មន្ត្រីសង្គមស៊ីវិល ជំរុញឱ្យតុលាការដោះលែង កញ្ញា ឈឹម ស៊ីថរ ឱ្យមានសេរីភាពវិញជាបន្ទាន់ និងគ្មានលក្ខខណ្ឌ ដោយថា ការចាប់ខ្លួនប្រធានសហជីពប្រចាំក្រុមហ៊ុនណាហ្គាវើលដ៍រូបនេះ ជាការគំរាមកំហែងសិទ្ធិសេរីភាពសហជីព និងជាសារព្រមានដល់ក្រុមកូដករណាហ្គាវើលដ៍មិនឱ្យចេញតវ៉ាទាមទារសិទ្ធិការងារដែលធានាដោយច្បាប់។
កូដករក្រុមហ៊ុនណាហ្គាវើលដ៍អះអាងថា ប្រធានសហជីពរបស់ពួកគេប្រចាំក្រុមហ៊ុនល្បែងនេះ គឺ កញ្ញា ឈឹម ស៊ីថរ ត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារព្រៃស រាជធានីភ្នំពេញ នៅរសៀលថ្ងៃទី២៦ ខែវិច្ឆិកា ក្រោយពេលសមត្ថកិច្ចចាប់ខ្លួនកញ្ញានៅព្រឹកថ្ងៃដដែល ពាក់ព័ន្ធបទល្មើសបម្រាម ឬគេចវេសពីការត្រួតពិនិត្យរបស់តុលាការ។
សមត្ថកិច្ចរាជធានីភ្នំពេញអះអាងថា ពួកគេពិតជាបានចាប់ខ្លួនប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ នៅព្រឹកថ្ងៃទី២៦ ខែវិច្ឆិកា ប្រាកដមែន និងបានបញ្ជូនប្រធានសហជីពរូបនេះ ទៅកាន់សាលាដំបូងរាជធានីភ្នំពេញ ដើម្បីបន្តនីតិវីធី ដ្បិតការចាប់ខ្លួននោះធ្វើឡើងតាមដីការបស់ចៅក្រមស៊ើបសួរពាក់ព័ន្ធល្មើសបម្រាមរបស់តុលាការ។
VOD គឺជាស្ថាប័នព័ត៌មានឯករាជ្យដែលផ្តល់ព័ត៌មាន ផលិតកម្មវិធីវិទ្យុ និងការផ្សព្វផ្សាយតាមរយៈគេហទំព័រអ៊ីនធើណេត។
© ២០២២ រក្សាសិទ្ធិគ្រប់យ៉ាងដោយ ស៊ីស៊ីអាយអឹម
