គណបក្សប្រឆាំង ទទួលស្គាល់លទ្ធផលនៃការបោះឆ្នោតដោយប្រយ័ត្នប្រយែង និងទទូចឲ្យ គ.ជ.ប កែតម្រូវចំណុចអវិជ្ជមានមួយចំនួន។
ក្នុងសេចក្ដីថ្លែងការណ៍ ចេញផ្សាយនៅថ្ងៃចន្ទនេះ គណបក្សសង្គ្រោះជាតិបានទទួលស្គាល់លទ្ធផលបោះឆ្នោតឃុំសង្កាត់អាណត្តិទី៤ ប៉ុន្ដែស្នើឲ្យគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប កែលម្អចំណុចខ្លះ។
គណបក្សសង្គ្រោះជាតិវាយតម្លៃថា ដំណើរការបោះឆ្នោតឃុំសង្កាត់លើកនេះ មិនបានបំពេញតាមគោលការណ៍បោះឆ្នោតដោយសេរី ត្រឹមត្រូវ និងយុត្ដិធម៌ឡើយដោយលើកឡើងថា មុនការបោះឆ្នោត មានការគាបសង្កត់មកលើគណបក្សសង្គ្រោះជាតិ តាមរយៈការបណ្ដេញអតីតប្រធានគណបក្សសង្គ្រោះជាតិលោក សម រង្ស៊ី មិនឲ្យចូលរួមប្រកួតប្រជែងក្នុងឆាកនយោបាយ។
គណបក្សសង្គ្រោះជាតិក៏បារម្ភអំពីចំនួនប្រជាពលរដ្ឋខ្មែរ ដែលធ្វើការក្រៅប្រទេសប្រមាណជាង១លាននាក់ បានបាត់បង់សិទ្ធិ ខណៈពលរដ្ឋមួយចំនួនមិនមានឯកសារគ្រប់គ្រាន់ ដើម្បីបានបោះឆ្នោត។
ចំពោះដំណាក់កាលរាប់សន្លឹកឆ្នោត គណបក្សសង្គ្រោះជាតិអះអាងថា មានការិយាល័យបោះឆ្នោតជាច្រើនបានបិទទ្វារ និងបង្អួច ខណៈភ្នាក់ងារសង្កេតការណ៍របស់គណបក្សក៏រងការគំរាមកំហែង ដូចជា នៅក្នុងខេត្តបាត់ដំបង រាជធានីភ្នំពេញ និងពោធិ៍សាត់ជាដើម។
កាលពីថ្ងៃអាទិត្យទី២៥ខែមិថុនាម្សិលមិញ បន្ទាប់ពីប្រកាសលទ្ធផលភ្លាម គណបក្សប្រជាជនកម្ពុជារបស់លោកនាយករដ្ឋមន្ដ្រី ហ៊ុន សែន បានប្រកាសយ៉ាងឪឡារិក ដោយទទួលស្គាល់លទ្ធផលបោះឆ្នោតនោះ៕