អ្នកជំនាញខាងអភិបាលកិច្ច និងសង្គម យល់ឃើញថាការសម្រេចនៅតែអោបក្រសោបមន្ត្រីខ្លួនរបស់បក្សប្រជាជន ជាមួលហេតុដែលធ្វើឲ្យបក្សនេះកាន់តែបាត់បង់សំឡេងឆ្នោតនាពេលខាងមុខទៀត។ ការយល់ឃើញនេះគឺបន្ទាប់ពីបក្សប្រជាជនសម្រេចទទួលយកមេឃុំចៅសង្កាត់ ដែលចាញ់ការបោះ ឆ្នោតក្រុមប្រឹក្សាឃុំសង្កាត់ឆ្នាំ២០១៧ មកធ្វើជាជំនួយការរដ្ឋមន្ត្រីឬជំនួយស្ថាប័នរបស់រដ្ឋ។
បើមិនមានអ្វីប្រែប្រួលទេ មេឃុំ ចៅសង្កាត់របស់បក្សប្រជាជនដែលមិនជាប់ឆ្នោត ជាង៤០០នាក់នឹងត្រូវបានបក្សនេះជ្រើសយកមកធ្វើជាជំនួយការ និងទីប្រឹក្សា រដ្ឋមន្ត្រីនៅតាមក្រសួងស្ថាប័នរដ្ឋនានា ក្រោយពីលទ្ធផលនៃការបោះឆ្នោតឃុំសង្កាត់ចេញជាផ្លូវការ។
កាលពីដំបូងឡើយ មានលិខិតរបស់លោកស្រី ម៉ែន សំអន ក្នុងនាមលោក ហ៊ុន សែន ប្រធានគណបក្សប្រជាជនកម្ពុជា បានបញ្ជាឲ្យអ្នកចុះពង្រឹងបក្សនៅតាមខេត្តនីមួយត្រៀមខ្លួន ទំនុកបម្រុងថវិកាដល់មេឃុំ និងចៅសង្កាត់របស់គណបក្សដែលមិនជាប់ឆ្នោត។ ប៉ុន្តែក្រោយមកក៏មានលិខិតថ្មីមួយទៀត ដោយគណបក្សប្រជាជនកម្ពុជា តម្រូវឲ្យរដ្ឋមន្រ្តីតាមក្រសួងនីមួយៗត្រៀមទទួលមេឃុំ និងចៅសង្កាត់ដែលមិនជាប់ឆ្នោតមកធ្វើជាជំនួយការឬទីប្រឹក្សាវិញម្តង។
អ្នកឯកទេសខាងអភិបាលកិច្ច លោក ឱក សេរីសោភក្កិ៍ យល់ថាអ្វីដែលគណបក្សប្រជាជនកំពុងតែធ្វើ គឺបង្កឲ្យមានភាពច្រលូកច្រឡំរវាងកិច្ចការគណបក្ស និងកិច្ចការរដ្ឋ តែលោកថាការដែលផ្តល់តំណែងថ្មីដល់មេឃុំចៅសង្កាត់ដែលចាញ់ឆ្នោតនោះ គឺបង្កើនលទ្ធភាពការងារផង ហើយក៏ជាការបង្កឲ្យមានបញ្ហាកាន់តែធ្ងន់ដោយសារកិច្ចការបក្សកាន់តែចូលមកក្នុងកិច្ចការដឹកនាំរដ្ឋកាន់តែច្រើន។
