អតីតមេដឹកនាំបក្សប្រឆាំង ដែលកំពុងជាប់ឃុំ បានយកឱកាសថ្ងៃឆ្លងឆាំ្នសកល អំពាវនាវទៅបក្សកាន់អំណាចឲ្យធ្វើការបង្រួបបង្រួមជាតិ ដោយថា របត់នយោបាយបច្ចុប្បន្ន នឹងធ្វើឲ្យកម្ពុជាប្រឈមនឹងការបាត់បង់កិច្ចសហប្រតិបត្តិការពីសហគមន៍អន្តរជាតិ។
ក្នុងឱកាសចូលឆាំ្នសកល ឆ្នាំ២០១៨ លោក កឹម សុខា លើកឡើងថា ប្រសិនបើរាជរដ្ឋាភិបាលមិនព្រមស្ដារលទ្ធិប្រជាធិបតេយ្យនិងការគោរពសិទ្ធិមនុស្សឡើងវិញ កម្ពុជាប្រឈមនឹង ការបាត់បង់ជំនួយ ឱកាសទីផ្សារ និងកិច្ចសហការសេដ្ឋកិច្ចផ្សេងៗពីសហគមន៍អន្តរជាតិ ជាពិសេសបណ្ដាលប្រទេស លោកសេរី ដែលជាហត្ថលេខីនៃកិច្ច ព្រមព្រៀងទីក្រុងប៉ារីស។ នេះបើតាមសារលិខិតរបស់លោក កឹម សុខា ក្នុងឱកាសឆ្នាំថ្មី២០១៨ ដែលអានដោយកូនស្រី កញ្ញា កឹម មនោវិទ្យា ដែលបានបង្ហោះតាមគេហទំព័ហ្វេសប៊ុករបស់លោកនៅព្រឹកថ្ងៃទី១មករាឆ្នាំ២០១៨នេះ។
បើតាមសារលិខិត លោក កឹម សុខា មានប្រសាសន៍ថា ដើម្បីរក្សាអត្ថប្រយោជន៍ប្រទេសជាតិនោះ គឺមានតែការផ្សះផ្សាជាតិ ដើម្បីលើកស្ទួយប្រជាធិបតេយ្យ និងគោរពសិទ្ធិមនុស្សនៅកម្ពុជា។
សារលិខិតសរសេរបន្តថា៖ «ខ្ញុំយល់ឃើញថា ខ្មែរត្រូវតែរួមគ្នាដោះស្រាយបញ្ហាជាតិ បញ្ហាប្រជាពលរដ្ឋ និង បញ្ហានយោបាយ តាមរយៈការផ្សះផ្សាជាតិ ដោយប្រកាន់យកនូវគោលការណ៍អហិង្សា ខ្មែរតែមួយមិនគុំគួន មិនសងសឹក មិនយកខ្មែរណាធ្វើជាសត្រូវ»។
ទាក់ទងនឹងសារលិខិតនេះដែរ វីអូឌី នៅព្រឹកនេះ បានទាក់ទងទៅលោក ហែម សុជាតិ សហមេធាវីការពារក្ដីឲ្យលោក កឹម សុខា ដើម្បីសុំការបញ្ជាក់បន្ថែមពីភាពត្រឹមត្រូវ និងសេចក្តីពិតនៃលិខិតនោះ។ លោក សុជាតិ ឲ្យដឹងថា លោកនៅមិនទាន់បានដឹងពីលិខិតនោះនៅឡើយទេដោយសារតាំងពីថ្ងៃទី២២ខែធ្នូឆ្នាំ២០១៧មក ក្រុមមេធាវី អត់ទាន់បានទៅជួបកូនក្ដីនោះទេ ប៉ុន្តែលោកថា លោក កឹម សុខា អាចផ្ញើសារលិខិតនេះ តាមរយៈក្រុមគ្រួសាររបស់គាត់។
លោកថា៖ «ពាក់ព័ន្ធនឹងសារលិខិត គឺក្រុមមេធាវីអត់បានដឹង! ប្រហែលជាអាចតាមរយៈគ្រួសារគាត់មើលទៅ ពីព្រោះគ្រួសារពីថ្ងៃទី២២ [ធ្នូ២០១៧] មកដល់ថ្ងៃហ្នឹង! គាត់ឧស្សាហ៍ទៅជួបឯកឧត្ដម កឹម សុខា។ ប៉ុន្តែ តាមរយៈមេធាវី គឺយើងអត់បានទទួលព័ត៌មានអីពីឯកឧត្ដម កឹម សុខាទេ!»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការលើកឡើងរបស់លោក កឹម សុខា ថា មិនបានផលប្រយោជន៍អ្វីនោះទេ ដោយសារលោក កឹម សុខា ជាអ្នកទោស។
