ប្រភពមួយចំនួនបានឱ្យដឹងនៅថ្ងៃអង្គារនេះថា ប្រធានាធិបតីអាមេរិក លោក ចូ បៃឌិន ក្នុងរយៈពេលប៉ុន្មាន​ថ្ងៃខាងមុខនេះ​ ត្រូវបានរំពឹងថានឹងប្រកាសផ្ដល់កញ្ចប់ជំនួយ​យោធា​មួយ​ផ្សេង​ទៀត​សម្រាប់​អ៊ុយក្រែន ​ក្នុង​ទំហំ​ដូច​គ្នា​ទៅ​នឹង​ជំនួយ [៨០០លានដុល្លារ] ដែលត្រូវបានប្រកាសកាលពីសប្ដាហ៍មុន។

សេតវិមានបានឱ្យដឹងថា ប្រធានាធិបតីអាមេរិក លោក ចូ បៃឌិន នៅថ្ងៃអង្គារនេះ នឹងរៀបចំជំនួបមួយតាម​រយៈ​ប្រព័ន្ធអនឡាញជាមួយសម្ព័ន្ធមិត្តរបស់ខ្លួននានា ដើម្បីពិភាក្សាអំពីវិបត្តិនៅអ៊ុយក្រែន រួម​ទាំងសកម្ម​ភាព​ដែល​ត្រូវ​អនុវត្ត​ ដើម្បី​ឱ្យ​រុស្ស៊ី​ទទួល​ខុសត្រូវលើករណីនេះផងដែរ។

ប្រធានាធិបតីអាមេរិក លោក ចូ បៃឌិន បានឱ្យដឹងនៅថ្ងៃព្រហស្បតិ៍ម្សិលមិញថា ក្នុងករណីដែលប្រទេស​រុស្ស៊ី​ប្រើប្រាស់អាវុធគីមីក្នុងការឈ្លានពានអ៊ុយក្រែ​ន​នោះ សហរដ្ឋអាមេរិក​នឹង​ចាត់​វិធាន​ការដើម្បីឆ្លើយ​តប។

ប្រធានាធិបតីអាមេរិក លោក ចូ បៃឌិន លើកឡើងថា ​​​រុស្ស៊ីគួរតែត្រូវដកចេញពីក្រុមប្រទេស​មានសេដ្ឋកិច្ចជឿនលឿនទាំង២០ (G20) ខណៈដែលប្រធានបទនេះ​ត្រូវបានលើកឡើងក្នុងអំឡុងពេលកិច្ចប្រជុំរបស់​លោក​ជាមួយ​មេដឹកនាំពិភព​លោក​នានា ដែលធ្វើឡើងក្នុងទីក្រុង ព្រុចសែល (Brussels) កាល​ពីថ្ងៃ​ព្រហស្បតិ៍។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Reuters។

ទីប្រឹក្សាសន្តិសុខជាតិរបស់សេតវិមាន លោក Jake Sullivan បានឱ្យដឹងនៅថ្ងៃអង្គារម្សិលមិញថា ប្រធានាធិបតីសហរដ្ឋអាមេរិក លោក ចូ បៃឌិន និងសមភាគីអឺរ៉ុប នឹងប្រកាសពីការដាក់ទណ្ឌកម្មថ្មីបន្ថែមទៀតលើប្រទេសរុស្ស៊ី និងវិធានការថ្មីទាំងឡាយក្នុងការរឹតបន្តឹងទណ្ឌកម្មដែល​មាន​ស្រាប់ ក្នុងអំឡុង​ដំណើរ​របស់លោកទៅកាន់ទីក្រុង ព្រុចសែល (Brussels) ក្នុងសប្ដាហ៍នេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។