បន្ទាប់ពីដឹងលទ្ធផលក្រៅផ្លូវការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ គណបក្សនយោបាយមួយចំនួនមានទស្សនៈថា លទ្ធផលការបោះឆ្នោតកាលថ្ងៃទី៤ខែមិថុនា ម្សិលមិញគឺបង្ហាញជំនឿថា ខ្លួននឹងឈ្នះឆ្នោតនៅឆ្នាំ២០១៨ខាងមុខនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រសសាសន៍ថា លទ្ធផលការបោះឆ្នោតជ្រើសរើសក្រុមប្រឹក្សាឃុំសង្កាត់នៅអាណត្តិទី៤នេះ ជាជ័យជំនះរបស់គណបក្សប្រជាជនកម្ពុជា ដែលបង្ហាញប្រជាពលរដ្ឋនៅតែចង់ឲ្យគណបក្សនេះដឹកនាំប្រទេសដដែល។ លោកបង្ហាញជំនឿថា នៅឆ្នាំ២០១៨ខាងមុខនេះ គណបក្សប្រជាជនកម្ពុជានឹងឈ្នះឆ្នោតដឹកនាំប្រទេសបន្តទៀត។
លោកថា «ខ្ញុំយល់ថាជាជ័យជំនះរបស់គណបក្សប្រជាជនដែលឆ្ពោះទៅបោះឆ្នោតសកលឆ្នាំ២០១៨ យើងសង្ឃឹមនិងមានសុទិថិនិយមនឹងទទួលបានជោគជ័យថែមទៀត ពីព្រោះប្រជាពលរដ្ឋមានសន្ទះគាំទ្រ ទោះបីគណបក្សប្រជាជនកម្ពុជាបានបាត់បង់អាសនៈមេឃុំ-ចៅសង្កាត់មួយចំនួនក៏ពិតមែន ក៏ប៉ុន្តែចំនួនសំឡេងឆ្នោតគឺកើនឡើងជាង៣សែនសំឡេង បើប្រៀបធៀបកាលបោះឆ្នោតកាលពីឆ្នាំ២០១៣ យើងកើនជាង៣ សំឡេងថែមទៀត»។
អ្នកនាំពាក្យគណបក្យសង្គ្រោះជាតិលោក យឹម សុវណ្ណ ថ្លែងទៅកាន់អ្នកយកព័ត៌មាននៅថ្ងៃអាទិត្យទី៤មិថុនា ម្សិលមិញថា គណបក្សសង្គ្រោះជាតិដណ្តើមបានសំឡេងប្រមាណ៤៦% នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤នេះ។ លោកបន្តថា លទ្ធផលនៃការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃអាទិត្យម្សិលមិញបង្ហាញថា គណបក្សសង្គ្រោះជាតិនឹងឈ្នះការបោះឆ្នោតថ្នាក់ជាតិនៅឆ្នាំ២០១៨ខាងមុខនេះ។
លោកថា «និន្នាការក្នុងការបោះឆ្នោតនៅប្រទេសកម្ពុជាពីឃុំទៅថ្នាក់ជាតិ គឺខុសពី១៥%ទៅ១៦%កាលពីបោះឆ្នោតឆ្នាំ២០០២ ប្រៀបធៀបទៅឆ្នាំ២០០៣ គឺខុសគ្នា ២០១២ទៅ២០១៣ ក៏ខុសគ្នា ហើយយើងខ្ញុំរំពឹងថា ជាមួយសំឡេងដែលយើងទទួលបាន៤៦%នៅក្នុងឆ្នាំ២០១៧ ហើយនៅក្នុងឆ្នាំ២០១៨ យើងប្រាកដជាទទួលបានសំឡេងយ៉ាងតិច៦០%។ ចឹងយើងសន្និដ្ឋានថានៅឆ្នាំ២០១៨ គណបក្សសង្គ្រោះជាតិឈ្នះឆ្នោតកាន់កាប់អំណាចរដ្ឋាភិបាល»។
អ្នកនាំពាក្យគណបក្សសម្ព័ន្ធដើម្បីប្រជាធិបតេយ្យ លោក កូវ គា លើកឡើងថា ចំពោះលទ្ធផលនៃការបោះឆ្នោតក្រុមប្រឹក្សាឃុំសង្កាត់អាណត្តិទី៤នេះ គឺ គ.ជ.ប បានប្រកាសហើយ។ លោកបន្តថា គណបក្សដែលឈ្នះការបោះឆ្នោតក្រុមប្រឹក្សាសង្កាត់នៅអាណត្តិនេះ ដោយសារគណបក្សទាំងនោះបានយកលុយទៅសូកប៉ាន់អ្នកគាំទ្រដើម្បីឲ្យបោះឆ្នោតឲ្យគណបក្សរបស់ខ្លួន។
លោកថា «កាលណាយើងនិយាយពីប្រជាធិបតេយ្យ យើងនិយាយពីគុណភាពនៃសន្លឹកឆ្នោត ពេលយើងសង្កេតឃើញប្រជាពលរដ្ឋរបស់យើងនៅពេលគាត់ទៅចូលរួមបោះឆ្នោតជាក់ស្ដែង មិនមានការយល់ដឹងទេ មិនថាតែខ្ញុំ មិនថាតែប្អូនអ្នកខលមកទេ។ ជាទូទៅមុនបោះឆ្នោត គេធ្វើអីខ្លះ មានអាសូកផង មានអាសម្លុតផង គំរាមផង។ នៅពេលបែបចឹង តើសន្លឹកឆ្នោតបែបហ្នឹង ខ្ញុំសួរថា តើវាមានខ្លឹមយ៉ាងម៉េចទៅចំពោះអត្ថន័យក្នុងការចូលរួមក្នុងសង្គមប្រជាធិបតេយ្យ។ សម្រាប់យើងគិតអំពីខ្លឹមនៃការចូលរួម ដូច្នេះសម្រាប់លទ្ធផលដែល LDP ទទួលបានមិនច្រើនទេ មួយឃុំៗ យើងអាចទទួលបាន១០០សម្រាប់រឿងទូទៅ មិនមានអ្វីគួរឲ្យចាប់អារម្មណ៍ទេ»។
បើតាមលទ្ធផលបឋមក្រៅផ្លូវការគណបក្សប្រជាជនកម្ពុជាទទួលបានមេឃុំ-ចៅសង្កាត់ចំនួន១១៥៨។ ចំណែកគណបក្សសង្គ្រោះជាតិឈ្នះបាន៤៨៧ឃុំ-សង្កាត់ និងគណបក្សខ្មែររូបរួមជាតិទទួលបាន១ឃុំ។
យោងតាមសេចក្តីប្រកាសគណកម្មាធិការជាតិរៀបចំការបោះឆ្នោត(គជប)អះអាងថា ពលរដ្ឋដែលមានសិទ្ធិបោះឆ្នោត បានចូលរួមទៅបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ មានចំនួន៦ ៧៤៣ ៣២៩នាក់(ប្រាំមួយលានប្រាំពីរសែនបួនម៉ឺនបីពាន់បីរយម្ភៃប្រាំបួននាក់) ក្នុងចំណោមពលរដ្ឋចំនួនជាង៧ ៨៦៥ ០៣៣នាក់(ប្រាំពីលានប្រាំបីសែនប្រាំមួយម៉ឺនប្រាំពាន់សាមសិបបីនាក់)ពោលអ្នកចេញទៅបោះឆ្នោតមានជាង៨៦%៕