លោកថា៖ «យន្តនាការរបស់គាត់ចង់ឲ្យមានការសម្របសម្រួលនយោបាយ ដើម្បីដោះលែងគាត់ឲ្យរួចពិរុទ្ធភាព ក៏ដូចជា គណបក្សប្រឆាំងនឹងដែលមានឧបាយកល ចង់ត្រឡប់មកធ្វើសកម្មភាពនយោបាយវិញ។ ខ្ញុំយល់ថា បញ្ហាទាំងអស់ដែលលើកឡើងនេះ មិនអាចទទួលលទ្ធផល បានតាមបំណងរបស់គាត់ទេ។ ឥឡូវនេះ រាជរដ្ឋាភិបាល ក៏ដូចជាតុលាការកំពុងដំណើរការនីតិវិធីស្របទៅតាមអំពើល្មើសច្បាប់ ដែលឃុបឃិតជាមួយបរទេស…»។
អ្នកស្រាវជ្រាវពីការអភិវឌ្ឍន៍សង្គម លោក មាស នី សម្ដែងការគាំទ្រ ចំពោះសារលិខិតនោះ ដោយលោកថា អ្នកនយោបាយគួរតែឈប់ឈ្លោះគ្នា ហើយងាកមកធ្វើការចចារគ្នា ដើម្បីដោះស្រាយបញ្ហាប្រទេសជាតិ ។
លោកថា៖ «បើសិនជាខ្មែរនាំគ្នាធ្វើដោយសារតែគេបង្ខំឲ្យធ្វើ ឬក៏រួបរួមគ្នាដោយសារគេបង្ខំឲ្យរួបរួម ដូចក្នុងពេលនេះ ខ្ញុំគិតថា ការរួបរួមគ្នារបស់យើងក៏អត់បានយូរ ព្រោះយើងជាប់ក្នុង គេហៅថាខ្សែស្រឡាយមួយគឺខ្សែស្រឡាយឈ្លោះ គ្នាមិនចេះចប់ក្នុងចំណោមគ្នាឯង។ ខ្ញុំនៅតែចង់ឃើញសមត្ថភាពរបស់អ្នកដឹកនាំខ្មែរណាមួយក្នុងពេលនេះ ហើយពេលអនាគត ដើម្បីរកឲ្យឃើញនូវឯកភាពជាតិហើយនាំខ្មែរទាំងអស់គ្រប់ភាគី គ្រប់និន្នាការឲ្យចូលរួមឲ្យកើតជាខ្មែរតែមួយកុំឲ្យវាមានការទាស់ទែងគ្នា…»។
ទោះជាយ៉ាណា នៅលើទំព័រហ្វេសប៊ុកផ្លូវការនៅថ្ងៃទី១មករានេះ លោកនាយករដ្ឋមន្ត្រី ហ៊ុន សែន តាមរយៈសារជូនពរឆ្នាំសកល បានលើកឡើងថា «នឹងរួមគ្នាបន្តការពារសន្តិភាព និងថែរក្សាស្ថេរភាពនយោបាយសង្គមអោយបានល្អ ដើម្បីជំរុញការអភិវឌ្ឍប្រទេសអោយកាន់តែរីកចម្រើន»។
ក្រោយពីមានការចាប់ខ្លួនមេដឹកនាំគណបក្សប្រឆាំង លោក កឹម សុខា និងការរំលាយអតីតគណបក្សសង្គ្រោះជាតិ ប្រទេសរួមមាន សហរដ្ឋអាមេរិក សហភាពអឺរ៉ុប និងប្រទេសមួយចំនួនទៀត បានប្រកាសថ្កោលទោស និងព្រមានពីការដើរវិលថយក្រោយនៃលទ្ធិប្រជាធិបតេយ្យនៅកម្ពុជា។
សហគមន៍អន្តរជាតិ ក៏បានអំពាវនាវឲ្យអ្នកនយោបាយកម្ពុជា ស្តារស្ថានការណ៍នយោបាយឲ្យវិលទៅរកស្ថានភាពដើមវិញ ដើម្បីធានាដល់លំហូរប្រជាធិបតេយ្យ និងការបោះឆ្នោតឆ្នាំ២០១៨នេះ ប្រព្រឹត្តិទៅដោយសេរី ត្រឹមត្រូវ និងយុត្តិធម៌នោះ៕
