ប្រធានស្តីទីគណបក្សអំណាចខ្មែរទាមទារឲ្យតុលាការមានចំណាត់ការផ្លូវច្បាប់ លើបុគ្គលអ្នកនយោបាយ៤រូបបន្ថែមទៀត លោកថាបានប្រមាថដល់ប្រជាពលរដ្ឋ ជាតិ សាសនា និងព្រះមហាក្សត្រ ដែលការស្នើនេះធ្វើឡើងបន្ទាប់ពីប្រធានបក្សនេះត្រូវបានចាប់ខ្លួន។
លោក សួង សុភណ្ឌ បានថ្លែងប្រាប់អ្នកសារព័ត៌មាននៅមុខស្នាក់ ការបក្សនៅព្រឹកថ្ងៃទី១៥ ខែសីហាថា ប្រធានបក្សរបស់លោក គឺលោក សួន សេរីរដ្ឋា មិនមានកំហុស រហូតដល់ចាប់ខ្លួននោះទេ ដោយលោកថា នោះគ្រាន់តែនិយាយពីស្ថានភាពរបស់កងទ័ពដែលកំពុងជួបការលំបាក។
លោក សុភណ្ឌ បន្តថា ការនិយាយរបស់មេបក្សលោកមិនបានធ្វើឲ្យប៉ះពាល់សន្តិសុខជាតិនោះទេ ផ្ទុយទៅវិញលោកថា លោក ហ៊ុន សែន ព្រមានពីសង្គ្រាមសម្លាប់ពលរដ្ឋ លោក ទៀ បាញ់ និងលោក វង សូត ប្រមាថវាយពលរដ្ឋ និង លោក ខឹម វាសនា ប្រមាថជាតិសាសន៍ ទើបត្រូវតុលាការចាត់ការ។
លោកថ្លែងថា «ករណីលោក វង សូត វាយក្បាលប្រជាពលរដ្ឋនិងគល់ឬស្សី លោក ទៀ បាញ់ ប្រមាថប្រជាពលរដ្ឋខ្មែរ វាយបាក់ធ្មេញប្រសិនបើប្រជាពលរដ្ឋតវ៉ា[លទ្ធផលឆ្នោត]ករណីលោក ហ៊ុន សែន ខ្លួនឯងប្រមាថប្រជាពលរដ្ឋខ្មែរ បើចាញ់មានសង្គ្រាម អ្នកដែលប្រមាថព្រះមហាក្សត្រដឹងអ្នកណាទេ លោក ខឹម វាសនា ទៅចាប់ទៅ ហេតុអ្វីមិនព្រមចាប់ …ឲ្យលោក ខឹម វាសនា ឆ្លើយមក ក្នុងនាមខ្ញុំជាអ្នក នយោបាយម្នាក់ ហើយលោក ហ៊ុន សែន ដូចគ្នា ឬចំណាត់ការតុលាការដូចគ្នា ព្រះរាជអាជ្ញាដែលមានយុត្ថាធិការបញ្ជាដោយផ្ទាល់ចាប់ ឬឃាត់ខ្លួននណាម្នាក់មិនព្រមទៅចាប់ ទៅឃាត់ទៅ អ្នកដែលប៉ះពាល់ស្ថាប័នព្រះមហាក្សត្រ តែផ្ទុយទៅវិញមិនធ្វើ ហេតុអ្វីបានមកធ្វើចំណាត់លើលោក សួន សេរីរដ្ឋា»។
ភ្លាមៗ VOD មិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញ លោក លី សុផាណា បានទេ ខណៈនៅព្រឹកថ្ងៃព្រះរាជអាជ្ញាលោក សៀង សុខ និងក្រឡាបញ្ជី បានចុះទៅទីស្នាក់ការគណបក្សអំណាចខ្មែរនៅខណ្ឌទួលគក ដើម្បីស្រាវជ្រាវរកវត្ថុតាងបន្ថែមពាក់ព័ន្ធ សំណុំរឿងលោក សួន សេរីរដ្ឋា។
ចំណែក អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា សាររបស់លោក ហ៊ុន សែន លោក ទៀ បាញ់ និងលោក វង សូត្រ មិនមែនជាការគំរាមកំហែងនោះទេ ដោយលោកថា គ្រាន់តែជាសារគ្រើនរំលឹកកុំឲ្យមានអ្នកតវ៉ាប្រឆំាងលទ្ធផលឆ្នោតឆ្នាំ២០១៨តែប៉ុណ្ណោះ។
លោកនិយាយថា «មិនមែនជារឿងគំរាមទេ សម្តេចតេជោ ហ៊ុន សែន គឺលោកមានប្រសាសន៍ក្នុងករណីដែលមានការតវ៉ាលទ្ធផលបោះឆ្នោត ដូចមានច្បាប់ចែងគឺថាច្បាប់គណបក្សនយោបាយអ្នកណាតវ៉ាលទ្ធផលបោះឆ្នោត អ្នកហ្នឹងត្រូវបាត់បង់អាសនៈហើយ គឺថាឆ្នាំ២០១៨ កាលណាតវ៉ាពីលទ្ធផលបោះឆ្នោត ត្រូវរំលាយ[គណបក្ស]ចោល ត្រូវបង្ក្រាបគឺបង្ក្រាប មិនអាចបណ្តែតបណ្តោយទុកឲ្យសភាពការដូចឆ្នាំ២០១៣ ដែលមានអំពើអនាធិបតេយ្យក្នុងការតវ៉ាលទ្ធផលបោះឆ្នោតបាន នៅឆ្នាំ២០១៨ទៀតទេ»។
លោក សុខ ឥសាន ឲ្យដឹងទៀតថា ករណីលោកសួន សេរីរដ្ឋា លោកថាទុកឲ្យតុលាការចាត់វិធានការតាមនីតិវិធីច្បាប់ ដោយថាគណបក្សប្រជាជនមិនមានសិទ្ធិជ្រៀតជ្រែកិច្ចការរបស់តុលាការនោះទេ។
លោក សួន សេរីរដ្ឋា ប្រធានគណបក្សអំណាចខ្មែរ ត្រូវបានសមត្ថកិច្ចចាប់ខ្លួនកាលពីថ្ងៃទី១៣ខែសីហា ក្រោយពេលដែលរិះគន់ ករណីបញ្ជូនទ័ពទៅព្រំដែនត្រៀមបណ្តេញទ័ពឡាវចេញពីទឹកដីកម្ពុជាដោយថាអាចធ្វើឲ្យកងទ័ពរងគ្រោះ ចំណែកអ្នកបានផលគឺមន្ត្រីថ្នាក់លើ៕
