មន្ត្រីជាន់ខ្ពស់ក្រសួងមហាផ្ទៃ អះអាងថា ក្រសួងគ្មានគម្រោងប្ដឹងរំលាយគណបក្សហ៊្វុនស៊ិនប៉ិចទេ ដោយថា គណបក្សនេះមិនទាន់បានទទួលជំនួយប្រទេសចិននោះទេ បើទោះបីជាប្រធានបក្សនេះបានប្រកាសស្នើសុំជំនួយពីចិន ដើម្បីយកមកពង្រឹងបក្សនេះក៏ដោយ។
ប្រធានគណបក្សហ៊្វុនស៊ិនប៉ិច សម្ដេចក្រុមព្រះ នរោត្ដម រណឫទ្ធិ បានមានបន្ទូលប្រាប់ក្រុមអ្នកសារព័ត៌មានកាលពីថ្ងៃទី២៥ខែធ្នូថា ទ្រង់បានដាក់សំណើទៅកាន់លោក វ៉ាង វ៉ៃគួង ប្រធានវិទ្យាស្ថានវិទ្យាសាស្ត្រសង្គមមកពីប្រទេសចិន ឲ្យជួយដល់គណបក្សរាជានិយមមួយនេះ ដោយទ្រង់អះអាងថា គណបក្សមួយនេះជាបក្សធំលំដាប់ទី២ និងក្រីក្រជាងគេ។
សម្ដេចក្រុមព្រះបានអះអាងប្រាប់ក្រុមអ្នកសារព័ត៌មានក្រោយជំនួបជាមួយលោក វ៉ៃគួង ថា មន្ត្រីចិនរូបនេះបានសន្យានាំយកសំណើរបស់ទ្រង់ ទៅប្រាប់ប្រធានាធិបតីចិន លោក ស៊ី ជិនពីង។
ព្រះអង្គមានបន្ទួលថា៖ «ខ្ញុំបានស្នើខាងប្រទេសចិន ដែលបានជួយដល់យើងខ្ញុំហើយ ការពិតយើងខ្ញុំក្លាយទៅជាគណបក្សទីពីរមែន ក៏ប៉ុន្តែ ក្រជាងគេតែម្តង វាគ្មានអ្វីសោះ ម្ល៉ោះហើយចិន…គាត់ថា នឹងរាយការណ៍ជូនឯកឧត្តម ស៊ី ជីនពីង ហើយគាត់នឹងបន្ត[ផ្ដល់]នូវជំនួយដែលគាត់ធ្លាប់បានផ្តល់ឲ្យមកហ្វ៊ុនស៊ិនប៉ិចតទៅទៀត»។
ប៉ុន្តែ ៣ថ្ងៃក្រោយមក គណបក្សរាជានិយមមួយនេះ បានបដិសេធថា មិនបានទទួលជំនួយពីចិននោះឡើយ ហើយថា អ្វីដែលសម្ដេចក្រុមព្រះបានលើកឡើងនោះ សំដៅដល់ជំនួយដែលចិនបានផ្ដល់មកកម្ពុជានៅក្រោមរដ្ឋាភិបាលចម្រុះក្នុងទសវត្សរ៍១៩៩០ ដែលបក្សនេះថា សម្រាប់អភិវឌ្ឍសេដ្ឋកិច្ចសង្គម និងហេដ្ឋារចនាសម្ព័ន្ធនានា។
ទោះជាយ៉ាងណា ក្នុងកិច្ចសម្ភាសជាមួយក្រុមអ្នកសារព័ត៌មានកាលពីថ្ងៃម្សិលមិញនេះ សម្ដេចក្រុមព្រះបានទទួលស្គាល់ថា ទ្រង់ពិតជាបានស្នើសុំជំនួយពីចិន ក្នុងនាមទ្រង់ជាមេដឹកនាំគណបក្សមួយដែលទ្រង់ហៅថា ជាបក្សក្រជាងគេ។
