គណបក្សសង្គ្រោះជាតិ ចោទអាជ្ញាធរស្រុកមង្គលបូរី ខេត្តបន្ទាយមានជ័យថា បានរារាំង និងដកយកឧបករណ៍បំពងសំលេងរបស់ពួកគាត់ ដោយមិនពួកគាត់ឲ្យរៀបចំវេទិការសាធារណៈជាមួយប្រជាពលរដ្ឋ។
តំណាងរាស្ត្រគណបក្សសង្គ្រោះជាតិ លោក ស ចាន់ដេត មានប្រាប់វីអូឌីនៅថ្ងៃនេះថា លោកបានរៀបចំវេទិការសាធារណៈចំនួនពីកន្លែងនៅក្នុងស្រុកមង្គលបូរី តែវេទិការទាំងពីកន្លែងត្រូវបានអាជ្ញាធររារាំងពួកគាត់មិនឲ្យរៀបចំឡើយ ។ លោកថា អាជ្ញាធរតម្រូវឲ្យពួកគាត់សុំច្បាប់ តែលោកគណបក្សបានជូនដំណឹងទៅអាជ្ញាធរមុននឹងរៀបចំវេទិការនេះ ។
លោកថា៖”គាត់និយាយថាមានសុំច្បាប់ៗ ហើយយើងអត់មានសុំច្បាប់ព្រោះនៅក្នុងនីតិវិធី គេឲ្យតែជូនដំណឹងតើ គេអតឲ្យសុំច្បាប់ទេ ហើយណាមួយយើងធ្វើនៅទីស្នាក់ការយើង ស្នាក់ការបក្សរបស់យើងមានស្លាក់ទាំងអស់ ហើយគេគ្រាន់តែឲ្យជូនដំណឹង តែគេថាយើងអត់សុំច្បាប់ គេនិយាយតែប៉ុណ្ណឹងថា អត់សុំច្បាប់ សំអាងគេតែប៉ុណ្ណឹង”។
លោក ស ចាន់ដេត បន្តថា បន្ទាប់ពីមានការរាំងពួកគាត់ក៏នាំគ្នាមកប្រជុំនៅទីស្នាក់បក្សវិញ តែត្រូវអាជ្ញាធរស្រុកមករំខាន ដោយមិនឲ្យពួកគាត់ប្រជុំឡើយ។
លោកថា ៖”លូវគេមិនឲ្យប្រជុំទៀត ចៅហ្វាយស្រុកអីគេនៅអង្គុយព្រាតនៅក្នុងអង្គប្រជុំយើង ហើយទៅប្រជុំម៉េចកើត យើងប្រជុំផ្ទៃក្នុងរបស់យើងហ្នឹង ចឹងឲ្យសូមឲ្យមតិជាតិ និងអន្តរជាតិ មើលទៅថាស្ថានការ លូវមិនស្រួលទេ ហើយពីព្រឹកមិញខ្ញុំយល់ថា ប្រហែលជាមកពី អាជ្ញាធរនៅហ្នឹង គាត់អត់យល់ ប៉ុន្តែបើលើកនេះមិនមែនទេ គឺជាផែនការរបស់គណបក្សប្រជាជនដែលគេធ្វើចឹងហើយ”។
មន្ត្រីគណបក្សសង្គ្រោះជាតិម្នាក់ លើកឡើងថា អាជ្ញាធរបានរារាំង ដកយកមេក្រូ និងបាននិយាយគំរាម ដោយមិនឲ្យរៀបចំវេទិការសាធារណៈនេះទៀត ។
លោកថា៖” គេមកគំរាមកំហែងយើង រារាំងបីថ្ងៃជាប់គ្នាហើយ ព្រឹកគេមករំខានភូមិផ្សេង ហើយវេទិការហ្នឹងគឺជូនដំណឹងដើម្បីជូបជាមួយប្រជាពលរដ្ឋ ម្ចាស់ឆ្នោត ដែលគាត់មានបញ្ហាអ្វីមួយចឹងយើងឲ្យគាត់មកជួយគ្នាដែលមានអ្នកតំណាងរាស្រ្តជាសមាជិកព្រឹទ្ធផងដែរ”។
វីអូឌីមិនអាចសុំការអត្ថាធិប្បាយពីមន្រ្តីអាជ្ញាធរស្រុកមង្គលបូរីបាននៅឡើយទេ។
មន្រ្តីការពារសិទ្ធិមនុស្សនៃសមាគមអាដហុកប្រចាំខេត្តបន្ទាយមានជ័យលោក ស៊ុំ ចាន់គា សម្ដែងការសោកស្ដាយចំពោះករណីនេះ ដោយលោកចាត់ទុកការរារាំងរបស់អាជ្ញាធរធ្វើឡើងដោយខុសច្បាប់។
លោកថា៖”សូមឲ្យអាជ្ញាធរ ជាពិសេសភ្នាក់ងារបស់រដ្ឋគឺពិនិត្យទៅលើច្បាប់បាតុកម្មដោយសន្តិវិធី ច្បាប់ហ្នឹងមិនមែនឲ្យសុំការអនុញ្ញាទេ គឺអនុញ្ញាតឲ្យជូនដំណឹង ឲ្យអ្នកដែលធ្វើជូនដំណឹងប៉ុន្តែបើធ្វើនៅក្នុងកន្លែងរបស់ខ្លួនទីកន្លែងរបស់ខ្លួន ទីកន្លែងរបស់បក្សអីហ្នឹង គឺជាឯកជន គឺអត់ត្រូវអ្នកណាមួយទៅយាយីទៅរារាំង ទេ មិនឲ្យគេធ្វើទេ។ ចឹងបើសិនជាការធ្វើ ហើយបើគេធ្វើហើយត្រូវបានយើងទៅរារាំង ទៅយាយីទៅបំភិតបំភ័យ ឬទៅប៉ះពាល់កន្លែងគេ មានន័យថាទី១ ទៅលើរំលោភសិទ្ធិឋានរបស់គេ ទី២ ខ្លួនបានប្រើអំណាច រដ្ឋាបាលហួសហេតុមានន័យថាផ្ដាច់ការហើយ”។
