ស្របពេលដែលអង្គការជាតិ និងអន្តរ​ជាតិ​ចំនួន ៧០ស្ថាប័ន រួមគ្នាស្នើផ្ទាល់ទៅកាន់លោកនាយករដ្ឋមន្ត្រី ហ៊ុន ម៉ាណែត ទាមទារដោះលែងសកម្មជនមាតាធម្ម​ជាតិ​ទាំង ៥នាក់នោះ អ្នកឃ្លាំមើលស្ថានការណ៍​នយោបាយនៅកម្ពុជា ក៏ចង់ឃើញ​អាជ្ញាធរសម្រេចដោះលែងពួកគេដូចគ្នា។ អ្នកឃ្លាំមើលថា បើអាជ្ញាធរដោះលែងពួកគេពិតមែន វាគឺជាសារដ៏សំខាន់​បង្ហាញប្រាប់អន្តរជាតិថា កម្ពុជាចង់បើកលំហប្រជាធិបតេយ្យឡើងវិញ។

អ្នកឃ្លាំមើល និយាយថា កម្ពុជាក្លាយជាជម្រកឧក្រិដ្ឋកម្មអនឡញ ជាកំហុសរបស់​មេដឹកនាំកំពូល ក្រោយ វាយបំបែកកញ្ចក់សង្គម ដើម្បីក្រាញអំណាចតពូជ ធ្វើឱ្យកម្ពុជាស្អុយឈ្មោះលើឆាកអន្តរជាតិ ដែលចាំបាច់ត្រូវទទួលស្គាល់ការពិត ហើយ​ប្រញាប់កែលម្អ ទើបអាចស្តារមុខមាត់កម្ពុជាបាន។

ជាមួយនឹងការសាទរចំពោះការលើកលែងទោសជាប់ពន្ធនាគារដល់ លោក កឹម សុខា អ្នកឃ្លាំមើល បានជំរុញឱ្យលោក ហ៊ុន សែន និងលោក ហ៊ុន ម៉ាណែត គួរត្រូវផ្តល់សិទ្ធិធ្វើនយោបាយដល់​អតីតមេបក្សប្រឆាំងរូបនេះវិញ និងត្រូវដោះលែងអ្នកទោសមនសិការទាំងអស់ជាង ១០០នាក់ ដែលកំពុងជាប់ឃុំទាំងអយុត្តិធម៌ក្នុងពន្ធនាគារ ដើម្បីឱ្យមានការផ្សះផ្សានិងរួបរួមជាតិខ្មែរពិតប្រាកដឡើងវិញ។

គណបក្សក្រៅរដ្ឋាភិបាលមួយចំនួន ដែល​គេដឹងថា មាននិន្នាការប្រជាធិប​តេយ្យ​នោះ ជំរុញឱ្យបក្សកាន់អំណាចផ្តល់សិទ្ធិ​ធ្វើនយោបាយឡើងវិញឱ្យ លោក កឹម សុខា ដើម្បីបង្ហាញពីឆន្ទៈស្តារប្រជាធិបតេយ្យ តាមការចង់បានរបស់ប្រជាពលរដ្ឋ និងបំណងអន្តរជាតិ ទោះពួកគេបានសាទរចំពោះការលើកលែងទោស ពីប្រមុខរដ្ឋស្តីទីលោក ហ៊ុន សែន ក្តី។

អ្នកឃ្លាំមើល អះអាងថា លោក ហ៊ុន សែន កំពុងបង្កើតឈុតឆាកថ្មីដើម្បីបោកប្រាស់ពលរដ្ឋថា រដ្ឋាភិបាលនៃក្រុមគ្រួសាររបស់លោកជាជនរងគ្រោះដោយក្រុមឧក្រិដ្ឋជនអនឡាញ។ ទន្ទឹមនឹងនេះ ពួកគេទាមទារឱ្យរដ្ឋាភិបាលដឹកនាំដោយ លោក ហ៊ុន ម៉ាណែត បង្ហាញតម្លាភាព និងត្រូវចាត់វិធានការមិនលើកលែង​ចំពោះបុគ្គលដែលត្រូវបានអាមេរិកដាក់​ក្នុងបញ្ជីខ្មៅ មានលោក ហ៊ុន តូ ជាដើម។