គណបក្សហ៊្វុនស៊ិនប៉ិច បានបដិសេធថា ខ្លួនមិនដែលបានទទួលជំនួយហិរញវត្ថុម្ដងណាឡើយពីប្រទេសចិន ខណៈអ្នកវិភាគលើកឡើងថា គណបក្សរាជានិយមមួយនេះ អាចប្រឈមមុខនឹងបណ្ដឹងស្នើឲ្យរំលាយចោលដូចគណបក្សសង្គ្រោះជាតិ ប្រសិនបើបក្សនេះត្រូវបានរកឃើញថា បានទទួលជំនួយពីបរទេសមែននោះ។
ប្រធានគណបក្សហ៊្វុនស៊ិនប៉ិច សម្ដេចក្រុមព្រះ នរោត្ដម រណឫទ្ធិ បានមានបន្ទូលប្រាប់ក្រុមអ្នកសារព័ត៌មានកាលពីថ្ងៃទី២៥ខែធ្នូថា ទ្រង់បានដាក់សំណើទៅកាន់លោក វ៉ាង វ៉ៃគួង ប្រធានវិទ្យាស្ថានវិទ្យាសាស្ត្រសង្គមមកពីប្រទេសចិន ឲ្យជួយដល់គណបក្សរាជានិយមមួយនេះ ដោយទ្រង់អះអាងថា គណបក្សមួយនេះជាបក្សធំលំដាប់ទី២ និងក្រីក្រជាងគេ។
សម្ដេចក្រុមព្រះបានអះអាងប្រាប់ក្រុមអ្នកសារព័ត៌មានក្រោយជំនួបជាមួយលោក វ៉ៃគួង ថាមន្ត្រីចិនរូបនេះបានសន្យានាំយកសំណើរបស់ទ្រង់ ទៅប្រាប់ប្រធានាធិបតីចិន លោក ស៊ី ជិនពីង។
ព្រះអង្គមានបន្ទួលថា៖ «ខ្ញុំបានស្នើខាងប្រទេសចិន ដែលបានជួយដល់យើងខ្ញុំហើយ ការពិតយើងខ្ញុំក្លាយទៅជាគណបក្សទីពីរមែន ក៏ប៉ុន្តែ ក្រជាងគេតែម្តង វាគ្មានអ្វីសោះ ម្ល៉ោះហើយចិន…គាត់ថា នឹងរាយការណ៍ជូនឯកឧត្តម ស៊ី ជីនពីង ហើយគាត់នឹងបន្ត[ផ្ដល់]នូវជំនួយដែលគាត់ធ្លាប់បានផ្តល់ឲ្យមកហ្វ៊ុនស៊ិនប៉ិចតទៅទៀត»។
ការអះអាងបែបនេះរបស់សម្ដេចក្រុមព្រះ ត្រូវបានក្រុមអ្នកវិភាគមើលឃើញថា អាចជាការរំលោភលើច្បាប់ស្ដីពីវិសោធនកម្មច្បាប់គណបក្សនយោបបាយ ដែលហាមឃាត់គណបក្សនយោបាយនៅកម្ពុជា មិនឲ្យទទួលជំនួយពីបរទេស បើទោះបីជាជំនួយនោះ ត្រូវបានផ្ដល់ក្រោមរូបភាពបែបណាក៏ដោយ។
ប៉ុន្តែក្នុងសេចក្តីថ្លែងការណ៍កាលពីថ្ងៃម្សិលមិញនេះ គណបក្សហ្វ៊ុនស៊ិនប៉ិច បានបដិសេធថា មិនបានទទួលជំនួយពីចិននោះឡើយ ហើយថា អ្វីដែលសម្ដេចក្រុមព្រះបានលើកឡើងនោះ សំដៅដល់ជំនួយដែលចិនបានផ្ដល់មកកម្ពុជានៅក្រោមរដ្ឋាភិបាលចម្រុះក្នុងទសវត្សរ៍១៩៩០ ដែលបក្សនេះថា សម្រាប់អភិវឌ្ឍសេដ្ឋកិច្ចសង្គម និងហេដ្ឋារចនាសម្ព័ន្ធនានា។
