សមាជិកព្រឹទ្ធសភាអាមេរិកម្នាក់ បានចេញលិខិតមួយគំរាមថា បើរដ្ឋាភិបាលកម្ពុជា មិនដោះលែងមេដឹកនាំបក្សប្រឆាំងលោក កឹម សុខា មុនថ្ងៃទី៩ ខែវិច្ឆិកាទេ លោករួមជាមួយសមាជិកព្រឹទ្ធសភាផ្សេងទៀត នឹងបញ្ចុះបញ្ចូលរដ្ឋការ លោក ដូណាល់ ត្រាំ ឲ្យហាមមន្ត្រីជាន់ខ្ពស់កម្ពុជា មិនឲ្យជាន់ដីអាមេរិក។
សមាជិកព្រឹទ្ធសភានៃគណបក្សសាធារណរដ្ឋ មកពីរដ្ឋ តិចសាស លោក លោក ថេត គ្រូហ្ស (Ted Cruz) កាលពីម្សិលមិញ ផ្ញើលិខិតទៅឯកអគ្គរាជទូតខ្មែរប្រចាំរដ្ឋធានីវ៉ាស៊ីនតោនលោក ជុំ ប៊ុនរ៉ុង បានលើកឡើងពីការចាប់ខ្លួនលោក កឹម សុខា និងការរៀបចំរំលាយគណបក្សសង្គ្រោះជាតិ។ លោកថាសកម្មភាពទាំងនេះ មិនត្រឹមតែធ្វើឲ្យប៉ះពាល់ដល់ទំនាក់ទំនងកម្ពុជានិងអាមេរិកនោះទេ គឺថែមទាំងធ្វើឲ្យប៉ះពាល់ធ្ងន់ធ្ងរដល់លទ្ធិប្រជាធិបតេយ្យនៅកម្ពុជាទៀតផង។
សមាជិកព្រឹទ្ធសភារូបនេះ បានកំណត់ពេលត្រឹមថ្ងៃទី៩ខែវិច្ឆិកាថា បើមិនមានការដោះលែងលោក កឹម សុខា ទេ លោកនឹងស្វែងរកការដាក់សម្ពាធបន្ថែម។
លោកសរសេរក្នុងន័យថា៖ «បើសិនជាមិនមានការដោះលែងលោក កឹម សុខា នៅត្រឹមថ្ងៃទី៩ខែវិច្ឆិកាទេ ខ្ញុំនិង ក្រុមការងាររបស់ខ្លួន នឹងធ្វើការងារជាមួយរដ្ឋការរបស់ លោក ត្រាំ ដើម្បីហាមមន្ត្រីរដ្ឋាភិបាលកម្ពុជាដែលពាក់ព័ន្ធករណីនេះ មិនឲ្យចូលសហរដ្ឋអាមេរិកទេ»។
ប៉ុន្មានថ្ងៃចុងក្រោយនេះ ពលរដ្ឋខ្មែរនៅក្រៅប្រទេស បានតវ៉ានិងដាក់ញត្តិជាបន្តបន្ទាប់ ដើម្បីជំរុញឲ្យរដ្ឋាភិបាលនៃប្រទេសដែលពួកគេកំពុងរស់នៅ ដាក់សម្ពាធរដ្ឋាភិបាលកម្ពុជាឲ្យដោះលែងលោក កឹម សុខា។ ពលរដ្ឋនៅប្រទេសទាំងនោះ រួមមានអូស្ត្រាលី ជប៉ុន កាណាដា កូរ៉េខាងត្បូង និងបារាំងជាដើម។
លោកនាយករដ្ឋមន្ត្រី ហ៊ុន សែន ធ្លាប់ប្រតិកម្មនឹងស្ថានទូតអាមេរិក ដែលអាមេរិកអំពាវនាវ ឲ្យដោះលែងលោក កឹម សុខា ដោយអាមេរិកថា ការព្យាយាមរំលាយបក្សប្រឆាំង ជាការរំលោភឆន្ទៈម្ចាស់ឆ្នោត។
