំទ្រ​ពី​អង្គការ​អន្តរជាតិ​ រួមមាន​ សម្ព័ន្ធ​ប្រាក់ឈ្នួល​អាស៊ី​ (Asia Floor Wage Alliance) និង​សម្ព័ន្ធ​​យុទ្ធនាការ​សម្លៀកបំពាក់​ស្អាត​ (Clean Clothes Campaign) ផងដែរ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