អតីតគណបក្សប្រឆាំង ដែលត្រូវបានរំលាយចោលកាលពីខែមុននោះ បានអំពាវនាវទៅក្រុមអ្នកគាំទ្រនៅក្រៅប្រទេស ឲ្យបន្ដការតស៊ូដោយអហិង្សា បន្ទាប់សហគមន៍អន្តរជាតិ បានឈានទៅដាក់ទណ្ឌកម្មប្រឆាំងរដ្ឋាភិបាលលោកនាយករដ្ឋមន្ត្រី ហ៊ុន សែន។
ក្នុងលិខិតមួយចេញផ្សាយកាលពីថ្ងៃអាទិត្យម្សិលមិញនេះ គណៈកម្មាធិការអចិន្ដ្រៃយ៍អតីតគណបក្សសង្គ្រោះជាតិ បានអរគុណដល់ក្រុមអ្នកគាំទ្ររបស់ខ្លួននៅឯនាយសមុទ្រ ដោយថា ពួកគេបានលះបង់ទាំងកម្លាំងកាយចិត្ត និងបន្ដសកម្មភាពតស៊ូដោយអហិង្សា ប្រឆាំងនឹងរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ដើម្បីទាមទារឲ្យលុបចោលសេចក្ដីសម្រេចរំលាយបក្សសង្គ្រោះជាតិ ទាមទារឲ្យដោះលែងលោក កឹម សុខា និងដើម្បីជួយស្រោចស្រង់លទ្ធិប្រជាធិបតេយ្យ និងការគោរពសិទ្ធិមនុស្សក្នុងប្រទេសកម្ពុជាឡើងវិញ។
អតីតគណបក្សសង្គ្រោះជាតិ អះអាងថា ការឈឺឆ្អាលរបស់សហគមន៍អន្ដរជាតិចំពោះវិបត្តិនយោបាយនៅកម្ពុជា គឺជាការចូលរួមចំណែកពីអ្នកគាំទ្ររបស់ខ្លួននៅក្រៅប្រទេស និងអំពាវនាវឲ្យពួកគេ បន្ដការតស៊ូដោយអហិង្សាតទៅទៀត រហូតដល់មានដំណោះស្រាយនយោបាយសមស្របមួយ។
ក្នុងលិខិតនោះ អតីតគណបក្សសង្គ្រោះជាតិ ជឿជាក់ថា «សមាជិក-សមាជិកា និងអ្នកគាំទ្រគណបក្សសង្គ្រោះជាតិ នៅឯនាយសមុទ្រទាំងអស់ នៅតែបន្ដការតស៊ូប្រឹងប្រែងតទៅទៀត ជាមួយគណបក្សសង្គ្រោះជាតិ ដើម្បីសង្គ្រោះជាតិ ឲ្យរួចផុតពីគ្រោះមហន្ដរាយ នៃរបបផ្ដាច់ការរបស់លោក ហ៊ុន សែន»។
គណបក្សសង្គ្រោះជាតិ ដែលមានអ្នកគាំទ្រប្រហែល៣លាននាក់ កាលពីបោះឆ្នោតថ្នាក់ជាតិឆ្នាំ២០១៣ ត្រូវបានតុលាការកំពូលសម្រេចរំលាយចោល កាលពីថ្ងៃទី១៦វិច្ឆិកាកន្លងទៅ ហើយមន្ដ្រីគណបក្សប្រឆាំងចំនួន១១៨រូប ត្រូវបានហាមឃាត់មិនឲ្យធ្វើនយោបាយរយៈពេល៥ឆ្នាំ។ ចំណែក ប្រធានគណបក្សនេះ គឺលោក កឹម សុខា ក៏កំពុងជាប់ឃុំក្នុងពន្ធនាគារ ក្រោមការចោទប្រកាន់ពីរដ្ឋាភិបាល ថា «ក្បត់ជាតិ»។
ក្រោយរំលាយគណបក្សសង្គ្រោះជាតិ សហគមន៍អន្ដរជាតិ ដែលនាំមុខដោយសហរដ្ឋអាមេរិក និងសហភាពអឺរ៉ុប បានពិចារណាដាក់ទណ្ឌកម្មផ្នែកទិដ្ឋាការ និងទណ្ឌកម្មសេដ្ឋកិច្ច លើរដ្ឋាភិបាលទីក្រុងភ្នំពេញ ដោយថា កម្ពុជាបានដើរឃ្លាតចាកពីគន្លងប្រជាធិបតេយ្យ សេរី ពហុបក្ស និងផ្ទុយពីខ្លឹមសារ ចែងក្នុងកិច្ចព្រមព្រៀងទីក្រុងប៉ារីស៕
