ធនាគារជាតិនៃកម្ពុជា ព្រមានដាក់ទណ្ឌកម្មលើម្ចាស់គ្រឹះស្ថានឥណទានជនបទទាំងអស់ ដែលនៅតែបន្តទទួលយកលិខិតយថាភូត ដូចជា អត្តសញ្ញាណបណ្ណ សៀវភៅគ្រួសារ ឬសៀវភៅស្នាក់នៅ ពីកូនបំណុលដើម្បីជាថ្នូរសម្រាប់ជាវត្ថុធានាលើការផ្ដល់ឥណទាន។
ក្នុងលិខិតរបស់ធនាគារជាតិដែលវីអូឌីទទួលបាននៅថ្ងៃនេះបានឱ្យដឹងថា អត្តសញ្ញាណបណ្ណ សៀវភៅគ្រួសារ ឬសៀវភៅស្នាក់នៅ ជាប្រភេទលិខិតយថាភូតដែលចេញដោយអាជ្ញាធរមានសមត្ថកិច្ចសម្រាប់បញ្ជាក់អត្តសញ្ញាណបុគ្គល និងសម្រង់ស្ថិតិប្រជាពលរដ្ឋ ហើយលិខិតយថាភូតនេះ មិនមែនជាទ្រព្យសម្រាប់ការដាក់បញ្ចាំ ឬជាទ្រព្យធានាក្នុងប្រតិបត្តិការផ្តល់ឥណទាន និងមិនមានតម្លៃសេដ្ឋកិច្ចសម្រាប់សកម្មភាពពាណិជ្ជកម្មឡើយ។
ករណីនេះ ធនាគារជាតិកម្ពុជា បានប្រាប់ទៅ គ្រឹះស្ថានធនាគារនិងហិរញ្ញវត្ថុ និងគ្រឹះស្ថានឥណទានជនបទទាំងអស់ត្រូវបញ្ឈប់ជាបន្ទាន់ ចំពោះសកម្មភាពនេះ។
ក្នុងលិខិតដដែលបញ្ជាក់ថា បើគ្រឹះស្ថានឥណទានធនាគារ និងហិរញ្ញវត្ថុ និងគ្រឹះស្ថានឥណទានជនបទណា មិនអនុវត្តតាមច្បាប់ និងបទបញ្ញត្តិជាធរមាន គ្រឹះស្ថាននឹងត្រូវរងទណ្ឌកម្មខាងវិន័យស្របតាមមាត្រា៥២ នៃច្បាប់ស្តីពីគ្រឹះស្ថានធនាគារជាតិ និងហិរញ្ញវត្ថុ។
មាត្រា ៥២ នៃច្បាប់ស្តីពីគ្រឹះស្ថានធនាគារជាតិ និងហិរញ្ញវត្ថុ បានចែងថា ប្រសិនបើគ្រឹះស្ថានប្រតិស្រុតបានប្រព្រឹត្តល្មើសនឹងបញ្ញត្តិនៃច្បាប់ ឬនៃបទបញ្ជាស្តីពីសកម្មភាពរបស់ខ្លួន ឬប្រសិនមិនបានធ្វើតាមការដាស់តឿន ឬប្រសិនមិនបានធ្វើតាមអធិបញ្ជា អាជ្ញាធរ អាណាព្យាបាលអាចសម្រេចដាក់តាមនីតិវិធីដែលធ្វើចំពោះមុខសាមីខ្លួន នូវទណ្ឌកម្មខាងវិន័យដូចជា ការព្រមាន ការស្តីបន្ទោស ការហាមធ្វើប្រតិបត្តិការមួយចំនួន នឹងការកំណត់ព្រំដែនដទៃទៀត ក្នុងការធ្វើសកម្មភាព ការព្យួរមុខងារជាបណ្តោះអាសន្ន។ ចំពោះអ្នកដឹកនាំម្នាក់ ឬច្រើននាក់ដោយមាន ឬដោយគ្មានការតែងតាំងអភិបាលបណ្តោះអាសន្ន និងឈានដល់ការដកហូតអាជ្ញាបណ្ណជាស្ថាពរ និងការដាក់ឱ្យជម្រះបញ្ជីជាបន្ទាន់។
ប្រធានផ្នែកទំនាក់ទំនងនៃសមាគមមីក្រូហិរញ្ញវត្ថុកម្ពុជា(CMA) លោក កាំង តុងងី មានប្រសាសន៍ថា ការជូនដំណឹងរបស់ធនាគារជាតិកម្ពុជា ប្រាប់ទៅម្ចាស់គ្រឹះស្ថានឥណទានជនបទទាំងអស់ ឱ្យឈប់បន្តទទួលយកលិខិតយថាភូត [ច្បាប់ដើម] ពីកូនបំណុល ដើម្បីជាថ្នូរសម្រាប់ជាវត្ថុធានាលើការផ្ដល់ឥណទាន មិនមែនជារឿងថ្មីនោះទេ ។
