លោកនាយករដ្ឋមន្ត្រី ហ៊ុន សែន គំរាមចំៗទៅលើអ្នកវិភាគនិងមន្ត្រីបក្សប្រឆាំង ដែលបានរិះគន់លោកករណីស្នើឲ្យកែច្បាប់រំលាយប្រធានក្រុមមតិភាគតិចក្នុងសភានិងការរារាំងមិនឲ្យមន្ត្រីរបស់លោកចូលបំភ្លឺក្នុងសភា តបតាមគម្រោងស្នើសុំរបស់តំណាងរាស្ត្របក្សប្រឆាំង។
កាលពីថ្ងៃទី៣១ ខែមករា តំណាងរាស្ត្រគណបក្សប្រឆាំងធ្វើពហិកាមិនចូលរួមកែបទបញ្ជាផ្ទៃក្នុងឲ្យរំលាយប្រធានក្រុមមតិភាគតិចនិងភាគច្រើនក្នុងសភាទេ ព្រមទាំងធ្វើសន្និសិទសារព័ត៌មាននៅស្នាក់ការបង្ហាញជំហរថា ការធ្វើវិសោធនកម្មរំលាយតួនាទីប្រធានក្រុមមតិភាគតិចនោះ ធ្វើឲ្យបាត់តុល្យភាពអំណាចក្នុងសភា និងថាបានជំរុញឲ្យយន្តការប្រជាធិបតេយ្យដើរថយក្រោយ។
ក្នុងសន្និសីទនោះដែរ បក្សប្រឆាំងអះអាងថា ការដែលតំណាងរាស្ត្ររបស់ខ្លួនមិនចូលប្រជុំសភាពេញអង្គដើម្បីធ្វើវិសោធនកម្មកែបទបញ្ជាផ្ទៃក្នុងនោះ មិនមែនមានន័យថាបក្សខ្លួនមិនចូលធ្វើការក្នុងសភាទេ ពោលគឺថា សមាជិកសភាទាំងអស់ក្នុងគណៈកម្មការនឹងនៅបំពេញការងារដូចធម្មតា។
បក្សប្រឆាំងពេលនោះក៏អះអាងដែរថា តាមរយៈគណៈកម្មការនេះ ពួកគេនឹងកោះហៅរដ្ឋមន្ត្រីយ៉ាងតិច៣រូបឲ្យចូលភ្លឺក្នុងសភា ដូចជារដ្ឋមន្ត្រីក្រសួងកសិកម្ម រដ្ឋមន្ត្រីក្រសួងការងារ និងរដ្ឋមន្ត្រីក្រសួងការពារជាតិ លោក ទៀ បាញ់ ដើម្បីសួរដេញដោយពីភាពមិនប្រក្រតីមួយចំនួន ដែលជាការទទួលខុសត្រូវរបស់ស្ថាប័ននោះ។
មួយថ្ងៃក្រោយមក លោក ហ៊ុន សែន បានប្រកាសថា លោកមិនអនុញ្ញាតិឲ្យរដ្ឋមន្ត្រីដែលបក្សប្រឆាំងគ្រោងកោះហៅនោះ ចូលទៅបង្ហាញខ្លួននៅក្នុងសភាទេ បើបក្សប្រឆាំងបន្តធ្វើពហិកាមិនចូលប្រជំសភាពេញអង្គនោះ។
បន្ថែមពីនេះទៀត ក្នុងពិធីចែកសញ្ញាបត្រដល់និស្សិតក្នុងរាជធានីភ្នំពេញនៅថ្ងៃទី២ ខែកុម្ភៈនេះ លោក ហ៊ុន សែន ព្រមានថា បើប្រធានរដ្ឋសភា លោក ហេង សំរិន ប្រកាសសុពលភាពនៃការលុបចោលតួនាទីប្រធានក្រុមមតិភាគតិចនោះ ហើយ បក្សប្រឆាំងនៅតែមិនទទួលស្គាល់ទៀត លោកថារដ្ឋាភិបាលនឹងប្រើវិធានការក្តៅ។
លោកថា៖ «ទី១ ផ្តាំទៅលោក សុន ឆ័យ លោកចង់សាកលោកធ្វើលមើល រដ្ឋនេះគឺរដ្ឋ លោកកុំបង្កើតរដ្ឋក្នុងរដ្ឋ កុំបង្កើតសភា២ សភាមួយនៅចាក់អង្រែ សភាមួយនៅត្រង់នេះ[សង្កាត់ទន្លេបាសាក់ ខណ្ឌចំការមក]កុំយកវេទិការប្រជុំកាសែតធ្វើរបៀបហ្នឹង លោកសាកមើល បើលោកចិត្តជាកូនប្រុស។ ក្រោយពេលដែលសម្តេចប្រធានសភា លុបប្រកាសនេះហើយ លុបចោលអាការតែងតាំងទាំងឡាយ ហើយលោកដើរប្រកាសខ្លួនឯងទៅ លោកសាកលមើល ប្រយ័ត្ន ធ្វើម៉េចក៏ដោយ កុំឲ្យចូលបទល្មើសព្រហ្មទណ្ឌជាក់ស្តែង អាហ្នឹងគេចាប់អត់មានពេលថយក្រោយទេ»។
មន្ត្រីជាន់ខ្ពស់របស់គណបក្សសង្គ្រោះជាតិ លោក សុន ឆ័យ លើកឡើងថា ធម្មតាច្បាប់ណាដែលចូលជាធរមាន សមាជិកសភាត្រូវតែគោរព។ ប៉ុន្តែលោកថាការធ្វើសន្និសីទសារព័ត៌មាននៅទីស្នាក់ការគណបក្ស លោកថានៅតែបន្តធ្វើ បើមានករណីចំបាច់។