អ្នកនាំពាក្យគណបក្សហ៊្វុនស៊ិនប៉ិច លោក ញេប ប៊ុនជិន ប្រាប់វីអូឌីនៅថ្ងៃនេះថា ប្រព័ន្ធផ្សព្វផ្សាយមួយចំនួន បានដកស្រង់សម្ដីសម្ដេចក្រុមព្រះ ដោយភាន់ច្រឡំ។
លោកបកស្រាយថា៖ «គេ[ប្រទេសចិន]ជួយគណបក្សហ្វ៊ុនស៊ិនប៉ិច គេជួយរបៀបកសិកម្មពីជំនាន់រដ្ឋាភិបាលចម្រុះតំាងពីឆ្នាំ១៩៩៨ រហូតដល់ឆ្នាំ២០០៣ ហើយយើងពិចារណាទៅច្បាប់[ច្បាប់ស្តីពីគណបក្សនយោបាយថ្មី]ហ្នឹងវាយ៉ាងម៉េច ហើយគេជួយផ្នែកមនុស្សធម៌ គេជួយផ្នែកកសិកម្មវាយ៉ាងម៉េច គេមិនដែលយកវិភាគទានជាលុយ…មកជួយដល់គណបក្សហ្វ៊ុនស៊ិនប៉ិចទេ ដែលយើងថា អរគុណដែលគេនៅតែជួយបន្តក្នុងន័យថា គណបក្សហ្វ៊ុនស៊ិនប៉ិចនៅសភាលើកនេះ ជាគណបក្សមួយគេហៅថា គណបក្សភាគតិច មិនមែនគណបក្សប្រឆំាងទេ។ ដូច្នេះ អ្វីដែលរដ្ឋាភិបាលដែលគេធ្វើបានល្អ គេធ្វើបានច្រើន យើងជួយជំរុញ ហើយយើងមានការសសើរថា ចិនគេបន្តជួយរដ្ឋាភិបាលយើង។ ឃើញទេវាពីរដាច់ដោយឡែកពីគ្នា»។
ច្បាប់គណបក្សនយោបាយ ដែលត្រូវបានក្រុមសមាជិកសភាបក្សកាន់អំណាចអនុម័តជាបន្តបន្ទាប់នៅក្នុងឆ្នាំនេះ បានហាមឃាត់គណបក្សនយោបាយ មិនឲ្យទទួលវិភាគទានពីបរទេស ទោះជារូបភាពណាក៏ដោយ ហើយបានបើកផ្លូវឲ្យក្រសួងមហាផ្ទៃរំលាយបក្សនយោបាយនោះចោល។
គណបក្សសង្គ្រោះជាតិ ដែលទទួលបានសំឡេងគាំទ្រពីពលរដ្ឋប្រហែល ៣លាននាក់នៅក្នុងការបោះឆ្នោតជាតិកាលពីឆ្នាំ២០១៣នោះ ត្រូវបានតុលាការកំពូលសម្រេចរំលាយចោលតាមបណ្ដឹងពីក្រសួងមហាផ្ទៃកាលពីពាក់កណ្ដាលខែវិច្ឆិកាកន្លងមក ដោយយោងតាមវិសោធនកម្មច្បាប់នេះ។
វីអូឌីបានព្យាយាមស្វែងរកការបកស្រាយពីអ្នកនាំពាក្យក្រសួងមហាផ្ទៃ លោក ខៀវ សុភ័គ ជុំវិញជំហររបស់ក្រសួងទៅលើគណបក្សរាជានិយមមួយនេះ ប៉ុន្តែ មិនទាក់ទងបាននោះឡើយ។
ប្រធានគណបក្សយុវជនកម្ពុជា លោក ពេជ្រ ស្រស់ ដែលបានចូលរួមប្ដឹងរំលាយបក្សប្រឆាំងកាលពីខែកញ្ញាកន្លងមកនោះ មានប្រសាសន៍ថា គណបក្សរបស់លោកកំពុងពិនិត្យមើលព្រះរាជបន្ទួលរបស់សម្តេចក្រុមព្រះ ដើម្បីរកភស្តុងបន្ថែម។ ករណីនេះ លោកស្នើទៅសួងមហាផ្ទៃឲ្យជួយស្រាវជ្រាវ ដើម្បីចាត់វិធានការស្របតាមច្បាប់។
