មេដឹកនាំគណបក្សប្រជាជនកម្ពុជាបានអំពាវនាវជាថ្មីទៀត ឲ្យសមាជិកគណបក្សប្រឆំាងចុះចូលជាមួយ ជាថ្នូរទៅនឹងការរក្សាតំណែងជាប់ឆ្នោតរបស់ពួកគេ បន្ទាប់ពីបក្សប្រឆំាងត្រូវបានតុលាការសម្រេចរំលាយចោល កាលពីថ្ងៃ១៦ ខែវិច្ឆិកាម្សិលមិញ។
ក្រោយពីរំលាយគណបក្សសង្គ្រោះជាតិភ្លាមៗ កាលពីថ្ងៃព្រហស្បតិ៍ម្សិលមិញ លោក ហ៊ុន សែន បានអំពាវនាវជាថ្មីទៀតតាមទូរទស្សន៍ជាតិ (ទ.ទ.ក) ដោយថា លោកផ្តល់ឱកាសយ៉ាងយូរពីរសប្តាហ៍ឲ្យមន្ត្រីក្រុមប្រឹក្សា ឃុំ សង្កាត់ ស្រុក ខ័ណ្ឌ ខេត្ត របស់គណបក្សប្រឆំាងចុះចូលជាមួយបក្សកាន់អំណាច ដោយលោកសន្យារក្សាតំណែងរបស់ពួកគេ ដែលបានមកតាមរយៈការបោះឆ្នោតទាំងថ្នាក់ជាតិ និងថ្នាក់មូលដ្ឋាន។
លោកថ្លែងថា «ខ្ញុំនៅតែបន្តអំពាវនាវចំពោះបងប្អូនដែលជាសមាជិកក្រុមប្រឹក្សា ឃុំ សង្កាត់ សមាជិកក្រុមប្រឹក្សាខេត្ត ស្រុក ខ័ណ្ឌនៅទូទំាងប្រទេស បងប្អូននៅមានពេលវេលានៅឡើយ ដូច្នេះបងប្អូននៅមានលទ្ធភាពមួយអាទិត្យ ឬច្រើនជាងមួយអាទិត្យបន្តិច នៅមុនពេលដែលគណបក្សនយោបាយនានានឹងដាក់ឈ្មោះទៅកាន់គណៈកម្មាធិការជាតិរៀបចំការបោះឆ្នោត ដើម្បីជំនួសតំណែងបងប្អូនដែលត្រូវបាត់បង់ នេះជាការផ្តល់ឱកាសសម្រាប់បងប្អូនទំាងនោះ ដើម្បីទទួលបាននូវការបំរើប្រជាជនជាបន្តទៀត ក្រោមឆ័តរបស់គណបក្សប្រជាជនកម្ពុជា»។
ផ្ទុយទៅវិញ លោក ហ៊ុន សែន បានព្រមានថា បើមន្ត្រីណា ដែលមិនបានចុះចូល ជាមួយគណបក្សកាន់អំណាច ត្រូវប្រគល់ត្រានិងគិតគូទូទាត់ទ្រព្យសម្បត្តិ ថវិកាដែលជំពាក់នៅក្នុងមូលដ្ឋាន ដោយថាបើមិនដោះស្រាយនឹងត្រូវមានទោសព្រហ្មទណ្ឌ។
ប៉ុន្តែអនុប្រធានគណបក្សសង្គ្រោះជាតិលោក អេង ឆៃអ៊ាង កាលពីម្សិលមិញ បានថ្លែងនៅក្នុងវិទ្យុអាស៊ីសេរី ដោយបង្ហាញជាចម្ងល់ថា បើលោក ហ៊ុន សែន ចោទថា ក្រុមមេដឹកនាំគណបក្សប្រឆំាង ថាក្បត់ជាតិ ប៉ុន្តែ បែរជាលោក ហ៊ុន សែន ព្យាយាមអំពាវនាវឲ្យមន្ត្រីបក្សប្រឆំាង ចុះចូលជាមួយបក្សប្រជាជន ទៅវិញ ករណីនេះ លោកចោទលោក ហ៊ុន សែន វិញថា គឺក្បត់ជាតិដូចគ្នា។
