ចៅក្រមស៊ើបសួរសាលាដំបូងរាជធានីភ្នំពេញ កំពុងសួរចម្លើយមេដឹកនាំបក្សប្រឆាំង លោក កឹម សុខា ជាថ្មីម្ដងទៀត នៅឯពន្ធនាគារត្រពាំងផ្លុង ខេត្តត្បួងឃ្មុំ នៅថ្ងៃព្រហស្បតិ៍នេះ។ នេះដោយយោងតាមលិខិតអញ្ចើញ ដែលត្រូវបានចៅក្រមសាលាដំបូងរាជធានីភ្នំពេញ លោក គី ឫទ្ធី ផ្ញើទៅកាន់ក្រុមមេធាវីការពារក្ដីរបស់លោក លោក កឹម សុខា កាលពីថ្ងៃទី២៩ ខែវិច្ឆិកា កន្លងមកនេះ។
កាលពីថ្ងៃទី២៤ ខែវិច្ឆិកា ចៅក្រមស៊ើបសួរសាលាដំបូងរាជធានីភ្នំពេញ លោក គី ឫទ្ធី ក៏បានសាកសួរលោក កឹម សុខា ម្ដងរួចមកហើយ ពាក់ព័ន្ធនឹងវីដេអូឃ្លីបដែលចុះផ្សាយដោយបណ្ដាញព័ត៌មាន CBN ដែលបង្ហាញសកម្មភាពលោកជួបសំណេះសំណាលជាមួយអ្នកគាំទ្រនៅប្រទេសអូស្ដាស្ត្រលីកាលពីកាលពីឆ្នាំ២០១៣។
លោក កឹម សុខា ត្រូវបានសមត្ថកិច្ចចាប់ខ្លួនកាលពីថ្ងៃទី០៣ ខែកញ្ញា និងបញ្ជូនទៅឃុំខ្លួនបណ្ដោះអាសន្ននៅពន្ធនាគារត្រពាំងផ្លុង ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ជុំវិញវីដេអូឃ្លីបដែលលោកថ្លែងនៅក្នុងប្រទេសអូស្ត្រាលី កាលពីឆ្នាំ២០១៣ ដែលត្រូវបានរដ្ឋាភិបាលចោទថា «បានឃុបឃិតជាមួយបរទេសមានបំណងផ្ដួលរំលំរដ្ឋាភិបាលស្របច្បាប់»។
ការចាប់ខ្លួនមេដឹកនាំអតីតបក្សប្រឆាំងរូបនេះ បានជំរុញឲ្យមានការថ្កោលពីសហគមន៍អន្តរជាតិ និងក្រុមសិទ្ធិមនុស្ស ដោយទុកថា ជាចេតនានយោបាយ៕
