ពលរដ្ឋជាង ២០០គ្រួសារ រស់នៅភូមិពូទុង ឃុំចុងផ្លាស់ ស្រុកកែវសីមា បង្ហាញពីភាពអយុត្តិធម៌ និងការធ្វើទុក្ខបុកម្នេញរបស់អាជ្ញាធរ បំផ្លាញក្តីសុខរបស់អ្នកភូមិដែលរស់នៅលើដីភូមិកំណើតច្រើនជំនាន់មកហើយ។
អ្នកភូមិថា តំបន់ព្រៃមាសជាផ្នែកមួយក្នុងតំបន់មេសំ មានទំហំជាង ៤០ហិកតា ដែលសហគមន៍តែងតែទៅរែងរ៉ែមាសលក្ខណៈគ្រួសារច្រើនឆ្នាំមកហើយ កំពុងប្រឈមការបណ្តេញចេញដោយបង្ខំ។
តំណាងសហគមន៍ភូមិចុងផ្លាស់ លោក ច្រាយ ឡូន បារម្ភថា អ្នកភូមិស្ទើរតែគ្រប់ក្រុមគ្រួសារមានរណ្តៅរែងរ៉ែមាសផ្ទាល់ខ្លួន នៅតំបន់ព្រៃមាស ហើយពលរដ្ឋខ្លះទៀត បានសង់ផ្ទះនៅទីតាំងនោះ កំពុងប្រឈមការបណ្តេញចេញដោយបង្ខំ ប៉ះពាល់ប្រភពចំណូល និងធ្លាក់ខ្លួនក្រីក្រ។ លោកថា នៅរយៈពេល ២ថ្ងៃដើមសប្តាហ៍នេះ សហគមន៍បានលើកគ្នាតវ៉ា នៅសាលាឃុំចុងផ្លាស់ ដោយស្នើឱ្យអាជ្ញាធរឃុំផ្តល់សិទ្ធិឱ្យសហគមន៍មានសិទ្ធិរែងរ៉ែមាសឡើងវិញ តែគ្មានដំណោះស្រាយនៅឡើយទេ។
លោក ច្រាយ ឡូន និយាយថា៖ «គេយកដីកន្លែងតំបន់ព្រៃមាសហ្នឹងទាំងអស់អញ្ចឹងណា។ ទាំងវត្តអីប្រហែលអនាគតក៏គេរុញចោលដែរ។ រ៉ែមាសគេទើបមកធ្វើថ្មី ចិនគេហៅអីទេ ឧកញ៉ាអីទេ»។
ក្រសួងរ៉ែ បានអនុញ្ញាតឱ្យក្រុមហ៊ុនចិនមួយឈ្មោះ អេធិច ផៅវ័រ ឯ.ក (APEX POWER CO,.LTD) ធ្វើប្រតិបត្តិការធនធានរ៉ែមាស លើផ្ទៃដីជិត ២ពាន់ហិកតា (១ ៩៥៧ហិកតា) ស្ថិតនៅតំបន់មេសំ ឃុំចុងផ្លាស់ ស្រុកកែវសីមា ខេត្តមណ្ឌលគិរី មានរយៈពេល ៥ឆ្នាំ តាមអាជ្ញាប័ណ្ណចុះថ្ងៃទី៦ ខែឧសភា ឆ្នាំ២០២៦។ នេះបើយោងតាមសេចក្ដីប្រកាសរបស់មន្ទីររ៉ែ និងថាមពល។ ខ្លឹមសារក្នុងលិខិតនោះ តម្រូវឱ្យអនុវត្តច្បាប់លើអាជីវកម្មរ៉ែមាស របស់ពលរដ្ឋទ្រង់ទ្រាយតូចៗ រាប់រយគ្រួសារ ស្ថិតលើដីដែលក្រសួងរ៉ែផ្តល់សិទ្ធិឱ្យក្រុមហ៊ុនចិនវិនិយោគ។
នៅដើមសប្តាហ៍នេះ អ្នកភូមិជាង ២០០នាក់ បានតវ៉ានៅសាលាឃុំចុងផ្លាស់ស្នើឱ្យអាជ្ញាធរអនុញ្ញាតឱ្យសហគមន៍រែងមាសលក្ខណៈគ្រួសារ ជាពិសេសស្នើឱ្យអាជ្ញាធរដោះស្រាយសំណង ប៉ះពាល់ផ្ទះសម្បែងឱ្យសមរម្យ លើគម្រោងពង្រីកប្រឡាយស្តារបរិស្ថាននេះ។
ពលរដ្ឋតវ៉ា និយាយថា៖ «លក់ដីខ្លួនឯង ក៏មិនឱ្យប្រជាជនធ្វើ រស់ទាំងវេទនា! ហេតុអីយកច្បាប់មកគាបសង្កត់ប្រជាជនទេ»។
