បទយកការណ៍៖ មុខរបរស្ករត្នោតនៅក្នុងភូមិមួយប្រឈមការបាត់បង់ដោយសារពុំមានអ្នកបន្តវេន
ភូមិត្រពាំងធំ ឃុំរនាម ស្រុកទ្រាំង ខេត្តតាកែវ ជាភូមិមួយដែលមានពលរដ្ឋស្ទើរតែសឹងគ្រប់ផ្ទះបាននាំគ្នាប្រកបមុខរបរធ្វើស្ករត្នោតដើម្បីចិញ្ចឹមជីវិត ចាប់តាំងពីជីដូនជីតាតមកដល់កូនចៅ។ ប៉ុន្តែពេលនេះ អ្នកភូមិត្រពាំងធំ ជាពិសេសយុវជន ហាក់បីដូចជាមិនចាប់អារម្មណ៍នឹងបន្តវេនធ្វើមុខរបរប្រពៃណី និងជាអត្តសញ្ញាណរបស់ខ្មែរនេះទៀតទេ ដោយផ្ទះខ្លះបានសម្រេចបោះបង់មុខរបរនេះជាបន្តបន្ទាប់។