ក្រុមអ្នកមានជម្លោះដីធ្លីនៅសហគមន៍បុរីកីឡាមួយចំនួន ដែលមិនទាន់ទទួលបានដំណោះស្រាយ ឲ្យដឹងថា គ្មាននណាម្នាក់ព្រមទៅទទួលយកសំណងគោលនយោបាយនោះទេ ខណៈថ្ងៃឱសានវាទរបស់សាលារាជធានីភ្នំពេញផុតកំណត់នៅថ្ងៃសុក្រនេះ។
កាលពីថ្ងៃទី៨ខែធ្នូ សាលារាជធានីភ្នំពេញ បានចេញសេចក្តីជូនដំណឹងមួយ ឲ្យពលរដ្ឋបុរីកីឡាចំនួន ១១គ្រួសារដែលមិនព្រមទទួលសំណងគោលនយោបាយ មកទទួលយកសំណងនេះ ដោយដាក់ឱសានវាទពីរសប្តាហ៍ គឺចាប់ថ្ងៃទី៨ ដល់ថ្ងៃ២២ខែធ្នូ ហើយថា បើខកខានដូចតាមពេលកំណត់ ពលរដ្ឋទាំងនោះ នឹងបាត់បង់សិទ្ធិទទួលបានសំណង និងដំណើរការដោះស្រាយទំនាស់ក៏ត្រូវបានបញ្ចប់ដែរ។
តំណាងពលរដ្ឋម្នាក់ អ្នកស្រី ស ស៊ន ប្រាប់វីអូឌីនៅថ្ងៃនេះថា រហូតមកដល់ថ្ងៃកំណត់ឱសានវាទនេះ មិនមានពលរដ្ឋបុរីកីឡាណាម្នាក់ ទៅទទួលយកសំណងតាមគោលនយោបាយរបស់សាលារាជធានីភ្នំពេញនោះទេ ហើយអ្នកស្រីថាក៏ពុំមានពលរដ្ឋណាម្នាក់ ព្រមចាកចេញពីអាគារចាស់នោះដែរ។
អ្នកស្រីបន្តថា ពួកគាត់មានការព្រួយបារម្ភចំពោះបាត់បង់សំណង និងការបណ្តេញចេញទាំងបង្ខំជាលើកទី២ ប៉ុន្តែពួកគាត់គ្មានជំរើស ដោយថា សំណងគោលនយោបាយរបស់សាលារាជធានីភ្នំពេញនោះតិចតួចពេក។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី ប្រាប់វីអូឌីកាលពីថ្ងៃទី១១ធ្នូ ថា ការរក្សាជំហរមិនមកទទួលយកសំណង តាមគោលនយោបាយនោះ វាជាសិទ្ធិរបស់រដ្ឋពលរដ្ឋ ប៉ុន្តែលោកថា រាជធានីភ្នំពេញ នឹងអនុវត្តវិធានការរដ្ឋាបាល និងយន្តការតុលាការបន្តទៀត ដោយមិនទទួលខុសត្រូវ ចំពោះការបាត់បង់ផលប្រយោជន៍របស់ពលរដ្ឋទាំងនោះឡើយ។
កាលពីថ្ងៃទី២០ខែធ្នូ អង្គការនិងសហគមន៍ សរុបចំនួន៣៤ បានចេញសេចក្តីថ្លែងការណ៍រួមមួយ អំពាវនាវទៅសាលារាជធានីភ្នំពេញ ឲ្យទម្លាក់ចោលឱសានវាទនេះ និងបន្តដំណើរការដោះស្រាយវិវាទនោះ តាមនីតីវិធីឡើងវិញ។
បើតាមសេចក្តីថ្លែងការណ៍ដដែល ក្រុងអង្គការទាំង៣៤ បានចាត់ទុការដាក់ឱសានវាទនោះថា ធ្វើឡើងផ្ទុយពីសន្ធិសញ្ញាសិទ្ធិមនុស្សអន្តរជាតិនានា ដែលប្រទេសកម្ពុជា បានផ្តល់សច្ចាប័ននិងរដ្ឋធម្មនុញ្ញ ដែលចែងថា មនុស្សគ្រប់រូបមានសិទ្ធិទទួលបានការរស់នៅក្នុងស្ថានភាពមួយសមរម្យ ទទួលបានលំនៅឋានសមរម្យ និងការការពារពីការបណ្តេញចេញដោយបង្ខំ៕