ប្រមុខការទូតកម្ពុជា គ្រោងនឹងចូលរួមកិច្ចប្រជុំថ្នាក់តំបន់មួយនៅក្នុងប្រទេសចិននៅសប្ដាហ៍នេះ ដោយថា ដើម្បីលើកកម្ពស់ និងពង្រឹងកិច្ចសហប្រតិបត្តិការរវាងបណ្ដាប្រទេសនៅតំបន់ទន្លេមេគង្គ។ នេះដោយយោងតាមសេចក្ដីប្រកាសព័ត៌មានរបស់ក្រសួងការបរទេសកាលពីថ្ងៃ១១ ខែធ្នូ។
ក្រសួងការបរទេសបានប្រកាសថា រដ្ឋមន្ត្រីការបរទេស លោក ប្រាក់ សុខុន នឹងចាកចេញពីប្រទេសកម្ពុជា ទៅចូលរួមកិច្ចប្រជុំកិច្ចសហប្រតិបត្តិការមេគង្គ-ឡានឆាងលើកទី ៣ នៅទីក្រុងយូណាន ប្រទេសចិន ចាប់ពីថ្ងៃទី១៤ ដល់ថ្ងៃទី១៦ ខែធ្នូនេះ។
បើតាមសេចក្ដីប្រកាសព័ត៌មានដដែលនោះ ក្រុមរដ្ឋមន្ត្រីនៃបណ្ដាប្រទេសនៃក្របខណ្ឌមេគង្គ-ឡានឆាង ក៏គ្រោងនឹងចេញសេចក្ដីថ្លែងការណ៍រួម អនុម័តលើគម្រោងសហប្រតិបត្តិការនានាសម្រាប់តំបន់មួយនេះ និងបង្កើតខ្សែទូរស័ព្ទបន្ទាន់មួយ សម្រាប់សម្របសម្រួលកិច្ចសហប្រតិបត្តិការរវាងបណ្ដាប្រទេសក្នុងតំបន់៕
