អង្គការតម្លាភាពកម្ពុជាបានសង្កេតឃើញថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ មានភាពល្អប្រសើរជាងអាណត្តិមុន ដោយថាមកពី បក្សធំៗពីរ បានព្រមព្រៀងគ្នាធ្វើកំណែទម្រង់ គជប ថ្មី។
នាយកប្រតិបត្តិអង្គការតម្លាភាពកម្ពុជា លោក ព្រាប កុល បានថ្លែងក្នុងសន្និសីទសារព័ត៌មាននៅថ្ងៃទី៥មិថុនានេះថា អង្គការតម្លាភាពបានដាក់ពង្រាយអ្នកសង្កេតការណ៍ចំនួន១០៥១នាក់ ទូទំាង២៥រាជធានី ខេត្ត ដែលជាតំណាងនៃសំណាកគំរូវិធីសាស្ត្រស្ថិតិ សម្រាប់ការបោះឆ្នោតឃុំ សង្កាត់ កាលពីថ្ងៃទី៤មិថុនាម្សិលមិញ។
លោក ព្រាប កុល ថ្លែងទៀតថាក្នុងអំឡុងពេលបោះឆ្នោតឃុំសង្កាត់ម្សិលមិញនេះ ការប្រមូលទិន្និន័យនិងការសង្កេតការណ៍របស់អង្គការតម្លាភាព បានរាយការណ៍ពីលទ្ធផលបោះឆ្នោតបឋមនៅតាមឃុំសង្កាត់ក្នុងរាជធានី ខេត្តមួយចំនួនបានទាន់ពេលវេលា ដោយលោកថា ការបោះឆ្នោតឆ្នាំនេះ នៅការិយាល័យភាគច្រើន បានប្រព្រឹត្តទៅ ដោយរលូន សុវត្ថិភាព និងសន្តិវិធី ក្រោយពីគណបក្សប្រជាជនកម្ពុជា និង គណបក្សសង្គ្រោះជាតិ បានព្រមព្រៀងកែទម្រង់ គជប ថ្មី។
លោកថ្លែងថា «គណបក្សទំាងពីរបានជជែកគ្នាវិសោធនកម្មច្បាប់មួយចំនួន ដើម្បីឲ្យមានភាពល្អប្រសើរឡើង ហើយក្នុងនោះក៏មានម្ចាស់ជំនួយសំខាន់ៗក៏បានផ្តល់បច្ចេកទេស និងថវិកា ដើម្បីគំាទ្រកំណែទម្រង់ការបោះឆ្នោត គឺមានសហគមន៍អ៊ឺរ៉ុប ហើយនិងរដ្ឋាភិបាលប្រទេសជប៉ុន រដ្ឋាភិបាលសហរដ្ឋអាមេរិក និងអង្គការមួយចំនួនទៀត ដែលជំនាញខាងកិច្ចការបោះឆ្នោត ដែលបានចូលរួមផ្តល់បច្ចេកទេសក្នុងការងារកំណែទម្រង់ការបោះឆ្នោត»។
លោក ព្រាប កុល លើកទឹកចិត្តទៅ គជប និងភាគីគ្រប់បក្សនយោបាយទំាងអស់សហការគ្នាឲ្យការបោះឆ្នោតថ្នាក់ជាតិឆ្នាំ២០១៨ខាងមុននេះ ទទួលបានលទ្ធផលវិជ្ជមានប្រសើរជាងការបោះឆ្នោត ឃុំ សង្កាត់ ឆ្នាំនេះទៀត។
ដោយឡែក ភាពមិនប្រក្រតីមានតិចតូចតែប៉ុណ្ណោះ ដោយលោកថា នៅតាមការិយាល័យខ្លះខ្វះសម្ភារ និង រឹតត្បិតសេរីភាពខ្លះៗរបស់អ្នកសង្កេតការណ៍ជាដើម។
គណកម្មាធិការជាតិរៀបចំការបោះឆ្នោត (គ.ជ.ប) អះអាងថា ប្រជាពលរដ្ឋដែលមានសិទ្ធិបោះឆ្នោតចំនួន៨៥.៧៤% បានទៅបោះឆ្នោតជ្រើសរើសក្រុមប្រឹក្សាឃុំសង្កាត់អាណតិ្តទី៤ ក្នុងចំណោមពលរដ្ឋចំនួនជាង ៧ ៨៦៥ ០៣៣នាក់ ប្រាំពីលានប្រាំបីសែនប្រាំមួយម៉ឺនប្រាំពាន់សាមសិបបីនាក់) ខណៈការពីបោះឆ្នោតជាតិកាលឆ្នាំ ២០១៣ មានពលរដ្ឋចេញទៅបោះឆ្នោតចំនួន ៦៨,៥%តែប៉ុណ្ណោះ។
បើតាមនីតិវិធីរបស់ គ.ជ.ប លទ្ធផលជាផ្លូវការនៃការបោះឆ្នោតជ្រើសរើសក្រុមប្រឹក្សាឃុំសង្កាត់នឹងត្រូវប្រកាសជាផ្លូវការនៅថ្ងៃទី២៥ ខែមិថុនាខាងមុខនេះ៕