លោកថ្លែងថា «វាចំឡែក…គឺគាត់[លោក ហ៊ុន សែន]បានចោទគណបក្សសង្គ្រោះជាតិថា ជាគណបក្សក្បត់ជាតិ ចោទប្រធានគណបក្សសង្គ្រោះជាតិថា ជាជនក្បត់ជាតិ ធ្វើចារកម្មឲ្យបរទេស ចុះហេតុអ្វីបានជាគាត់មកអំពាវនាវឲ្យកូនចៅដែលមានប្រធានបក្សក្បត់ជាតិទៅចូលរួមជាមួយគណបក្ស[ប្រជាជន]គាត់ ចឹងបានន័យថា គណបក្សគាត់ក្បត់ជាតិដូចគ្នា ប៉ុន្តែអ្វីដែលគាត់ធ្វើនេះ គឺយើងឃើញថាមតិជាតិ អន្តរជាតិ គេមើលឃើញច្បាស់ពីគំនិតអាក្រក់របស់គាត់»។
នាយកប្រតិបត្តិអង្គការនិចហ្វិចលោក សំ គន្ធាមី យល់ឃើញថា ខណៈស្ថានការណ៍នយោបាយកំពុងឡើងកម្តៅបែបនេះ លោកថាសមាជិកបក្សប្រឆំាងទំាងអស់ត្រូវពង្រឹងសកម្មជននិងមន្ត្រីរបស់ខ្លួនឲ្យបានរឹងមំាពីថ្នាក់ជាតិដល់ថ្នាក់ក្រោមជាតិ ដោយថាអាចនឹងមានដំណោះស្រាយនយោបាយ ពីសហគមន៍អន្តរជាតិ។
លោក គន្ធាមី បញ្ជាក់ថា ជម្រើសល្អគណបក្សសង្គ្រោះជាតិអាចបង្កើតបក្សថ្មី និងដាក់មន្ត្រីដែលមិនជាប់ពាក់ព័ន្ធនឹងការព្យួសិទ្ធិនយោបាយដើម្បីធ្វើជាអ្នកដឹកនាំ ដោយថាទោះគ្មានក្បាលម៉ាស៊ីនចាស់លោក កឹម សុខា និងលោក សម រង្ស៊ី ក៏អ្នកគំាទ្រជាង៣លាននាក់នៅតែបោះឆ្នោតឲ្យបក្សថ្មីនោះផងដែរ។
លោកយល់ថា «គាត់ពង្រឹងសកម្មជន សមាជិកគ្នាគាត់ទៅគណបក្សសង្គ្រោជាតិ ពីព្រោះគាត់មានក្រុមការងារ គាត់ពង្រឹងទៅ ដើម្បីរៀបចំបង្កើតគណបក្សថ្មីរបស់គាត់ ហើយរៀបចំផែនការក្នុងការចូលរួមបោះឆ្នោតនៅថ្ងៃខាងមុខគាត់ត្រូវធ្វើអ្វីខ្លះ ពីព្រោះអ្នកគំាទ្រ[CNRP]ជាង៣លាននាក់នៅដែរ យើងមានការគំាទ្រ វិញហើយ»។
កាលពីពេលថ្មីៗនេះ តំណាងរាស្ត្រគណបក្សសង្គ្រោះជាតិ លោក ម៉ៅ មុនីវណ្ណ ធ្លាប់ប្រាប់ VOD ថា ដោយគិតត្រឹមថ្ងៃទី៩ ខែវិច្ឆិកានេះ គណបក្សលោកទទួលបានពាក្យលាលែងពីតំណាងរាស្ត្រមួយរូប និងសមាជិកក្រុមប្រឹក្សាឃុំសង្កាត់របស់បក្សសង្គ្រោះជាតិសរុបជាង ៤០នាក់ ដែលទៅចុះចូលជាមួយគណបក្សកាន់អំណាច។
គួរបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤នេះ គណបក្សប្រជាជនកម្ពុជា ដែលធ្លាប់គ្រប់គ្រងឃុំ-សង្កាត់ចំនួន១ ៥៩២ កាលពីឆ្នាំ២០១២នោះ បានថយចុះ១ ១៥៨ វិញ នៅឆ្នាំ២០១៧នេះ។ ពោល គឺបាត់អស់ជិត៥០០ មេឃុំ ចៅសង្កាត់។
ចំណែកបក្សប្រឆាំង ដែលធ្លាប់គ្រប់គ្រង ៤០ឃុំសង្កាត់ នៅឆ្នាំ២០១២ បានកើនឡើងដល់៤៨៧ ឃុំ-សង្កាត់នៅឆ្នាំ២០១៧នេះ៕
