គណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវឲ្យពលរដ្ឋខ្មែរនៅក្រៅប្រទេស មកចុះឈ្មោះបោះឆ្នោតចាប់ពីខែកញ្ញាដល់ខែវិច្ឆិកា ឆ្នាំ២០១៧ ដើម្បីមានសិទ្ធិបោះឆ្នោត ជ្រើសរើសមេដឹកនាំដែលខ្លួនពេញចិត្ត។
ក្នុងសេចក្តីអំពាវនាវរបស់គណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃ៣០ខែសីហាម្សិលមិញបានឲ្យដឹងថា ការចុះឈ្មោះបោះឆ្នោតថ្មីឆ្នាំ២០១៧ មានរយៈពេល៧០ថ្ងៃ ដែលនឹងចាប់ផ្ដើម ពីថ្ងៃទី០១ ខែកញ្ញា ដល់ថ្ងៃទី០៩ ខែវិច្ឆិកា ខាងមុខ។
ករណីនេះ គ.ជ.ប អំពាវនាវឲ្យពលរដ្ឋខ្មែរដែលកំពុងបំពេញបេសកកម្ម ធ្វើការ ឬសិក្សានៅក្រៅប្រទេសទំាងអស់ ដែលមានសិទ្ធិបោះឆ្នោត ហើយមិនទាន់ចុះឈ្មោះបោះឆ្នោតឆ្នាំ២០១៦ និងអ្នកដែលទើបគ្រប់អាយុ១៨ឆ្នាំគិតដល់ថ្ងៃបោះឆ្នោត ថ្ងៃទី២៩ ខែកក្កដា ឆ្នាំ២០១៨ ត្រូវត្រឡប់មកកម្ពុជាទៅចុះឈ្មោះនៅតាមសាលាឃុំ សង្កាត់ និងនៅតាមភូមិមួយចំនួនទូទំាងប្រទេស ជារៀងរាល់ថ្ងៃចន្ទ ដល់ថ្ងៃអាទិត្យ ។
គ.ជ.ប ក៏បានអំពាវនាវដល់ស្ថានឯកអគ្គរាជទូត និងស្ថានកុងស៊ុលកម្ពុជាប្រចំានៅក្រៅប្រទេស ជួយផ្សព្វផ្សាយព័ត៌មាននេះដល់ប្រជាពលរដ្ឋខ្មែរនៅក្រៅប្រទេសបានដឹង ដើម្បីឲ្យពួកគេបានទៅចុះឈ្មោះបោះឆ្នោតគ្រប់ៗគ្នា។
បើតាមក្រសួងការងារ បច្ចុប្បន្នពលករខ្មែរចំណាកស្រុកទៅធ្វើការនៅក្រៅប្រទេសមានជាង ១,១៥លាននាក់ ដែលកំពុងធ្វើការនៅ ថៃ កូរ៉េ ជប៉ុន ម៉ាឡេស៊ី និងសិង្ហបុរី ក្នុងនោះជាង១លាននាក់ធ្វើការនៅប្រទេសថៃ។ ចំនូននេះនៅមិនទាន់រាប់បញ្ជូលជនជាតិខ្មែរដែលទៅរស់នៅក្រៅប្រទេសដែលពុំមែនជាពលករចំណាកស្រុកនៅឡើយទេ។
ការបោះឆ្នោតឃុំសង្កាត់ កាលពីថ្ងៃទី៤ខែមិថុនាឆ្នាំ២០១៧កន្លងទៅនេះ អ្នកដែលទៅចុះឈ្មោះបោះឆ្នោតជាង៧លាន៨សែននាក់ ស្មើជាង៨១ភាគរយនៃចំនួនពលរដ្ឋដែលមានអាយុគ្រប់បោះឆ្នោតជាង៩លាន៦សែននាក់៕
