សហភាពអឺរ៉ុប បានប្រកាសផ្ដល់ជំនួយជិត ៣លានអឺរ៉ូសម្រាប់គម្រោងអភិរក្សធនធានធម្មជាតិនៅក្នុងខេត្តមួយស្ថិតនៅភាគឦសានប្រទេសកម្ពុជា។ នេះបើតាមទំព័រហ្វេសប៊ុករបស់សហភាពអឺរ៉ុបប្រចាំនៅកម្ពុជា។
សហភាពអឺរ៉ុបប្រចាំនៅកម្ពុជា បានឲ្យដឹងថា មូលនិធិទំហំ ២.៨លានអឺរ៉ូ ឬស្មើនឹង ៣.៣២លានដុល្លារ ត្រូវបានផ្ដល់ទៅអង្គការអភិរក្សសត្វព្រៃពិភពលោក ហៅកាត់ថា WWF។
អគ្គរដ្ឋទូតសហភាពអឺរ៉ុបប្រចាំកម្ពុជា លោក George Edgar ត្រូវបានដកស្រង់សម្ដីដែលបាននិយាយថា មូលនិធិនេះ នឹងចូលរួមចំណែកដល់កិច្ចខិតខំប្រឹងប្រែងរបស់កម្ពុជា ក្នុងការគ្រប់គ្រងតំបន់ការពារ និងការអភិវឌ្ឍប្រកបដោយនិរន្តភាពនៅខេត្តមណ្ឌលគិរី។
លោក George Edgar ថ្លែងបន្ថែមថា ដើម្បីធ្វើឲ្យគម្រោងនេះទទួលជោគជ័យ រដ្ឋាភិបាលកម្ពុជា ត្រូវពង្រឹងការអនុវត្ដច្បាប់ប្រឆាំងបទល្មើសព្រៃឈើ និងការប្រមាញ់សត្វព្រៃខុសច្បាប់ឲ្យតឹងរ៉ឹង ដោយថា បានប៉ះពាល់ដល់ជីវភាពរបស់ប្រជាពលរដ្ឋក្នុងតំបន់៕