លោកថា៖ « បើសិនជាយើងគិតពីបទពិសោធន៍រដ្ឋបាល ពួកគាត់ប្រកដជាមានបទពិសោធន៍រដ្ឋបាលជាក់ច្បាស់មែន! បើសិនជាប្រើក្នុងផ្លូវល្អផ្លូវត្រូវផ្លូវដែលដើម្បីបម្រើការពារប្រជាពលរដ្ឋខ្ញុំគិតថាវាបែបជាមិនអាក្រក់ទេ ក៏ប៉ុន្តែបើសិនជាគាត់ធ្វើការចូលរដ្ឋាភិបាលមែនដើម្បីទទួលបានតំណែង តែប្រើតួនាទីរបស់បក្សដែលបែងចែកគ្នាមិនដាច់ ខ្ញុំគិតថាប្រជាពលរដ្ឋគាត់មិនល្ងង់ទៀតទេ។ លោកនឹងពិនិត្យមើលឃើញហើយនឹងធ្វើការសម្រេចចិត្តក្នុងពេលមួយឆ្នាំទៀតដូច្នេះហើយនេះវាដូចជាកាំបិតមុខពីរអញ្ចឹង » ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គឹមអេង មានប្រសាសន៍ថានេះជាគោលនយោបាយរបស់បក្សនីមូយៗ គ្មានអ្វីចម្លែកនោះទេ តែលោកថាគណបក្សកាន់អំណាចគួរតែពិនិត្យអំពីបញ្ហានេះផងដែរ ដោយថាការជ្រើសរើសអ្នកដែលពលរដ្ឋមិនពេញចិត្តមកធ្វើការងារមានមុខដំណែងបែបនេះវារឹតតែធ្វើឲ្យបក្សប្រជាជនបាត់បង់សំឡេងឆ្នោតឆ្នាំ២០១៨ទៅវិញទេ។
លោកថា៖ « នេះខ្ញុំគិតថាវាជាគោលនយោបាយរបស់បក្សនីមួយៗ ក៏ប៉ុន្តែទាំងគណបក្សកាន់អំណាចក្តី ទាំងគណបក្សប្រឆាំងក្តីនៅពេលដែលមេឃុំចៅសង្កាត់ខ្លួនឯងនៅពេលដែលអត់ទទួលបានការគាំទ្រ គួរតែពិភាក្សាពីមូលហេតុដែលថាប្រជាជនគេអត់ចូលចិត្តឬក៏ប្រជាជនគេចូលចិត្ត កាលណាប្រជាជនគេមិនចូលចិត្តកាលណាយើងខំព្យាយាមលើកទឹកចិត្តកាន់តែខ្លាំងថែមទៀត អាហ្នឹងគឺវាមិនបានផ្តល់ផលចំណេញអីដល់គណបក្សទេ » ។
នាយកប្រតិបត្តិសម្ព័ន្ធគណនេយ្យភាពសង្គមលោក សន ជ័យ យល់ថាការតែងតាំងអ្នកទាំងនេះមកជាជំនួយការនៅស្ថាប័នរដ្ឋនេះ វាអាចនឹងប៉ះពាល់ដល់ប្រសិទ្ធិភាពការងាររបស់អ្នកទាំងនោះ។ លោកពន្យល់ថាបើសិនជាខ្លួនមិនអាចធ្វើការងាររក្សាទំនុកចិត្តប្រជាពលរដ្ឋឲ្យពេញចិត្តនឹងខ្លួនផងនោះ ការតែងតាំងនេះវាមិនត្រឹមតែបន្ថែមនូវបរិមាណមន្ត្រីកាន់តែច្រើនលើសលប់ក្នុងជួររដ្ឋាភិបាលប៉ុណ្ណោះទេ វារឹតតែធ្វើឲ្យប្រជាពលរដ្ឋកាន់តែមិនពេញចិត្តទៅនឹងរដ្ឋាភិបាលនេះបន្ថែមទៀត។
លោកថា៖ « ការដែលធ្វើឲ្យប្រជាពលរដ្ឋនៅមានការមន្ទិល ដែលធ្វើឲ្យប្រជាពលរដ្ឋគាត់អស់ជំនឿ វាបានបង្ហាញនូវភស្ភុតាងយ៉ាងសំខាន់នៅពេលបោះឆ្នោតក្រុមប្រឹក្សាឃុំសង្កាត់ ឆ្នាំ២០១៧នេះរួចទៅហើយ អញ្ចឹងជំហានបន្តទៀតប្រសិនជានៅតែមានការសម្រេចចិត្តណាមួយដែលមានពាក់ព័ន្ធនូវចំណុចដែលពលរដ្ឋគាត់មិនពេញចិត្តហ្នឹងខ្ញុំគិតថាវាជាលទ្ធផលមួយដែលបង្ហាញនៅពេលបោះឆ្នោតឆ្នាំ២០១៨ខាងមុខហ្នឹង! » ។
