សកម្មជនដីធ្លី៧នាក់ នៅខេត្តពោធិ៍សាត់ ដែលរងការចោទថា ដុតគ្រឿងចក្ររបស់ក្រុមហ៊ុនមួយក្នុងខេត្តនេះ កាលជិត១០ឆ្នាំមុន ត្រូវបានតុលាការចេញសេចក្តីសម្រេច ទម្លាក់ចោលការចោទប្រកាន់ហើយនៅថ្ងៃនេះ។
សកម្មជនដីធ្លីមាន លោក ឡាច សារ៉ាន់ លោក ចែម ដារ៉ា និងពលរដ្ឋ៥នាក់ទៀត រស់នៅស្រុកក្រគរ ខេត្តពោធិ៍សាត់ ត្រូវបានក្រុមហ៊ុនភាពីម៉ិច ប្តឹងតាំងពីឆ្នាំ២០១១ ដោយចោទថា ធ្វើឲ្យខូចខាតទ្រព្យសម្បត្តិក្រុមហ៊ុន ដោយចេតនា។
តំណាងអយ្យការអមសាលាដំបូង ខេត្តពោធិ៍សាត់ លោក ឆាយ ហុង បានកោះហៅសកម្មជនដីធ្លីទាំងនោះ ឲ្យចូលបំភ្លឺជាលើកទី២ កាលពីថ្ងៃទី១៦វិច្ឆិកាឆ្នាំ២០១៧។ ក្រោយចូលបំភ្លឺ តុលាការ មិនបានឃុំខ្លួនពួកគេនោះទេ ហើយបានចេញសាលក្រមទម្លាក់ចោលការចោទប្រកាន់នៅ ថ្ងៃ២៩ខែវិច្ចិកានេះ។
កន្លងមក អង្គការសង្គមស៊ីវិល ដែលឃ្លាំមើល ករណីនេះ តែងតែអំពាវនាវសុំតុលាការទម្លាក់ចោល ការចោទប្រកាន់មកលើសកម្មជនដីធ្លីទាំង៧នាក់នេះ ដោយថា តាមស្រាវជ្រាវ ពលរដ្ឋទាំងនោះ មិនមានកំហុស ដូចការចោទប្រកាន់របស់ដើមបណ្តឹងនោះទេ៕
