ស្ថានបេសកកម្មកម្ពុជាប្រចាំនៅអង្គការសហប្រជាជាតិ បានបង្ហាញការតវ៉ាប្រឆាំងនឹងអាមេរិក និងសហភាពអឺរ៉ុប កាលពីថ្ងៃម្សិលមិញនេះ ដោយចោទថា បានជ្រៀតជ្រែកកិច្ចការផ្ទៃក្នុងកម្ពុជា ខណៈដែលពួកគេគ្រោងរៀបចំវេទិកាមួយដែលនឹងជជែកអំពីបញ្ហាលទ្ធិប្រជាធិបតេយ្យនៅកម្ពុជា។
ស្ថានបេសកម្មអាមេរិក និងសហភាពអឺរ៉ុប គ្រោងរៀបចំវេទិកា «ការធ្លាក់ចុះនៃលទ្ធិប្រជាធិបតេយ្យនៅកម្ពុជា»នៅយប់ថ្ងៃទី១៩ ខែធ្នូនេះ ដោយមានការផ្ដល់សក្ខីកម្មពី កញ្ញា កឹម មនោវិទ្យា កូនស្រីលោក កឹម សុខា ស្ថាបនិកនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង និងនាយកផ្នែកតស៊ូមតិប្រចាំអង្គការឃ្លាំមើលសិទ្ធិមនុស្សអន្តរជាតិនៅតំបន់អាស៊ី លោក John Sifton។
យោងតាមសេចក្ដីថ្លែងការណ៍ចេញផ្សាយកាលពីថ្ងៃម្សិលមិញនេះ ស្ថានបេសកកម្មអចិន្ត្រៃយ៍កម្ពុជាប្រចាំនៅអង្គការសហប្រជាជាតិ បានហៅវេទិកានោះថា ត្រូវរៀបចំធ្វើឡើងក្រោមហេតុផលនយោបាយ និងមានចេតនាបំភាន់សាធារណៈមតិអន្តរជាតិ។
ជាងនេះទៅទៀត ស្ថានបេសកកម្មតំណាងកម្ពុជា បានចោទអាមេរិក និងសហភាពអឺរ៉ុបថា បានជ្រៀតជ្រែកចូលកិច្ចការផ្ទៃក្នុងកម្ពុជា ដោយថា បានរំលោភទៅនឹងមាត្រា ២ នៃធម្មនុញ្ញអង្គការសហប្រជាជាតិ។
អ្នកវិភាគនយោបាយលោកបណ្ឌិត ឡៅ ម៉ុងហៃ យល់ឃើញថា វេទិកាពិភាក្សាអំពីបញ្ហាកម្ពុជានោះ មិនមែនជាការលូកលាន់កិច្ចការផ្ទៃក្នុងកម្ពុជានោះទេ ដោយថា វេទិកានោះ គឺជាការជំរុញឲ្យកម្ពុជាគោរពសិទ្ធិមនុស្ស ដែលកើតចេញពីស្មារតីនៃកិច្ចព្រមព្រៀងទីក្រុងប៉ារីស ដែលបាននាំមកនូវសន្ដិភាព និងលទ្ធិប្រជាធិបតេយ្យមកកម្ពុជា។ លោកបន្ថែមថា ទណ្ឌកម្មពីអន្ដរជាតិ នឹងធ្លាក់មកជាហូរហែរ បើគេរកឃើញថា កម្ពុជាពិតជាបានប្រព្រឹត្តអំពើរំលោភសិទ្ធិមនុស្សធ្ងន់ធ្ងរ។
លោកថា៖ «ប្រទេសមួយចំនួន គឺជាប្រទេសហត្ថលេខីនៃកិច្ចព្រមព្រៀងទីក្រុងប៉ារីស។ គេទាំងនោះបានសន្យាថា ជួយជំរុញឲ្យមានការគោរពសិទ្ធិមនុស្សក្នុងប្រទេសកម្ពុជា ហើយអង្គការសហប្រជាជាតិ ក៏មានភារកិច្ចតាមដានមើលស្ថានភាពសិទ្ធិមនុស្សក្នុងប្រទេសកម្ពុជា។ គេអាចចាត់វិធានការដើម្បីលុបបំបាត់ការរំលោភសិទ្ធិមនុស្សធ្ងន់ធ្ងរ។ អាហ្នឹងគេមានឈានដល់ការដាក់ទណ្ឌកម្មផ្សេងៗ។ មួយកិច្ចការទូត គេមិនចេញ Visa មួយទៀត ដូចនៅប្រទេសភូមាក្នុងរបបយោធា ដែលប្រទេសលោកខាងលិចដាក់ទណ្ឌកម្មសេដ្ឋកិច្ច»។
ក្នុងសេចក្ដីថ្លែងការណ៍ដដែលនោះ ស្ថានបេសកកម្មកម្ពុជា បានអះអាងថា ការចាប់ឃុំខ្លួនប្រធានបក្សប្រឆាំង លោក កឹម សុខា និងការរំលាយអតីតគណបក្សសង្គ្រោះជាតិ ធ្វើឡើងក្នុងបុព្វហេតុទប់ស្កាត់ចលនាបដិវត្តន៍ពណ៌ និងការឃុបឃិតជាមួយបរទេស ដើម្បីផ្ដួលរំលំរដ្ឋាភិបាលស្របច្បាប់។
កម្ពុជាបានបកស្រាយទៀតថា ការបាត់បង់អតីតគណបក្សសង្គ្រោះជាតិ មិនប៉ះពាល់លទ្ធិប្រជាធិបតេយ្យសេរីពុហបក្សនោះទេ ដោយថា នៅកម្ពុជាមានគណបក្សចំនួន ៣៥ផ្សេងទៀត ដែលនឹងចូលរួមប្រកួតប្រជែងការបោះឆ្នោតថ្នាក់ជាតិនៅឆ្នាំក្រោយ។
បើតាមសេចក្ដីថ្លែងការណ៍ ភាគីកម្ពុជាពន្យល់ថា វិធានការបស់រដ្ឋាភិបាល ប្រឆាំងនឹងបុគ្គល អង្គការក្រៅរដ្ឋាភិបាល និងស្ថាប័នព័ត៌មានមួយចំនួន គឺដើម្បីថែរក្សាសន្ដិភាព និងស្ថិរភាពជាតិ ពង្រឹងនីតិរដ្ឋ និងទប់ស្កាត់ការជ្រៀតជ្រែកពីសំណាក់បរទេស។
សហគមន៍អន្ដរជាតិ នាំមុខដោយសហរដ្ឋអាមេរិក និងសហភាពអឺរ៉ុប បានព្រមានដាក់ទណ្ឌកម្មជាបន្ដបន្ទាប់ ក្រោយតុលាការកំពូលសម្រេចរំលាយអតីតគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកាកន្លងទៅ ហើយសមាជិកអតីតបក្សប្រឆាំងចំនួន១១៨រូប ត្រូវបានគេហាមឃាត់មិនឲ្យធ្វើនយោបាយ៥ឆ្នាំ។ រីឯលោក កឹម សុខា ក៏កំពុងជាប់ក្នុងពន្ធនាគារពីបទ «ក្បត់ជាតិ»៕