វីអូឌី មិនទាន់អាចទាក់ទងប្រធានមន្ទីររ៉ែ និងថាមពលខេត្តមណ្ឌលគិរី លោក ទី សុផល និងអភិបាលខេត្តមណ្ឌលគិរី លោក គង់ គឹមនី បាននៅឡើយទេ គិតត្រឹមម៉ោងផ្សាយនេះ។
ទោះយ៉ាងណា នាយករងរដ្ឋបាលខេត្តមណ្ឌលគិរី លោក ឈិត សុផល បានប្រាប់សារព័ត៌មានសម្ព័ន្ធអ្នកសារព័ត៌មានកម្ពុជា (CamboJA) ថា គម្រោងស្ដារបរិស្ថានរបស់ក្រុមហ៊ុន APEX POWER CO,.LTD នឹងដំណើរការតាមសេចក្ដីប្រកាសរបស់ក្រសួងរ៉ែ។ លោកថា គម្រោងនេះ មិនទាន់ចាប់ផ្ដើមនៅឡើយ ហើយការទាមទាររបស់ពលរដ្ឋ អាជ្ញាធរនឹងដោះស្រាយ ប្រសិនបើប៉ះចំដីកម្មសិទ្ធិស្របច្បាប់។
ប្រជាសហគមន៍ជនជាតិដើមភាគតិចព្នងខេត្តមណ្ឌលគិរី លោក គ្រើង តុលា ស្នើឱ្យអាជ្ញាធររកដំណោះស្រាយបញ្ហាដីធ្លីនេះជូនពលរដ្ឋឱ្យត្រឹមត្រូវ និងតម្លាភាព ដោយធ្វើយ៉ាងណាឱ្យពលរដ្ឋមានលំនៅឋានច្បាស់លាស់ និងប្រាក់ចំណូលប្រចាំថ្ងៃ។
លោកថា៖ «ក្នុងនាមជាអាជ្ញាធរមូលដ្ឋានហ្នឹង គួរតែគិតគូររឿងហ្នឹងឱ្យខ្ពស់ ធ្វើម៉េចគាត់មានដំណោះស្រាយរឿងដីធ្លីរបស់គាត់ហ្នឹងឱ្យបាន ១០០ ភាគរយ ដើម្បីឱ្យគាត់រស់បាន»។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមអាដហុក លោក យិន ម៉េងលី យល់ថា មុននឹងអនុវត្តគម្រោង អាជ្ញាធរត្រូវផ្តល់សំណង និងដោះស្រាយផលប៉ះពាល់ឱ្យបានសមរម្យជាមុនសិន។ លោកថា អាជ្ញាធរគួរទុកដីចំណែកខ្លះក្នុងតំបន់ណាមួយ ដើម្បីឱ្យសហគមន៍ អាចប្រកបរបរលក្ខណៈប្រពៃណីចិញ្ចឹមជីវិត។
លោក យិន ម៉េងលី ថ្លែងថា៖ «ដោះស្រាយនូវចំណែកណាមួយទៅឱ្យពួកគាត់ដើម្បីបញ្ចប់បញ្ហា កុំឱ្យបញ្ហាហ្នឹងវា វែងឆ្ងាយទៀត។ ហើយក៏វាជាការអភិរក្សមួយដែរ ដែលគេចង់ទៅមើលថាតើប្រពៃណីរបស់ខ្មែរយើង ឬក៏ជនជាតិដើមភាគតិច ទាក់ទងនឹងការរែង រែងមាស រែងត្បូងគេធ្វើរបៀបម៉េច។ ហ្នឹងក៏ល្អដែរ បង្រៀនបច្ចេកទេសដល់ប្រជាពលរដ្ឋទៅ នៅក្នុងការការពារបរិស្ថានដែរ»។
អាជ្ញាធរខេត្តមណ្ដលគិរី ឱ្យដឹងថា ការសិក្សាពីផលប៉ះពាល់បរិស្ថាន (EIA) លើគម្រោងអាជីវកម្មរ៉ែមាស របស់ក្រុមហ៊ុនចិន អេធិច ផៅវ័រ ឯ.ក (APEX POWER CO., LTD.) ត្រូវបានធ្វើឡើងរួចរាល់ហើយ។ ចំណែកសហគមន៍ចាត់ទុកថា ការសិក្សាផលប៉ះពាល់ EIA របស់អាជ្ញាធរនៅតែខ្វះចន្លោះច្រើននៅឡើយ៕









