លោក សម រង្ស៊ី សង្ឃឹមថ្មីទៀតថាកម្ពុជានឹងមានការផ្ទេរអំណាចដូចប្រទេសភូមា

ប្រធានគណបក្សសង្គ្រោះជាតិ លោក សម រង្ស៊ី ដែលកំពុងនិរទេសខ្លួននៅក្រៅប្រទេស បង្ហាញក្តី​សង្ឃឹ​ម​ជាថ្មីទៀតថា​កម្ពុជានឹងមានការផ្ទេរអំណាចដោយសន្តិវិធី ដូចប្រទេសភូមាក្រោយ​បោះឆ្នោ​តឆ្នាំ២​០​១៨​​ បើទោះ​​បីពេលនេះលោកកំពុងប្រឈ​មនឹងពាក្យប​ណ្តឹងជាច្រើ​នពីបក្ស​​កាន់អំណាចក៏ដោយ។

លោក សម រង្ស៊ី បាននិរទេសខ្លួនម្តងទៀតទៅក្រៅប្រទេសគេចចេញពីការតាមចាប់ខ្លួនរបស់​តុលា​​ការ តាមពាក្យបណ្តឹង​របស់អតីតរដ្ឋមន្ត្រីក្រសួងការបរទេស លោក ហោ ណាំហុង និង​បណ្តឹងថ្មីមួយទៀតពីមន្ត្រីបក្សកាន់អំណាច ទាក់ទិននឹ​ងការរិះគន់ហ្វេសប៊ុក​របស់​នាយករដ្ឋមន្តី្រ។

លោក សម រង្ស៊ី បានសរសេរលើបណ្តាញសង្គមរបស់​លោកនៅ​ថ្ងៃទី៩ ខែ​មេសា​នេះ​ថានៅឆ្នាំ២០១៨ ប្រទេ​ស​កម្ពុជានឹងដើរតាមគំរូដែលប្រទេសភូមា(ឬមីយ៉ាន់ម៉ា)កំពុង​តែ​ប​​ង្ហាញនៅឆ្នាំ២០១៦នេះ។

​​លោក សម រង្ស៊ី លើកឡើងបែបមានជំនឿទៀតថាកម្ពុជា​នឹងធានាឲ្យ​មាន​ការផ្ទេរអំ​ណាចដោ​យសន្តិវិធី បន្ទា​ប់ពីកម្លាំ​ងប្រ​ជាធិប​តេយ្យ​​​ទទួលបានជ័យជម្នះ​ក្នុងការបោះឆ្នោតមួយដែលឆ្លុះ​បញ្ចាំង​ឆ​ន្ទៈប្រ​ជារាស្ត្រ​ពិ​តប្រា​កដ។

​ទោះជាយ៉ាងណា មេបក្សប្រឆាំងដែលកំពុងនិរទេសខ្លួនរូបនោះមិនបានបញ្ជាក់ថាតើមានយ​ន្ត​​កា​រអ្វីខ្លះដែលធ្វើឲ្យគណបក្សកាន់អំណាចនៅកម្ពុជាផ្ទេរអំណាចដោយសន្តិវិធីនៅកម្ពុជាដូចប្រទេសភាភូមាទេ​ ដោយគ្រាន់តែសំអា​ងទៅលើច​រន្តប្រវត្តិ​​សា​​​ស្ត្រក្នុ​​ងពិ​ភព​លោ​ក ដែល​លោ​ក​ថាគ្មាននរណាអាចទប់ស្កាត់បាន។​

កន្លងទៅមេបក្សប្រឆាំងលោក សម រង្ស៊ី និងមេដឹកនាំបក្សកាន់អំណាច លោក ហ៊ុន សែន ធ្លាប់បង្ហាញភាពស្និទ្ធ​ស្នាល ដោយបានបង្កើតឲ្យមានកម្មវិធីអាហាររួមគ្នាជាលក្ខណៈ​គ្រួសារ ការទៅចូលរួមមហាសង្រ្កាន្ត​ជាមួយគ្នាក្នុងពិធីបុណ្យចូលឆ្នាំខ្មែរ នៅខេត្តសៀមរៀប។ ប៉ុន្តែក្រោយមក មេដឹកនាំទាំងពីរបានវាយបកគ្នាដោយពាក្យសម្តីខ្លាំងៗ រហូតលោក សម រង្ស៊ី ត្រូវបានប្រធានរដ្ឋ​សភា លោក ហេង សំរិន ប្រកាសថាមេបក្ស​ប្រឆាំងរូបនោះ​អស់អភ័យឯ​ក​សិ​ទ្ធិជាអ្នកតំណាងរាស្រ្តមណ្ឌលកំពង់​ចាម។​

ចំណែកឯមេដឹកនាំគណបក្សកាន់អំណាចវិញ ក៏ធ្លាប់អះអាងដូចគ្នាថានៅអាណត្តិក្រោយនេះ ពួកគេនៅតែបន្តឈ្នះការបោះឆ្នោត បានគ្រប់គ្រងអំណាចដដែលទៀត តាមរយៈ​យន្តការធ្វើ​កំ​​ណែ​ទម្រង់ ការពង្រឹងយន្តការឆ្លើយតប ទៅនឹងកង្វល់របស់ប្រជាពលរដ្ឋ៕