លោកថា៖ «សម្រាប់អ្នកទាំងឡាយ ដែលបកស្រាយថា ការផ្តន្ទាទោសចំពោះមេបក្សប្រឆាំង ដែលប្រព្រឹត្តិអំពើក្បត់ជាតិ និងបក្សនយោបាយ ដែលប្រព្រឹត្តិជាប្រព័ន្ធនៃអំពើក្បត់ជាតិ ដែលអាចនឹងត្រូវរំលាយដោយតុលាការថាក្បត់ឆន្ទៈរាស្រ្ត តើអ្នកមានបាននឹកឃើញកាលពីអ្នកបានផ្តួលរំលំសម្តេច នរោត្តម ព្រះសីហនុ ហើយរហូតទៅដល់រំលាយរបបរាជានិយមអាស្រ័យធម្មនុញ្ញនៅកម្ពុជា តើកាលនោះ អ្នកបានគិតពីឆន្ទៈរាស្រ្តទេ?»។
អ្នកវិភាគនយោបាយ លោក ឯម សុវណ្ណារ៉ា លើកឡើងថា ដោយសារតែកម្ពុជា ជាប់កាតព្វកិច្ចគោរពសិទ្ធិមនុស្ស តាមកិច្ចព្រមព្រៀងនានានោះ លោកថា សហគមន៍អន្តរជាតិ នឹងនៅតែបន្តដាក់សម្ពាធ មកលើរដ្ឋាភិបាល ជំរុញឲ្យកម្ពុជាដើរលើគន្លងប្រជាធិបតេយ្យ។
លោក ឯម សុវណ្ណារ៉ា វិភាគថា កម្ពុជាទេជាអ្នកខាតប្រយោជន៍ បើអ្នកនយោបាយខ្មែរ ធ្វើមិនដឹងមិនឮ ពីការជំរុញ របស់សហគមន៍អន្តរជាតិនោះ។
លោកថា៖ «កម្ពុជាជាប្រទេសហត្ថលេខីនៃអនុសញ្ញាអង្គការសហប្រជាជាតិស្តីពីសិទ្ធិមនុស្ស អាហ្នឹងយើងត្រូវមើលលើគោលការណ៍ហ្នឹងទៀត អាហ្នឹងបានយើងអាចនិយាយគ្នាត្រូវ។ បើសិនជាយើងគិតតែថាកម្ពុជាធ្វើត្រូវ សហគមន៍អន្តរជាតិគេថាអត់ត្រូវ អញ្ចឹងទស្សនៈពីរនៅតែប្រឈមខុសគ្នា អូសបន្លាយពេលកាន់តែយូរបានន័យថាកម្ពុជាកាត់តែខាតបង់ទេ»។
រដ្ឋាភិបាលកម្ពុជាមួយរយៈចុងក្រោយនេះ រងការរិះគន់ពីសហគមន៍អន្តរជាតិ ជាបន្តបន្ទាប់ ដូចជាសហរដ្ឋអាមេរិក អាលឺម៉ង់ បារាំង សភាពអឺរុប និងសហភាពអន្តរសភា IPU ដែលមានសមាជិក១៧៣ប្រទេស ជាដើម ដោយថា របត់ដឹកនាំពេលនេះ កំពុងងាកចេញពីគន្លងប្រជាធិបតេយ្យ និងបានជំរុញឲ្យរដ្ឋាភិបាល ដោះលែង លោក កឹម សុខា បើកលំហ ប្រជាធិបតេយ្យឡើងវិញ ដើម្បីធានាថា រដ្ឋាភិបាលដែលកើតក្រោយបោះឆ្នោតឆ្នាំ២០១៨ជារដ្ឋាភិបាលស្របច្បាប់ កើតចេញពីឆន្ទៈម្ចាស់ឆ្នោត។