សហជីពមួយចំនូនអះអាងថា កម្មករដែលជាសមាជិករបស់ពួកគេភាគច្រើនគឺបានទៅចូលរួមបោះឆ្នោត បើទោះបីជាក្រសួងការងារមិនឲ្យកម្មករឈប់សម្រាកចំនួន២ថ្ងៃបន្ថែមដើម្បីទៅបោះឆ្នោតក៏ដោយ។
ប្រធានសម្ព័ន្ធសហជីពកម្ពុជាលោកស្រី យ៉ាង សុភ័ណ្ឌ ឲ្យវីអូឌីដឹងថា សម្ព័ន្ធសហជីពកម្ពុជាមានកម្មករនយោជិតជាសមាជិកប្រមាណ១ម៉ឺននាក់ ក្នុងនោះលោកស្រីថាមានកម្មករប្រមាណជា៩០%គឺបានទៅបោះឆ្នោត។
លោកស្រីបន្តថា ការដែលកម្មករបានទៅចូលច្រើនបែបនេះដោយសារសហជីពរបស់លោកស្រីបានធ្វើការសម្របសម្រួសជាមួយភាគីរោងចក្រ។
លោកស្រីបន្ថែម «សម្រាប់សមាជិករបស់ខ្ញុំៗបានលើកទឹកឲ្យពួកគាត់បោះឆ្នោតទាំងអស់គ្នា ហើយខ្ញុំឃើញថាសម្រាប់សជិករបស់ខ្ញុំៗបានចរចាជាមួយបណ្តារោងចក្រសហគ្រាសដែលជាសមាជិករបស់យើងហ្នឹង គឺគាត់បានអនុញ្ញាត្តិឲ្យកម្មករបានទៅចូលរួមក្នុងការបោះឆ្នោតទាំងអស់គ្នា ដោយនៅក្នុងហ្នឹងយើងបានចរចាសុំឲ្យកម្មករបានឈប់សម្រាកនៅថ្ងៃសៅរ៍និងថ្ងៃចន្ទ ហើយនិយាយរឿងលុយវិញរោងចក្រខ្លះបើកប្រាក់ខែមុនចំនួន១៥០ដុល្លារ និងរោងចក្រខ្លះ ហើយខ្ញុំហ៊ានអះអាងសម្រាប់សមាជិករបស់ខ្ញុំនិយាយឲ្យចំទៅគាត់បានទៅបោះឆ្នោតទាំងអស់គ្នា»។
ទីប្រឹក្សារសហព័ន្ធសហជីពសេរីកម្មករកម្ពុជាលោក ជា មុន្នី មានប្រសាសន៍ថា បើទោះបីជាក្រសួងការងារមិនចេញសេចក្តីណែនាំកំណត់ពេលវេលាជាក់លាក់ឲ្យកម្មករបានទៅបោះឆ្នោតដូចលើកមុនៗក៏ដោយ លោកថា កម្មករនយោជិកដែលជាសមាជិករបស់សហជីពសេរីកម្មករ គឺទៅបោះឆ្នោតប្រហែលជា៨៥%ដែរ។
លោកបន្ថែមថា «ក្រសួងការងារអត់មានចេញជាលិខិតអីបញ្ជាក់អំពីការឲ្យកម្មករទៅបោះឆ្នោត ១ថ្ងៃ២ថ្ងៃ៣ថ្ងៃដោយមិនកាត់ប្រាក់បៀរវត្តនោះ គឺអត់មានចេញទេ ប៉ុន្តែបើទោះបីជាមិនមាន ការចេញក៏ដោយ ក៏យើងសង្កេតឃើញកម្មករកម្មាការនីរបស់យើងហ្នឹងមាន៨៥%ដែលចុះឈ្មោះបោះឆ្នោតហ្នឹងឃើញថាគាត់ទៅ ដោយគាត់មានចំណាយពេលវេលា ចំណាយថវិកា ផ្ទាល់ខ្លួនបោះគាត់ហ្នឹងដោយមិនចាំបាច់ខ្ចីពីថៅកែក្រុមហ៊ុន ហើយប្រាក់ខែរបស់ពួកគាត់ក៏ត្រូវបានក្រុមហ៊ុនកាត់ ប្រាក់រង្វាន់របស់គាត់ក៏ត្រូវបានកាត់ក៏ដោយ ហើយខ្ញុំមានការរីករាយ ព្រោះឃើញពួកគាត់ស្រាក់ស្រាំនាំគ្នាទៅបោះឆ្នោត ដូចនៅក្រុងព្រះសីហនុទោះភ្លៀងយ៉ាងណា ក៏ដោយក៏ពួកគាត់នៅតែនាំគ្នាទៅបោះឆ្នោត»។
