មេដឹកនាំគណបក្សប្រឆំាងអំពាវនាវទៅប្រជាពលរដ្ឋខ្មែរទំាងអស់ ទៅចុះឈ្មោះបោះឆ្នោតចាប់ពីខែកញ្ញាដល់ខែវិច្ឆិកាឆ្នាំ២០១៧ ដើម្បីថាមានសិទ្ធិបោះឆ្នោត ជ្រើសរើសមេដឹកនាំដែលខ្លួនពេញចិត្ត។
ប្រធានគណបក្សសង្គ្រោះជាតិលោក កឹម សុខា បានបង្ហោះវីដេអូឃ្លីបនៅលើហ្វេសប៊ុករបស់លោក នៅចំថ្ងៃចុះឈ្មោះបោះឆ្នោតដំបូងថា ការចុះឈ្មោះបោះឆ្នោតថ្មីឆ្នាំ២០១៧ មានរយៈពេល៧០ថ្ងៃ ដែលចាប់ផ្ដើម ពីថ្ងៃទី០១ ខែកញ្ញានេះ ដល់ថ្ងៃទី០៩ ខែវិច្ឆិកា ខាងមុខ។
ករណីនេះ លោក កឹម សុខា អំពាវនាវឲ្យពលរដ្ឋខ្មែរទំាងក្នុងនិងក្រៅប្រទេសទំាងអស់ រួមទំាងព្រះសង្ឃដែលមានសិទ្ធិបោះឆ្នោត ហើយមិនទាន់ចុះឈ្មោះបោះឆ្នោតឆ្នាំ២០១៦ និងអ្នកដែលទើបគ្រប់អាយុ១៨ឆ្នាំគិតដល់ថ្ងៃបោះឆ្នោត ថ្ងៃទី២៩ ខែកក្កដា ឆ្នាំ២០១៨ ត្រូវទៅចុះឈ្មោះបោះឆ្នោតនៅតាមសាលាឃុំ សង្កាត់ និងនៅតាមភូមិមួយចំនួនទូទំាងប្រទេស ដោយលោកថា អ្នកទៅចុះឈ្មោះ ត្រូវយកអត្តសញ្ញាណប័ណ្ណសញ្ជាតិខ្មែរទំាងចាស់ឬថ្មីទៅជាមួយ។
ប៉ុន្តែលោក កឹម សុខា ថា ប្រសិនបើប្រជាពលរដ្ឋមិនមានអត្តសញ្ញាណប័ណ្ណ ពួកគេក៏អាចទៅចុះឈ្មោះបោះឆ្នោតបានដែរ ដោយថាពលរដ្ឋត្រូវទៅសាលាឃុំ ឬសង្កាត់របស់សាមីខ្លួនស្នាក់នៅ ដើម្បីសុំឯកសារបញ្ជាក់អត្តសញ្ញាណសម្រាប់បំរើការចុះឈ្មោះបោះឆ្នោតជំនួស ទើបយកទៅចុះឈ្មោះបោះឆ្នោតបាន។
ផ្ទុយទៅវិញ មេបក្សប្រឆំាងរូបនោះបានអះអាងថា បើប្រជាពលរដ្ឋមិនទៅចុះឈ្មោះបោះឆ្នោត ដើម្បីជ្រើសរើសថ្នាក់ដឹកនាំដែលខ្លួនពេញចិត្តទេ លោកថាស្មើនឹងពួកគេបាត់សិទ្ធិជាម្ចាស់ប្រទេស។
លោកនិយាយថា៖ «បើបងប្អូនមិនបានទៅបោះឆ្នោតមានន័យថា បងប្អូនទុកឲ្យអ្នកដទៃសម្រេចជោគ វាសនាអនាគត់ប្រទេសជាតិ និងអនាគត់បងប្អូនជំនួសបងប្អូនគឺមានន័យថាបងប្អូនបាត់សិទ្ធិជាម្ចាស់ ប្រទេសជាតិជាមិនខាន»។
គណៈកម្មាធិការជាតិរៀបចំការបោះឆ្នោត កាលពីថ្ងៃ៣០ខែសីហា ក៏បានអំពាវនាវឲ្យពលរដ្ឋខ្មែរដែលកំពុងបំពេញបេសកកម្ម ធ្វើការ ឬសិក្សានៅក្រៅប្រទេសទំាងអស់ ដែលមានសិទ្ធិបោះឆ្នោត ហើយមិនទាន់ចុះឈ្មោះបោះឆ្នោតឆ្នាំ២០១៦ និងអ្នកដែលទើបគ្រប់អាយុ១៨ឆ្នាំ គិតដល់ថ្ងៃបោះឆ្នោត ថ្ងៃទី២៩ ខែកក្កដា ឆ្នាំ២០១៨ ត្រូវត្រឡប់មកកម្ពុជាទៅចុះឈ្មោះនៅតាមសាលាឃុំ សង្កាត់ និងនៅតាមភូមិមួយចំនួនទូទំាងប្រទេស ជារៀងរាល់ថ្ងៃចន្ទ ដល់ថ្ងៃអាទិត្យផងដែរ។ ខណៈបច្ចុប្បន្នពលករខ្មែរចំណាកស្រុកទៅធ្វើការនៅក្រៅប្រទេសមានជាង ១,១៥លាននាក់ ដែលកំពុងធ្វើការនៅ ថៃ កូរ៉េ ជប៉ុន ម៉ាឡេស៊ី និងសិង្ហបុរី ក្នុងនោះជាង១លាននាក់ធ្វើការនៅប្រទេសថៃ។ ចំនូននេះនៅមិនទាន់រាប់បញ្ជូលជនជាតិខ្មែរដែលទៅរស់នៅក្រៅប្រទេសដែលពុំមែនជាពលករចំណាកស្រុកនៅឡើយទេ។
គួររំឮកថា ការបោះឆ្នោតឃុំសង្កាត់ កាលពីថ្ងៃទី៤ខែមិថុនាឆ្នាំ២០១៧កន្លងទៅនេះ អ្នកដែលទៅចុះឈ្មោះបោះឆ្នោតជាង៧លាន៨សែននាក់ ស្មើជាង៨១ភាគរយនៃចំនួនពលរដ្ឋដែលមានអាយុគ្រប់បោះឆ្នោតជាង៩លាន៦សែននាក់៕