លោកប្រាប់ថា៖ «ផលរបស់លោក កឹម សុខា ឃើញទេ មានការបាតុកម្ម… ប៉ុន្តែ យើងមើលសម្តេចក្រុមព្រះ យើងអត់ទាន់ឃើញផលហ្នឹងទេ ប៉ុន្តែ យើងមិនបដិសេធយ៉ាងណានោះទេ ប៉ុន្តែ យើងនឹងពិនិត្យពិច័្ចយឲ្យល្អិតល្អន់ជានេះទៅទៀត អ្វីដែលយើងចង់បាននោះ គឺចង់ឲ្យក្រសួងមហាផ្ទៃធ្វើការងារឲ្យមានតម្លាភាព»។
ប្រធានក្រុមអ្នកវិភាគវ័យក្មេង លោក ហង្ស វិទូ យល់ថា ដើម្បីកុំឲ្យអ្នកនយោបាយបកស្រាយការពារតែបក្សរបស់ខ្លួននោះ លោកថា ស្ថាប័នពាក់ព័ន្ធ ជាពិសេសក្រសួងមហាផ្ទៃ ត្រូវធ្វើការស៊ើបអង្កេតលើគណបក្សនយោបាយទាំងអស់ឲ្យមានតម្លាភាព ជុំវិញប្រភពថវិកាដែលបក្សនោះទទួលបាន សម្រាប់ដំណើរការបក្សរបស់ខ្លួន។
លោកមានប្រសាសន៍ថា៖ «វិធានការក្រសួងមហាផ្ទៃក៏ដោយ វិធានការរបស់ស្ថាប័នផ្សេងៗក៏ដោយ ខ្ញុំយល់ឃើញថា បើសិនជាអាចគួរណាធ្វើការស៊ើបអង្កេតទំាងគណបក្សទំាងអស់ មិនត្រឹមតែគណបក្សហ្វ៊ុន ស៊ិន ប៉ិចទេ គណបក្សណាក៏ដោយ ដែលគាត់ទទួលពីបរទេស ហើយគាត់មិនមានភាពច្បាស់លាស់នៅក្នុងការធ្វើឲ្យក្លាយទៅជាគណបក្សនយោបាយមួយ ដែលអាចធ្វើឲ្យប្រជាពលរដ្ឋបោះឆ្នោតឲ្យបាន គួរតែធ្វើការស៊ើបអង្កេត មិនត្រូវឲ្យ ចាប់ត្រីចង្វា ត្រីរ៉ស់ ត្រីធំៗអត់ចាប់នោះទេ វាធ្វើឲ្យប្រព័ន្ធនីតិរដ្ឋនៅកម្ពុជាដើរថយក្រោយដូចសព្វថ្ងៃនេះ»។
កាលពីអំឡុងខែកញ្ញា គណបក្សហ៊្វុនស៊ិនប៉ិច និងគណបក្សយុវជនកម្ពុជា បានសម្រេចដាក់ពាក្យបណ្ដឹងទៅក្រសួងមហាផ្ទៃ ដោយបានស្នើសុំរំលាយគណបក្សសង្គ្រោះជាតិ បន្ទាប់ពីរដ្ឋាភិបាលបានចោទបក្សប្រឆាំងដ៏ធំមួយនេះថា «បានឃុបឃិតជាមួយបរទេស» ក្នុងបំណងផ្ដួលរំលំរដ្ឋាភិបាល។
តុលាការកំពូលបានសម្រេចរំលាយគណបក្សប្រឆាំងនេះចោល ព្រមទាំងសម្រេចហាមឃាត់ថ្នាក់ដឹកនាំ ១១៨រូបរបស់បក្សនេះ មិនឲ្យធ្វើសកម្មភាពនយោបាយរយៈពេល ៥ឆ្នាំកាលពីថ្ងៃទី១៦ ខែវិច្ឆិកា ទៅតាមបណ្ដឹងរបស់ក្រសួងមហាផ្ទៃ។
បន្ទាប់ពីត្រូវបានរំលាយចោល អាសនៈសភាទាំង ៥៥របស់អតីតបក្សប្រឆាំងដ៏ធំមួយនេះ ត្រូវបានដកហូត និងបែងចែកទៅឲ្យគណបក្សផ្សេងដែលមិនមានអាសនៈនៅក្នុងសភា ក្នុងនោះគណបក្សហ៊្វុនស៊ិនប៉ិចទទួលបាន ៤១អាសនៈ៕