បញ្ហាសៀងបម្រុងទុក និងកង្វះទឹកប្រើប្រាស់ របស់យោធាការពារនៅសមរភូមិ​ជួរមុខ នៅតែជាបញ្ហាចម្បង នារដូវក្ដៅ​ហួត​ហែង ដែលក្រុមទាហាននៅតំបន់ថ្មដូន ក្រុងសំរោង ខេត្តឧត្ដរមានជ័យ បានអះអាងដូចៗគ្នាថា ពួកគេកំពុងត្រូវការទឹកផឹកជាចាំបាច់ ព្រោះតំបន់នេះនៅជាប់នឹងព្រំដែនខ្មែរថៃ ហើយស្ថិត​នៅជាតំបន់ក្រហម បន្ទាប់ពីយោធា​ថៃ​បានប្រើយន្តហោះទម្លាក់គ្រាប់ និងផ្លោងគ្រាប់បែកធំៗជាច្រើន បំផ្លាញទ្រព្យសម្បត្តិ ផ្ទះសម្បែងពលរដ្ឋ​ជាច្រើននៅទីនោះ។

ពលរដ្ឋដែលរងគ្រោះពីការឈ្លានពាន​របស់​ថៃ ឱ្យដឹងទាំងក្តីបារម្ភថា ពួកគេ​រង​សម្ពាធពីមន្ត្រីនៅមូលដ្ឋាន មិនឱ្យទម្លាយរឿងពិតពីបញ្ហាដែលកើតឡើងពីការឈ្លានពានរបស់ថៃនោះទេ ទាំងការបញ្ចេញមតិ ឬបង្ហោះវីដេអូលើបណ្តាញសង្គម អំពីស្លាកស្នាមនៃការឈ្លាន​ពានរ​បស់​ថៃ រួមទាំងរូបភាពយោធា​ថៃបន្តឈ្លាន​ពាន​ទឹកដីខ្មែរក្តី។