ប្រធានសហភាពការងារកម្ពុជាលោក អាត់ ធន់ មានប្រសាសន៍ថា កម្មករទូទាំងប្រទេសប្រមាណ៨០%គឺទៅ ចុះឈ្មោះបោះឆ្នោតនៅតាមបណ្តាខេត្តដែលពួកគេរស់នៅ ប៉ុន្តែលោកថា ក្នុងចំណោម៨០% នោះមានកម្មករតែ៦០%ប៉ុណ្ណោះបានទៅបោះឆ្នោត។
លោកបន្តថា កម្មករដែលមិនបានទៅបោះឆ្នោតនោះដោយសាររោងចក្រសហគ្រាសមួយ ចំនួនមិនអនុញ្ញាតច្បាប់ ខ្លះទៀតត្រូវថៅព្រមានកាត់លុយ និងមួយចំនួនទៀតខ្វះថវិកាធ្វើ សម្រាប់ធ្វើដំណើរជាដើម។
លោកបន្ថែមថា «ជាទូទៅកម្មករចុះឈ្មោះនៅកន្លែងដែលធ្វើការងាររបស់ខ្លួនបច្ចុប្បន្នប្រហែល ជា១០ទៅ២០ភាគរយប៉ុណ្ណោះ អញ្ចឹងប្រហែលជា៨០ភាគរយ ទៅចុះឈ្មោះបោះឆ្នោតនៅ ស្រុកហើយក្នុងចំណោមអ្នកដែលទៅចុះនៅស្រុកកំណើតហ្នឹង ខ្ញុំគិតថាបានទៅបោះឆ្នោតប្រហែល៦០ភាគរយទេ នៅសល់ប្រហែល៤០ភាគរយទៀតអត់បានទៅទេ មូលហេតុដែលខ្ញុំហ៊ាននិយាយបែបនេះ ព្រោះមានសហគ្រាស រោងចក្រ គ្រឹះស្ថានមួយចំនួនហ្នឹងអត់បានឲ្យច្បាប់ អ្នកកាត់លុយនិងអ្នកខ្លះទៀតអត់លុយ អ្នកខ្លះទៀតស្រុកនៅឆ្ងាយពេក ហើយអ្នកខ្លះទៀតបាត់អត្តសញ្ញាណដែលបង្កការរំខានមិនឲ្យទៅបោះឆ្នោតកើត ហើយដែលខ្ញុំទទួលបាន នោះបញ្ហាធំគឺការមិនអនុញ្ញាតច្បាប់ និងខ្វះលុយធ្វើដំណើរ»។
យោងតាមសេចក្តីប្រកាសរបស់គណៈកម្មាធិការជាតិរៀបចំការបោះឆ្នោត (គជប) ចេញផ្សាយ នៅថ្ងៃនេះអះអាងថា ពលរដ្ឋដែលមានសិទ្ធិបោះឆ្នោតបានចូលរួមទៅបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ មានចំនួន ៧ ០៤០ ៥៩៤នាក់(ប្រាំពីរលាន ប្រាំបីសែន បួនម៉ឺន ប្រាំរយកៅសិបបួននាក់) ក្នុងចំណោមពលរដ្ឋចំនួនជាង៧ ៨៦៥ ០៣៣នាក់(ប្រាំពីលានប្រាំបីសែនប្រាំមួយម៉ឺនប្រាំពាន់សាមសិបបីនាក់)ពោលអ្នកចេញទៅបោះឆ្នោតមានជាង៨៩%៕