លោកបញ្ជាក់ថា សម្រាប់សមាគមមីក្រូហិរញ្ញវត្ថុកម្ពុជា សង្កេតឃើញថា គ្រឹះស្ថានមីក្រូហិរញ្ញវត្ថុ ដែលជាសមាជិករបស់ខ្លួន បានអនុវត្តតាមការណែនាំរបស់ធនាគារជាតិ គឺមិនដែលយកលិខិតយថាភូត [ច្បាប់ដើម] ពីកូនបំណុល ដើម្បីតម្កល់ទុកនោះទេ ពីព្រោះឯកសារនេះ មិនមានតម្លៃជាលុយ សម្រាប់គ្រឹះស្ថានទេ។ ប៉ុន្តែគ្រឹះស្ថានតម្រូវឱ្យកូនបំណុលកូបពីឯកសារយថភូតតម្កល់ទុកនៅស្ថាប័នកម្ចីរបស់ខ្លួនតែប៉ុណ្ណោះ។
លោក កាំង តុងងី បន្តថា ការយកលិខិតយថាភូត ពីកូនបំណុល ដើម្បីតម្កល់ទុកមិនមានអ្វីចំណេញដល់គ្រឹះស្ថានមីក្រូហិរញ្ញវត្ថុនោះទេ អាចបង្កហានិភ័យថែមទៀតផង។ ប៉ុន្តែលោកសង្កេតឃើញថា មានតែអ្នករកស៊ីឯកជនមួយចំនួនតែប៉ុណ្ណោះ ដែលយកលិខិតយថាភូត ពីកូនបំណុល ដើម្បីទុកជាវត្ថុធានាលើការផ្ដល់ឥណទានរបស់ពួកគេ។
លោកមានប្រសាសន៍ថា៖ «អ្វីដែលខ្ញុំសង្កេតឃើញទីផ្សារផ្តល់កម្ចីបច្ចុប្បន្ននេះ អ្នករកស៊ីឯកជន ក្រុមបញ្ចាំ ដែលពួកគាត់មិនមានអាជ្ញាបណ្ណ យើងឃើញពួកគាត់យកលិខិតយថាភូត [ច្បាប់ដើម] ពីកូនបំណុល ។ ចំណែក គ្រឹះស្ថានមីក្រូហិរញ្ញវត្ថុដែលមានច្បាប់ត្រឹមត្រូវមិនធ្វើបែបហ្នឹង [មិនយកលិខិតយថាភូត [ច្បាប់ដើម] ពីកូនបំណុលនោះទេ»។
កាលពីថ្ងៃទី២៧ ខែមករា ឆ្នាំ២០២៣ ធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ បានចេញសេចក្តីថ្លែងការណ៍រួមមួយដោយ ប្រកាសចាត់វិធានការច្បាប់ទៅលើអ្នកផ្ដល់កម្ចីខុសច្បាប់ដែលយកអត្រាការប្រាក់ខ្ពស់ និងការផ្សព្វផ្សាយនានាពាក់ព័ន្ធនឹងការផ្តល់សេវាហិរញ្ញវត្ថុដោយគ្មានច្បាប់អនុញ្ញាត។
សេចក្តីថ្លែងការណ៍រួមបានលើកឡើងថា នាពេលថ្មីៗនេះ មានសកម្មភាពផ្សព្វផ្សាយ និងផ្តល់សេវាហិរញ្ញវត្ថុក្រៅផ្លូវការ ជាពិសេសសេវាឥណទានតាមរយៈទូរសព្ទ បណ្ដាញសង្គម និងអនឡាញ យ៉ាងអនាធិបតេយ្យដោយគ្មានច្បាប់អនុញ្ញាតត្រឹមត្រូវពីធនាគារជាតិនៃកម្ពុជា ដែលបានធ្វើឱ្យសាធារណជនមានការភ័ន្តច្រឡំ។
សេចក្តីថ្លែងការណ៍បន្តថា ករណីនេះក៏បានបង្កផលវិបាកជាច្រើនទៅលើសេដ្ឋកិច្ច និងសង្គម ដោយសារតែជនទាំងនោះបានយកអត្រាការប្រាក់ខ្ពស់ហួសហេតុ ការគំរាមកំហែងបំភិតបំភ័យ ការអនុវត្តកិច្ចសន្យាមិនសុចរិតដោយបង្កប់នូវការកេងចំណេញហួសហេតុពីអ្នកខ្ចីប្រាក់ ដែលបណ្តាលឱ្យប៉ះពាល់ដល់ជីវភាពរស់នៅរបស់ប្រជាពលរដ្ឋ និងធ្វើឱ្យធ្លាក់ក្នុងបន្ទាក់បំណុលច្រើនលើសលុប ព្រមទាំងបាត់បង់ទំនុកចិត្តលើស្ថាប័នធនាគារនៅកម្ពុជាផងដែរ៕
