បុរសម្នាក់ទៀតដែលគេឃើញថាបានព្រួតគ្នាវាយតំណាងរាស្ត្រគណបក្សប្រឆំាងកាលពីឆ្នាំ២០១៥នោះ ត្រូវបានតំឡើងឋានន្តរស័ក្តិពីស័ក្ត៥ទៅដល់ផ្កាយមួយ ខណៈបុរសរូបនោះត្រូវបានកាត់ទោស៤ឆ្នាំ តែទោសនៅសល់៣ឆ្នាំត្រូវបានភ្ជួរទោស។
កាលពីចុងឆ្នាំ២០១៥ មានបុរសមួយក្រុមក្នុងនោះ ដែលគេស្គាល់ថា មានអង្គរក្សលោកនាយករដ្ឋមន្ត្រី ហ៊ុន សែន ៣នាក់ គឺលោក សុត វណ្ណី និងលោក ម៉ៅ ហឿន និងលោក ឆាយ សារិទ្ធ បានចេញមុខសារភាពថា ពួកគេបានព្រួតគ្នាវាយទាត់ធាក់អ្នកតំណាងរាស្ត្រពីររូបរបស់គណបក្សសង្គ្រោះជាតិ គឺលោក គង់ សភា និងលោក ញ៉យ ចំរើន។
ក្រោយពីតុលាការដោះលែង លោក សុត វណ្ណី និងលោក ម៉ៅ ហឿន ត្រូវបានលោកនាយករដ្ឋមន្ត្រី ហ៊ុន សែន តម្លើងឋានន្តរស័ក្តិ ពីថ្នាក់វរសេនីយ៍ទោ(ស័ក្ត៤កន្លះ) ទៅវរសេនីយ៏ឯក(ស័ក្ត៥)។
បន្ថែមពីនេះទៀត ក្នុងព្រះរាជក្រឹត្យកាលពីខែវិច្ឆិកា ឆ្នាំ២០១៦ ដែលទើបត្រូវបានផ្សព្វផ្សាយថ្មីៗនេះ បង្ហាញថា លោក ឆាយ សារិទ្ធ ត្រូវបានដំឡើងឋានៈពីវរសេនីយ៍ឯក(ស័ក្ត៥)ទៅជាឧត្តមសេនីយ៍ត្រី (ផ្កាយមួយ) ខណៈតុលាការកាត់ទោស៤ឆ្នាំ តែព្យួរទោស៣ឆ្នាំទៀត បន្ទាប់ពីជាប់ពន្ធនាគារបានតែមួយឆ្នាំ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ យល់ថាការដំឡើងឋានន្តរស័ក្តិដល់អង្គរក្សលោក ហ៊ុន សែន ម្នាក់ទៀត ជាការផ្តួចផ្តើមពីមន្ត្រីថ្នាក់ក្រោម ដោយលោកថានេះបង្ហាញឲ្យឃើញពីគំរូមិនល្អ នឹងធ្វើឲ្យពលរដ្ឋអស់ជំនឿលើកការដឹកនាំរបស់រដ្ឋាភិបាល។ លោកមានប្រសាសន៍ថា៖ «ការដំឡើងឋានៈដែលផ្តល់ជូនដោយជនដែលធ្លាប់ប្រព្រឹត្តអំពើហិង្សាជាសាធារណៈ គឺជាគំរូអាក្រក់មួយ ហើយនាំឲ្យមហាជនគេមើលឃើញអំពីចំណុចខ្សោយនៅក្នុងការដឹកនាំ នៅក្នុងជួរកងប្រដាប់អាវុធ»។
មេធាវី សុក សំអឿន មានប្រសាសន៍ថានៅក្នុងច្បាប់មិនបានចែងហាមមិនឲ្យដំឡើងដំឡើងឋានន្តរស័ក្តិដល់បុគ្គលដែលត្រូវបានតុលាការកាត់ទោសនោះទេ ប៉ុន្តែលោកថាការដំឡើងឋានន្តរស័ក្តិដល់អង្គរក្សរបស់លោក ហ៊ុន សែន នៅពេលនេះអាចធ្វើឲ្យពលរដ្ឋមួយចំនួនពិចារណាក្នុងការបោះឆ្នោតនៅឆ្នាំ២០១៨ខាងមុខនេះ។ លោកយល់ថា៖ «រឿងចឹងវាអាចធ្វើឲ្យមានការប៉ះពាល់ មានឥទ្ធិពលទៅលើលទ្ធផលនៃការបោះឆ្នោត អ្នកបោះឆ្នោតអាចមានការដូរចិត្ត ជួនកាលសន្លឹកឆ្នោតថយចុះ អាចធ្វើឲ្យអ្នកនយោបាយចាប់ផ្តើមគិតរឿងហ្នឹង ហើយធ្វើអ្វីត្រូវមានការប្រុង ប្រយ័ត្ន គោរពច្បាប់ច្បាស់លាស់»។
កាលពីថ្ងៃទី២៦ ខែតុលា ឆ្នាំ២០១៥ មនុស្សមួយក្រុមដែលគេស្គាល់ថាជាអ្នកគាំទ្រគណបក្សប្រជាជនកម្ពុជា បានប្រមូលផ្តុំគ្នាមុខមន្ទីររដ្ឋសភា ធ្វើបាតុកម្មទាមទារឲ្យទម្លាក់លោក កឹម សុខា ចេញពីអនុប្រធានទី១នៃរដ្ឋសភា។
ជាមួយគ្នានោះ មានបុរសមួយក្រុមក្នុងនោះមានអង្គរក្សលោក ហ៊ុន សែន ៣នាក់ បានព្រួតគ្នាវាយទាត់ធាក់អ្នកតំណាងរាស្ត្រពីររូបរបស់គណបក្សសង្គ្រោះជាតិគឺលោក គង់ សភា និងលោក ញ៉យ ចំរើន ពេលពួកគេចេញពីប្រជុំនៅមន្ទីររដ្ឋសភា។
ហិង្សានោះបានបង្កឲ្យខូចខាតរថយន្តនិងបង្កឲ្យជនរងគ្រោះជាតំណាងរាស្ត្របក្សប្រឆាំង បែកឈាមពេញផ្ទៃមុខនិងសន្លប់ដេកដួលនៅលើដី និងបញ្ជូនទៅព្យាបាលនៅប្រទេសថៃផងដែរ៕