រដ្ឋសភាជាតិបានសម្រេចជ្រើសរើសតំណាងរាស្ដ្រមណ្ឌលខេត្ដតាកែវថ្មី បន្ទាប់ពីលោក សុខ អាន ទទួលមរណៈភាព ខណៈតំណែងនេះត្រូវបានទុកឲ្យនៅទំនេរនោះ។
នៅក្នុងសេចក្ដីប្រកាសព័ត៌មាន ចេញផ្សាយថ្ងៃទី៣ ខែមេសា ឆ្នាំ២០១៧នេះ រដ្ឋសភាពជាតិកម្ពុជាបានទទួលស្គាល់ឥស្សរជនជាន់ខ្ពស់ម្នាក់គឺលោក ជា វ៉ាន់ដេត ទីប្រឹក្សារាជរដ្ឋាភិបាល និងជាប្រធានក្រុមការងារថ្នាក់ជាតិ ឲ្យទទួលតំណែងតំណាងរាស្ដ្រប្រចាំនៅមណ្ឌលតាកែវ បន្ទាប់ពីអតីតឧបនាយករដ្ឋមន្ដ្រី និងជាសម្ដេចវិបុលបញ្ញា សុខ អាន ទទួលមរណៈភាព។
បើតាមសេចក្ដីប្រកាសព័ត៌មាន រដ្ឋសភានឹងបើកកិច្ចប្រជុំពេញអង្គ ដើម្បីប្រកាសសុពលភាពឲ្យលោក ជា វ៉ាន់ដេត ជាតំណាងរាស្ត្រថ្មីប្រចាំមណ្ឌលខេត្តតាកែវ ជំនួសសម្ដេចវិបុលបញ្ញា សុខ អាន នៅថ្ងៃទី៧ មេសា ឆ្នាំ២០១៧ ខាងមុខ និងស្បថចូលកាន់តំណែងពេញសិទ្ធិតែម្តង។
លោក សុខ អាន អតីតឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីបានទទួលមរណភាព នៅអាយុ៦៦ឆ្នាំ ដោយរោគាពាធ កាលពីថ្ងៃទី១៥ មីនា ឆ្នាំ២០១៧ កន្លងទៅ នៅមន្ទីរពេទ្យក្រុងប៉េកាំង ប្រទេសចិន។ ក្រោយមរណភាពរបស់ឧបនាយករដ្ឋមន្ត្រីកាន់តំណែងច្រើនរូបនេះ រដ្ឋាភិបាលត្រូវបានគេមើលឃើញថា បានព្យាយាមស្វែងរកឥស្សរជនមួយចំនួនមកជំនួសតំណែងរបស់លោក ដែលនៅទំនេរ និងបានស្នើដាក់លោក ជា វ៉ាន់ដេត ជាបេក្ខជនបម្រុងលេខរៀងទី១ ដើម្បីជំនួសសម្តេចវិបុលបញ្ញា សុខ អាន៕
