វៀតណាម និយាយថា កិច្ចព្រមព្រៀងរបាំងពន្ធគយជាមួយអាមេរិក បាន​ឈាន​ដល់​កិច្ច​ព្រម​ព្រៀង​ហើយកាលពីថ្ងៃ​ពុធ ដែលកិច្ចព្រមព្រៀងនេះ ធ្វើឡើងមុនថ្ងៃកំណត់ របស់ប្រធានា​ធិបតី​​សហរដ្ឋ​អាមេរិក លោក ដូណាល់ ត្រាំ ដែលលោក ត្រាំ ទុកពេលចរចា​៩០​ថ្ងៃ ហើយ​ឱកាសនៃការចរចានឹងផុតនៅថ្ងៃ​ទី៩ ខែកក្កដានេះ។

សមាជិកសភាវៀតណាមថ្មីៗនេះ បានអនុម័តផ្លាស់ប្តូរច្បាប់សញ្ជាតិ ដើម្បីឱ្យពលរដ្ឋខ្លួនអាចកាន់សញ្ជាតិបានពីរ រួមទាំងបរទេសចូលមកធ្វើការនៅប្រទេសខ្លួន ខណៈមេដឹកនាំព្យាយាមទាក់ទាញការវិនិយោគ និងកម្មករ ដែលមានជំនាញ​ចូលក្នុងប្រទេសខ្លួន។ នេះ​បើ​យោង​តាម​នីគីអាស៊ី(Nikkei Asia)។

សហរដ្ឋអាមេរិក បានចាប់ផ្តើមគំនិតផ្តួចផ្តើមការពារធនធានរ៉ែសំខាន់ៗ ជាមួយ​អូស្រ្តាលី ឥណ្ឌា និងជប៉ុនជាផ្នែកមួយនៃកិច្ចខិតខំប្រឹងប្រែង ដើម្បីទប់​ទល់​នឹងមហាអំណាចចិន ទោះបីអាមេ​រិក និងចិន កំពុងតានតឹងដោយជម្លោះពាណិជ្ជកម្ម និងការខ្វែងគំនិតគ្នាផ្សេងទៀតក៏ដោយ។ នេះបើតាមប្រភព​ពីព័ត៌មានរ៉យទ័រ។

រដ្ឋមន្រ្តីការបទេសមកពីប្រទេសទាំង៧ ដែលហៅថា ជីសេវិន(G7) បាននិយាយ​ថា ពួកគេគាំទ្របទឈប់បាញ់រវាងអ៊ីស្រាអែលនិងអ៊ីរ៉ង់ ដែលបានជំរុញឱ្យមានការចរចាឡើងវិញ ដើម្បីជំរុញឱ្យមានការដោះស្រាយកម្មវិធីនុយក្លេអ៊ែរអ៊ីរ៉ង់។

តុលាការធម្មនុញ្ញរបស់ថៃ បានព្យួរនាយករដ្ឋមន្ត្រី ផែថងថាន ពីតំណែងដែលរង់ចាំការស៊ើបអង្កេតដោយក្រមសីលធម៌លើការបែកធ្លាយតាមទូរស័ព្ទជាមួយមេដឹកនាំជាន់ខ្ពស់កម្ពុជាម្នាក់។ នេះបើតាមសេចក្តីរាយការណ៍របស់សារព័ត៌មាន អេភី(AP)។

ប្រធានាធិបតីអ៊ុយក្រែន លោក វ្លាឌីមៀរ ហ្សេឡេនស្គី បានអំពាវនាវសុំការគ្រាំទ្រ​បន្ថែម ពីក្រុងវ៉ាស៊ីនតោន ខណៈអ្នក​បើក​យន្តហោះ អេហ្វ ១៦(F-16) របស់ខ្លួនបានស្លាប់ក្នុងឧប្បទ្ទវហេតុធ្លាក់ កំឡុងពេលវាយប្រហារតាមអាកាសរបស់រុស្សី។

ក្រុមអ្នកគាំទ្រលទ្ធិប្រជាធិបតេយ្យដ៏សកម្មចុងក្រោយនៅហុងកុង ត្រូវបានគេរាយការណ៍ថា នឹងប្រកាសរំសាយដោយខ្លួនឯង ដោយសារតែរង‘‘សម្ពាធនយោបាយដ៏ធំ’’ ដែលបានកើតឡើងរយៈពេលប្រាំឆ្នាំ ដោយទុកឱ្យទីក្រុងនេះគ្រប់គ្រងដោយប្រទេសចិន មិនមាន​វត្តមានអ្នកនយោបាយបែបគាំទ្រប្រជាធិបតេយ្យផ្លូវការទៀតនោះទេ។ នេះតាមសេចក្តីរាយការណ៍របស់ រ៉យទ័រ។

ប្រធានាធិបតី វ្លាឌីមៀ ពូទីន នឹងមិនធ្វើដំណើរទៅចូលរួមក្នុងកិច្ចប្រជុំកំពូល ប្រ៊ីក(BRICS)ទេ នៅសប្តាហ៍ក្រោយនេះ ដោយមានដីកាមួយចេញដោយតុលាការឧក្រិដ្ឋកម្មអន្តរជាតិអាយស៊ីស៊ី(ICC)ហៅស៊ើបសួរ។ នេះបើតាមសេចក្តីរាយការណ៍ដោយសារព័ត៌មានរ៉យទ័រ(Reuters)។