លោកនាយករដ្ឋមន្រ្តី ហ៊ុន សែន នៅថ្ងៃទី៨ ខែមិនាដែលជាទិវាសិទ្ធិនារីអន្តរជាតិ បានបង្ហាញក្តីបារម្ភថាកម្ពុជានៅតែប្រឈមនឹងករណីរំលោភនិងសម្លាប់ក្មេងស្រី ដោយលោកថានេះបណ្តាលមកពីការធ្លាក់ចុះនូវសីលធម៌សង្គម។លោក ហ៊ុន សែន បានថ្លែងថាលោកឯកភាពនឹងរដ្ឋមន្រ្តីក្រសួងកិច្ចការនារីដែលបានលើកយកករណីរំលោភនិងសម្លាប់ក្មេងស្រីជាបញ្ហាព្រួយបារម្ភដែលត្រូវដោះស្រាយបន្តទៀត។ លោកមានប្រសាសន៍ថា៖ “អំពើហិង្សាលើស្រ្តីនិងក្មេងស្រី ពិសេសការំលោភហើយសម្លាប់ដែលភាគច្រើនប្រព្រឹត្តដោយក្រុមយុវជន ដែលបញ្ហាទាំងនេះមានទំនាក់ទំនងទៅនឹងការធ្លាក់ចុះនៃសីលធម៌សង្គម កង្វះការយល់ដឹងអំពីតម្លៃរបស់ស្រ្តី ការរើសអើងចំពោះស្រ្តីនិងភាពភ្លើតភ្លើនទៅតាមសម្ភារៈនិយម ការប្រើប្រាស់បច្ចេកវិទ្យានិងបណ្តាញសង្គមខុសទិសដៅ”។