អាជ្ញាធរថៃបានបើកយុទ្ធនាការមួយ ដាក់ទោសលើជនណា ដែលផ្សព្វផ្សាយជំរុញឲ្យមានការប្រើប្រាស់គ្រឿងស្រវឹង នៅក្នុងប្រទេសនេះ។
យោងតាមការចុះផ្សាយរបស់សារព័ត៌មានជាតិថៃ The Nation ឲ្យដឹងថា កាលពីខែកក្កដាឆ្នាំ២០១៧កន្លងទៅ អាជ្ញាធរថៃបានដាក់ចេញនូវយុទ្ធនាការថ្មីមួយ ក្នុងគោលបំណងហាមឃាត់មិនឲ្យតារាសម្ដែងល្បីៗ និងអ្នកដែលបង្ហោះសារ ឬរូបភាពជាសាធារណៈ ជំរុញឲ្យមានការបរិភោគគ្រឿងស្រវឹង ហើយដែលបំពានច្បាប់គ្រប់គ្រងការប្រើប្រាស់គ្រឿងស្រវឹង ឆ្នាំ២០០៨។
ប៉ុន្ដែច្បាប់នេះ មិនបានដាក់ទោសពន្ធនាគារលើអ្នកប្រព្រឹត្តខុសទេ ដោយគ្រាន់តែពិន័យជាប្រាក់ពី១០ទៅ២០០០ដុល្លារ ករណីមិនរាងចាល។
សារព័ត៌មានថៃ The Nation ឲ្យដឹងទៀតថា កាលពីពេលថ្មីៗនេះ នគរបាលថៃក៏បានឃាត់ខ្លួនស្ដ្រីផ្សព្វផ្សាយស្រាបៀរចំនួន៣នាក់ ដែលសុទ្ធជានារីក្នុងវ័យ២០ឆ្នាំ កាលពីយប់ថ្ងៃទី៣១កក្កដា ក្នុងស្រុកមួង ខេត្តសារាបុរី។
ការឃាត់ខ្លួននេះ ធ្វើឡើងបន្ទាប់ពីស្ដ្រីផ្សព្វផ្សាយស្រាបៀទាំងនោះ បានបង្ហោះវីដេអូឡាយលើហ្វេសប៊ុកប្រមាណជិត៥នាទី កាលពីថ្ងៃទី២៣កក្កដា ដោយថា ពួកគេបាននិយាយក្នុងវីដេអូនោះថា «ទិញស្រាបៀលីអូមួយដប ថែមជូនមួយឥតគិតថ្លៃ។ អ្នកអាចចូលមកញាំជាមួយពួកយើងឲ្យស្រវឹង។ ពួកយើងចង់ស្រវឹង។ ប្រញាប់ឡើង មកទីនេះ»។
នគរបាលថៃចោទពួកគេថា បានបំពាននឹងច្បាប់គ្រប់គ្រងការប្រើប្រាស់គ្រឿងស្រវឹង ដែលហាមមិនឲ្យមានការជំរុញការប្រើប្រាស់គ្រឿងស្រវឹងជាសារណៈ៕