លោកថា៖ «ការធ្វើសន្និសីទកាសែតជាការងារធម្មតា ដើម្បីបង្ហាញជំហររបស់យើង ដើម្បីកុំឲ្យគេឆ្ងល់ថា ហេតុពីបានជាមិនទៅប្រជុំព្រឹកមិញ ដូចនេះយើងពន្យល់គេពីហេតុផលទៅគេថាមកពីហេតុនេះ។ អាហ្នឹងជាសិទ្ធិរបស់យើង។ យើងមិនដឹងថាវាខុសអី ព្រោះវាជាសិទ្ធិសេរីភាពជាធរមាន អាហ្នឹងជាសិទ្ធិផ្តាច់មុខរបស់យើង។ ខ្ញុំចេះរកនឹកពីកំហុសមិនឃើញ»។
បន្ទាប់ពីព្រមានបក្សប្រឆាំង លោក ហ៊ុន សែន ក៏បានព្រមានចំៗទៅកាន់អ្នកវិភាគនយោបាយមួយរូបដែលជាដៃគូវិភាគជាមួយលោក កែម ឡី គឺលោកបណ្ឌិត មាស នី ដោយលោក ហ៊ុន សែន ហាក់បានស្តីបន្ទោសថា មិនបាច់លើកយកមាត្រា៩៧នៃរដ្ឋធម្មនុញ្ញមករិះគន់លោក ពេលលោករារាំងមិនឲ្យរដ្ឋមន្ត្រីរបស់លោក រួមទាំងលោក ទៀ បាញ់ផងចូលបំភ្លឺនោះទេ។ លោក ហ៊ុន សែន ថ្លែងបែបឌឺដងថា លោកមិនមែនជាបណ្ឌិតទេ តែលោកជាឪបណ្ឌិត។
លោកថា៖ «នែលោក មាស នី ខ្ញុំផ្តាំទៅលោក។ លោកឲ្យល្មមៗបានហើយ ខ្ញុំចេះដែរតើ ព្រោះខ្ញុំឪបណ្ឌិតដែរតើ ខ្ញុំមិនអួតខ្លួនឯងទេ ប៉ុន្តែកូនខ្ញុំវាមានបណ្ឌិត ហើយបណ្ឌិតហ្នឹងប្រហែលជាមិនអន់ជាងលោកទេ សេដ្ឋកិច្ចក៏មាន នយោបាយក៏មាន ហើយបណ្ឌិតខាងផ្នែកយោធា មិនមែនវិភាគអីតែលោក»។
មាត្រា៩៧ចែងថា៖ «គណៈកម្មការទាំងឡាយរបស់រដ្ឋសភា អាចអញ្ចើញរដ្ឋមន្ត្រីមកបំភ្លឺអំពីបញ្ហាអ្វីមួយដែលពាក់ព័ន្ធនិងវិស័យទទួលខុសត្រូវរបស់ខ្លួន»។
អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី លើកឡើងថា ការដែលលោកនាយករដ្ឋមន្ត្រី ហ៊ុន សែន ប្រតិកម្មចំឈ្មោះលោកនៅពេលនេះ លោកថាសញ្ញាណព្រួយបារម្ភមួយ បើពិនិត្យមើលពីឃាតកម្មលើលោក កែម ឡី ដែលបានកើតឡើងជិតកន្លះឆ្នាំមក។ ប៉ុន្តែលោកថាការបារម្ភនោះ មិនទាន់ជំរុញឲ្យលោកគិតថានឹងចេញទៅក្រៅប្រទេស ដើម្បីសុវត្ថិភាពផ្ទាល់ខ្លួននោះទេ ។
លោកថា៖ «មានបទពិសោធគ្រប់គ្រាន់ដែលធ្វើឲ្យយើងមានការភ័យខ្លាច ប៉ុន្តែសម្រាប់រូបខ្ញុំនេះ អត់ត្រូវការភាសខ្លួនអីទៅទីណាទេ ព្រោះខ្ញុំជាអ្នករស់នៅជាពលរដ្ឋសាមាញ់ម្នាក់ ដើរទៅណាក៏ខ្ញុំដើរទៅតែម្នាក់ឯង។ ហើយពិសេសការងាររបស់ខ្ញុំបច្ចុប្បន្ន តែងតែតត្រុកទៅតាមជនបទដាច់ស្រយាល។ អញ្ចឹងក្នុងកាលៈទេសៈដែលគេចង់ធ្វើអីយើងឬក៏នរណាមួយប៉ុនប៉ងធ្វើអីយើង ខ្ញុំថាខ្ញុំហ្នឹងដូចជាកូនកង្កែប ដែលគេអាចធ្វើអីពេលណាក៏បានដែរ។ អញ្ចឹងវាមិនមែនមានន័យថា ខ្ញុំហ្នឹងមិនខ្លាចទេ ប៉ុន្តែខ្ញុំមានមូលហេតុនៃការភ័យខ្លាចរបស់ខ្ញុំ»។
ទោះជាយ៉ាងណា លោក ហ៊ុន សែន បញ្ជាក់ថា លោកនឹងបើកផ្លូវឲ្យមន្ត្រីរបស់លោកចូលទៅបំភ្លឺក្នុងសភាតាមការកោះអញ្ចើញរបស់តំណាងរាស្ត្របក្សប្រឆាំងដូចពេលមុនៗ ដោយដាក់លក្ខខណ្ឌថា ដរាបណាតំណាងរាស្ត្របក្សប្រឆាំងចូលធ្វើការពេញលេញក្នុងសភាឡើងវិញ៕