តុលាការសហរដ្ឋអាមេរិកនឹងបើកសវនាការលើសំណុំរឿង លោក មាជ សុវណ្ណារ៉ា ដែលប្តឹងលោកនាយករដ្ឋមន្ត្រីកម្ពុជានិងកូនប្រុស លោក ហ៊ុន ម៉ាណែត នៅដើមសប្តាហ៍ក្រោយ ពាក់ព័ន្ធនឹងសំណុំរឿង “ធ្វើភេរវកម្ម” និង “ធ្វើទារុណកម្មតាមរយៈការឃុំខ្លួនស្រេចតែអំពើចិត្ត ក្រៅច្បាប់និងរយៈពេលយូរ”។
ភរិយារបស់លោក មាជ សុវណ្ណារ៉ា គឺលោកស្រី ចេមី មាជ (Jamie meach) បាននិយាយក្នុងវីដេអូឃ្លីបនិងបង្ហោះជាសាធារណៈជាថ្មីទៀតនៅសុក្រនេះថា តុលាការនៅក្នុងក្រុងឡូសអែនជឺឡេស (Los Angeles) រដ្ឋកាលីហ្វ័រញ៉ា (California) នឹងបើកសវនាការនៅថ្ងៃចន្ទ ទី៦ ខែកុម្ភៈ វេលាម៉ោង៨.៣០នាទីព្រឹក លើសំណុំរឿងលោក មាជ សុវណ្ណារ៉ា ដែលប្តឹងលោកនាយករដ្ឋមន្ត្រីកម្ពុជានិងកូនប្រុស លោក ហ៊ុន ម៉ាណែត។
លោកស្រី ចេមី មាជ ប្រាប់ទៅជនរួមជាតិដែលគំាទ្រលោក មាជ សុវណ្ណារ៉ា ឲ្យទៅចូលរួមនិងតាមដានករណីនេះនៅតុលាការសហរដ្ឋអាមេរិកនោះផងដែរ។ លោកស្រីលើកឡើងដូចនេះថា៖ «សវនាការនេះយើងអត់ដូរពេលវេលាទេ គឺឡើងនៅថ្ងៃទី៦ ត្រូវនឹងថ្ងៃចន្ទម៉ោង៨.៣០នាទីព្រឹក បន្ទប់លេខ១០ សូមអញ្ជើញបងប្អូនទៅចូលរួមឲ្យបានច្រើនកុះករ នឹងជួយលើកទឹកចិត្តរវាងរូបគាត់ និងរូបនាងខ្ញុំទំាងអស់គ្នា»។
ក្រុមមេធាវីអន្តរជាតិដែលការពារលោក មាជ សុវណ្ណារ៉ា ធ្លាប់លើកឡើងថា បណ្តឹងរបស់លោកផ្តោតលើករណីអង្គរក្សលោក ហ៊ុន ម៉ាណែត ចាប់បោក លោក ផល ហេរ បណ្តាលឲ្យរងរបួសឆ្អឹងខ្នង កាលពីថ្ងៃទី៩ ខែមេសា ខណៈមន្ត្រីតុលាការរូបនោះយកដីកាជូនលោក ហ៊ុន ម៉ាណែត ពេលគាត់ទៅអាមេរិក។ លោកថា អំពើហិង្សានេះបានរំលោភលើច្បាប់រដ្ឋកាលីហ្វ័រញ៉ានិងរំលោភច្បាប់ជាតិសហរដ្ឋអាមេរិកផង។
ចំណែក “ភេរវកម្មអន្តរជាតិ” ក្រុមេធាវីលោក មាជ សុវណ្ណារ៉ា បានបញ្ជាក់ថា ភារវកម្មនេះ ស្ថិតក្រោមច្បាប់ប្រឆាំងភេរវកម្មរបស់អាមេរិក ដោយសារតែមានការចោទប្រកាន់ថាធ្វើទារុណកម្មលើលោក មាជ សុណ្ណារ៉ា ដែលមានសញ្ជាតិអាមេរិក កំពុងជាប់ពន្ធនាគារនៅកម្ពុជា។ ក្នុងពាក្យបណ្តឹងពន្យល់ថា ច្បាប់អាមេរិកឲ្យនិយមន័យ “ភេរវកម្មអន្តរជាតិ” ថាជាទង្វើហិង្សាឬសកម្មភាពដែលគ្រោះថ្នាក់ដល់អាយុជីវិតមនុស្សដែលរំលោភច្បាប់ព្រហ្មទណ្ឌអាមេរិកឬច្បាប់នៃរដ្ឋណាមួយ។ ប៉ុន្តែលោកថា ក្រុមមេធាវីលោក ហ៊ុន ម៉ាណែត ទាត់ចោលបណ្តឹងនេះ ដោយអះអាងថាមិនត្រឹមត្រូវតាមនីតិវិធី។
VOD មិនអាចសុំការបំភ្លឺពីលោក ហ៊ុន ម៉ាណែត បានទេនៅថ្ងៃនេះ។
ប៉ុន្តែអ្នកនាំពាក្យគណបក្សប្រជាជនកម្ពុជាលោក សុខ ឥសាន ធ្លាប់មានប្រសាសន៍ថា នៅថ្ងៃសវនាការនោះ ប្រហែលជាមិនមានតំណាងលោកនាយករដ្ឋមន្ត្រីហ៊ុន សែន និងកូនប្រុសច្បងលោក ហ៊ុន ម៉ាណែត ចូលស្តាប់សវនាការ នៅសហរដ្ឋអាមេរិកនោះទេ។
គួររំលឹកថា មន្ត្រីគណបក្សសង្គ្រោះជាតិ លោក មាជ សុវណ្ណារ៉ា ដែលមានសញ្ជាតិអាមេរិក បានដាក់ពាក្យបណ្តឹងនៅអាមេរិកប្រឆាំងនឹងលោក ហ៊ុន ម៉ាណែតនិងរដ្ឋាភិបាលកម្ពុជា ដោយចោទពីបទ”ធ្វើភេរវកម្ម”និង”ធ្វើទារុណកម្មតាមរយៈការឃុំខ្លួនស្រេចតែអំពើចិត្ត ក្រៅច្បាប់និងរយៈពេលយូរ”។ ក្នុងពាក្យបណ្តឹងនោះ លោក សុវណ្ណារ៉ា បានបញ្ជាក់ថា លោក ហ៊ុន ម៉ាណែត ជាអ្នកទទួលខុសត្រូវចំពោះអំពើហិង្សាដែលបានកើតឡើងនៅទីលានប្រជាធិបតេយ្យ កាលពីខែកក្កដា ឆ្នាំ២០១៤ និងនាំឲ្យមានការចាប់ខ្លួននិងកាត់ទោសលោកឲ្យជាប់ពន្ធនាគារ២០ឆ្នាំ៕