បើតាមមន្រ្តីគណបក្សប្រជាជនគឺលោក ហ៊ុន សែន មិនដែលបោះបង់មន្ត្រីរបស់ខ្លួនចោលនោះទេបើទោះបីជាមន្ត្រីនោះ ពលរដ្ឋមិនពេញចិត្តក៏ដោយ សំខាន់ឲ្យតែស្មោះត្រង់នឹងគណបក្ស។ ជាក់ស្តែងប្រធាននាយកដ្ឋានតម្រង់ទិសនៃក្រសួងអប់រំ លោក គ្រី ស៊ាងឡុង ដែលមានរឿងអាស្រូវផ្លូវភេទនៅប្រទេសកូរ៉េខាងត្បូងបន្ទាប់ពីដកបញ្ឃរជើងមួយរយៈ នាពេលថ្មីៗនេះ ត្រូវបានក្រសួងអប់រំតម្លើងឋានៈឲ្យបន្ថែមទៀត។ មួយវិញទៀតកងអង្គរក្សរបស់លោក ហ៊ុន សែន ដែលបានវាយសមាជិកសភាបក្សប្រឆាំងពីរនាក់នោះក៏ត្រូវបានរដ្ឋាភិបាលលោក ហ៊ុន សែន តម្លើងឋានៈឲ្យបន្ថែមទៀតដែរបន្ទាប់ពីអនុវត្តន៍ទោសជាប់ពន្ធនាគារតែ១ឆ្នាំរួចមក។
ករណីទាំងនេះត្រូវបានលោក យង់ គិមអេង យល់ថាវាជាអ្វីដែលធ្វើឲ្យពលរដ្ឋមិនពេញចិត្តនោះទេ ហើយវាអាចធ្វើឲ្យប៉ះពាល់ដល់ការគាំទ្រទៅលើបក្សកាន់អំណាចផងដែរ។
លោកថា៖ « ចំពោះបញ្ហានេះកាលណាដែលនៅតែអោបក្រសោបអ្នកដែលធ្វើទង្វើមិនល្អចំពោះប្រជាពលរដ្ឋអាហ្នឹងប្រជាពលរដ្ឋគេមិនពេញចិត្តទេ កាលណាប្រជាពលរដ្ឋគេមិនពេញចិត្តអាហ្នឹងវាប៉ះពាល់ដល់ប្រជាប្រិយភាពគណបក្សហ្នឹងហើយនេះជារឿងសំខាន់ ក៏ប៉ន្តែរឿងដែលគួរសម្រេចចិត្តអាស្រ័យលើនយោបាយរបស់គណបក្ស បើគិតថារឿងហ្នឹងចំណេញគួរតែគណបក្សហ្នឹងគេធ្វើទៅយើងជាអ្នកវិភាគយើងគ្រាន់តែវិភាគថារឿងខាតរឿងចំណេញនោះវាយ៉ាងមិច » ។
ទោះជាយ៉ាងនេះក្តី ប្រធានគណបក្សប្រជាជនកម្ពុជាលោក ហ៊ុន សែន ថាបក្សខ្លួននៅតែខ្លាំងដដែលនឹងទទួលបានអ្នកគាំទ្រកើនឡើងថែមទៀត នឹងថានៅឆ្នាំ២០១៨ខាងមុខគណបក្សលោកនឹងនៅតែឈ្នះដឹកនាំរដ្ឋបន្តទៀត ខណៈគណបក្សប្រឆាំងថាខ្លួនត្រូវការសំឡេងតែបន្តិចទៀតប៉ុណ្ណោះដើម្បីឈ្នះការបោះឆ្នោតឆ្នាំ២០១៨៕
