តុលាការសហរដ្ឋអាមេរិកនឹងបន្តបើកសវនាការលើសំណុំរឿងលោក មាជ សុវណ្ណារ៉ា ដែលប្តឹងលោកនាយករដ្ឋមន្ត្រីកម្ពុជា និងកូនប្រុស លោក ហ៊ុន ម៉ាណែត ពាក់ព័ន្ធនឹងសំណុំរឿង “ធ្វើភេរវកម្ម” និង “ធ្វើទារុណកម្មតាមរយៈការឃុំខ្លួនស្រេចតែអំពើចិត្ត ក្រៅច្បាប់និងរយៈពេលយូរ”។ នេះបើតាមភាគីដើមបណ្តឹង។
ភរិយារបស់លោក មាជ សុវណ្ណារ៉ា គឺលោកស្រី ចេមី មាជ (Jamie meach) បានប្រាប់VODនៅថ្ងៃព្រហស្បតិ៍នេះថា តុលាការសហរដ្ឋអាមេរិក នៅក្នុងក្រុងឡូសអែនជឺឡេស (Los Angeles) រដ្ឋកាលីហ្វ័រញ៉ា (California) នឹងបើកសវនាការបង្ហាញអង្គហេតុ និងភស្តុតាង នៅថ្ងៃទី១៣ ខែមេសា វេលាម៉ោង៨.៣០ព្រឹក ម៉ោងនៅអាមេរិក លើសំណុំរឿងលោក មាជ សុវណ្ណារ៉ា ដែលប្តឹងលោកនាយករដ្ឋមន្ត្រីកម្ពុជានិងកូនប្រុស លោក ហ៊ុន ម៉ាណែត។
កាលពីចុងខែមីនា លោក អ៊ុច ខែមសុខាំបូរ មេធាវីការពារក្តីឲ្យលោក មាជ សុវណ្ណារ៉ា បានបញ្ជាក់ថា សវនាការនៅថ្ងៃទី១៣មេសានោះ នឹងបង្ហាញពីឯកសារ ភស្តុតាងមួយចំនួនទៀត ដែលអង្គរក្សរបស់លោក ហ៊ុន ម៉ាណែត បង្ករហិង្សាលើលោក ផល ហេរ នៅសហរដ្ឋអាមេរិក។
VOD មិនអាចសុំការបំភ្លឺពីលោក ហ៊ុន ម៉ាណែត បានទេនៅថ្ងៃនេះ។
កាលពីខែមីនា លោក មូរតុន ក្លា (Morton Sklar) មេធាវីការពារក្ដីលោក មាជ សុវណ្ណារ៉ា បានថ្លែងក្នុងវីដេអូឃ្លីបដែលផ្សាយតាមហ្វេសប៊ុកថា តុលាការអាមេរិកនឹងបន្តយកបណ្តឹងរបស់លោក មាជ សុវណ្ណារ៉ា ប្តឹងលោកហ៊ុន សែន និងលោក ហ៊ុន ម៉ាណែត ទៅចាត់ការជាបឋមលើយុត្ថាធិការរបស់តុលាការតាមនីតិវិធី ខណៈក្រុមមេធាវីនាយរដ្ឋមន្ត្រីកម្ពុជានិងលោក ហ៊ុន ម៉ាណែត បានប្តឹងទាត់ចោលបណ្តឹងនេះ ដោយថាតុលាការធ្វើខុសនីតិវិធីច្បាប់៖ “ប្តឹងតុលាការអាមេរិកឲ្យចាត់ការជាបឋមលើចំណុចយុត្តាធិការរបស់តុលាការ បណ្តឹងនេះមានសារៈសំខាន់ណាស់ ព្រោះបណ្តឹងនេះតម្រូវឲ្យរដ្ឋាភិបាលកម្ពុជា និងលោក ហ៊ុន ម៉ាណែត បង្ហាញព័ត៌មាននិងរងការសួរចម្លើយដោយផ្ទាល់ពីតុលាការ នេះជាឱកាសដ៏ថ្លៃថ្លាបំផុតដែលពិភពលោកនិងបានស្តាប់ចម្លើយរបស់រដ្ឋាភិបាលដោយចោទសួរដោយតុលាការឯករាជ្យពិតប្រាកដអំពីរឿងរំលោភសិទ្ធិមនុស្សនៅកម្ពុជា”។
គួររំលឹកថា មន្ត្រីគណបក្សសង្គ្រោះជាតិ លោក មាជ សុវណ្ណារ៉ា ដែលមានសញ្ជាតិអាមេរិក បានដាក់ពាក្យបណ្តឹងនៅអាមេរិកប្រឆាំងនឹងលោក ហ៊ុន ម៉ាណែតនិងរដ្ឋាភិបាលកម្ពុជា ដោយចោទពីបទ”ធ្វើភេរវកម្ម”និង”ធ្វើទារុណកម្មតាមរយៈការឃុំខ្លួនស្រេចតែអំពើចិត្ត ក្រៅច្បាប់និងរយៈពេលយូរ”។ ក្នុងពាក្យបណ្តឹងនោះ លោក សុវណ្ណារ៉ា បានបញ្ជាក់ថា លោក ហ៊ុន ម៉ាណែត ជាអ្នកទទួលខុសត្រូវចំពោះអំពើហិង្សាដែលបានកើតឡើងនៅទីលានប្រជាធិបតេយ្យ កាលពីខែកក្កដា ឆ្នាំ២០១៤ និងនាំឲ្យមានការចាប់ខ្លួននិងកាត់ទោសលោកឲ្យជាប់ពន្ធនាគារ២០ឆ្នាំ ៕
