លោកនាយករដ្ឋមន្ត្រី ហ៊ុន សែន បានប្រកាសសុំទោស សាធារណជន នូវអ្វីដែលលោកថាកម្ពុជាមិនទាន់មានលទ្ធភាព ធ្វើជាម្ចាស់ផ្ទះរៀបចំការប្រកួតកីឡាខ្នាតអន្តរជាតិ (ស៊ីហ្គេម) ដូចប្រទេសនានាក្នុងបំបន់ដែលគេបានប្តូរវេនគ្នា២ឆ្នាំម្តងនោះ។
ក្នុងពិធី បើកការដ្ឋាន និងសម្ពោធមណ្ឌលកីឡា នៃពហុកីឡដ្ឋានជាតិថ្មីមួយឈ្មោះថា «មរតកតេជោ» នៅសង្វាត់ព្រែកតាសេក ខណ្ឌជ្រោយចង្វារ នៅព្រឹកថ្ងៃទី៤ខែមេសានេះ លោក ហ៊ុន សែន ថ្លែងដោយសុំទោសជនរួមជាតិ ពីការដែលរដ្ឋាភិបាល សុំប្រទេសជាសមាជិកអាស៊ាន ពន្យាធ្វើជាម្ចាស់ផ្ទះសម្រាប់ប្រកួតកីឡាស៊ីហ្គេម រហូតដល់ឆ្នាំ២០២៣។
លោក ហ៊ុន សែន អះអាងថា ការសុំពន្យានេះ ដោយសារតែកម្ពុជា ទើបនឹងងើបពីគំនរផេះផង់នៃសង្គ្រៀមស៊ីវិល ខ្វះធនធានមនុស្ស ខ្វះហេដ្ឋារចនាសម័ន្ធ រួមទាំងថវិកា។
លោកថា៖ «សេចក្តីត្រូវការរបស់យើងនៅប៉ុន្មានឆ្នាំនេះ និងនៅពេលនេះ គឺបញ្ហាទាក់ទងទៅនឹងការកសាង និងស្តាការអភិវឌ្ឍឡើងវិញ។ តម្រូវការរបស់យើងគឺការកសាងផ្លូវ កសាងស្ពាន កសាងប្រឡាយទឹក មន្ទីរពេទ្យ សាលារៀនជូនប្រជាជន»។
បើតាមលោក ហ៊ុន សែន កម្ពុជាបានខកខានជាបន្តបន្ទាប់ យ៉ាងតិច៣ដងរួចមកហើយ ក្នុងការត្រៀមខ្លួនធ្វើជាម្ចាស់ផ្ទះក្រកួតកីឡាស៊ីហ្គេមនេះ ។ លោកថាការខកខាននោះ គឺនៅទសវត្សរ៍៦០-៩០ និង ២០០០។
យ៉ាងនេះក្តី លោក ហ៊ុន សែន ថ្លែងលើកទឹកចិត្ត ឲ្យបន្តលើកកម្ពស់វិស័យកីឡា និងថា កម្ពុជា យ៉ាងហោចណាស់ មានរោងចក្រចំនួនពីរ បានផលិតឧបករណ៍ និងសម្ភារកីឡា នាំទៅលក់នៅក្រៅប្រទេស ដូចជារោងចក្រមួយ នៅតំបន់សេដ្ឋកិច្ចពិសេសខេត្តស្វាយរៀង បានផលិតកង់ប្រណាំង និងរោងចក្រមួយទៀត នៅតំបន់សេដ្ឋកិច្ចពិសេស ខេត្តកោះកុង បានផលិតបាល់ទះ។