សម្ដេចក្រុមព្រះមានបន្ទូលថា៖ «ខ្ញុំអត់មានថាម៉េចទេ ជាកាតព្វរបស់ខ្ញុំ ក្នុងឋានៈជាប្រធាននៃគណបក្សរាជានិយមហ្វ៊ុនស៊ិនប៉ិច ដែលសុំគេ ហើយគណបក្សខ្ញុំក្រជាងគេទាំងអស់។ ឥឡូវលេខ ២មែន ប៉ុន្តែអស់លោកអ្នកកាសែតជ្រាបស្រាប់ហើយ ក្រណាស់ មិនដែលចេះមានអ្វីទេ។ ទី២ ស្រេចតែចិនដែលខ្ញុំសុំនេះសុំជាឋានៈរបស់ខ្ញុំជាប្រធាននៃគណបក្សរាជានិយមហ្វ៊ុនស៊ិនប៉ិចដែលក្រជាងគេនេះ ក៏ប៉ុន្តែស្រេចតែចិន គេឲ្យ ឬមិនឲ្យ»។
បើទោះជាមេដឹកនាំបក្សហ៊្វុនស៊ិនប៉ិចបានបញ្ជាក់បែបនេះក៏ដោយ ប៉ុន្តែ អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វីអូឌីនៅថ្ងៃនេះថា ក្រសួងមហាផ្ទៃគ្មានគម្រោងស៊ើបអង្កេត ដើម្បីឈានទៅប្ដឹងរំលាយគណបក្សហ៊្វុនស៊ិនប៉ិចនោះទេ ដោយលោកថា ដោយសារតែបក្សនេះ មិនទាន់ទទួលបានជំនួយពីប្រទេសចិននៅឡើយ។ លោកបន្តថា ប្រសិនបើជំនួយផ្ដល់មកដើម្បីជួយជាតិ លោកចាត់ទុកថា ជារឿងធម្មតា។
លោកថា៖ «រហូតមកដល់ពេលនេះ ក្រសួងមហាផ្ទៃយើងមិនទាន់មានវិធានការអីស៊ើបអង្កេតនោះទេ។ អាហ្នឹង ឧទាហរណ៍ ការប្រព្រឹត្តិបទល្មើសមែន…ឥឡូវបានទទួលជំនួយហើយ ឬនៅទេ ទៅស៊ើបអង្កេតម៉េច បើមិនទាន់បានទទួលផង ទាល់តែទទួលមកហើយ ហើយទទួលមកធ្វើអ្វីខ្លះ! អាហ្នឹងបានយើងធ្វើការស៊ើបអង្កេត ហើយជំនួយនោះ យកមកដើម្បីបំផ្លាញជាតិ ឬមួយដើម្បីបម្រើជាតិ។ បើជំនួយនោះ យកមកដើម្បីបម្រើជាតិ! អាហ្នឹងជារឿងធម្មតា ប៉ុន្តែ បើយកមកបំផ្លាញជាតិ ឧទាហរណ៍យកមកដើម្បីផ្ដួលរំលំរដ្ឋាភិបាលស្របច្បាប់ ឬរដ្ឋអំណាចស្របច្បាប់ដូច កឹម សុខា ធ្លាប់ធ្វើ អាហ្នឹងបានយើងមានវិធានការ»។
នៅពេលត្រូវបានចោទសួរថា តើក្រសួងនឹងធ្វើការស៊ើបអង្កេតឬទេ បន្ទាប់ពីសម្ដេចក្រុមព្រះមានបន្ទូលថា ចិនបានជួយដល់គណបក្សហ៊្វុនស៊ិនប៉ិចយូរហើយ និងបន្តជួយជាបន្តទៀតនោះ ប៉ុន្តែ លោក ខៀវ សុភ័គ បដិសេធថា ក្រសួងនឹងមិនធ្វើការស៊ើបអង្កេតទេ ដោយសារ រឿងនោះយូរហើយ។
លោក ខៀវ សុភ័គ ប្រាប់ថា៖«អាហ្នឹងៗអាជួយរហូតហ្នឹង ជួយតាំងពីជំនាន់ណាមកយើងមិនដឹង…បានអីយើងធ្វើការស៊ើប អង្កេត អត់ទាន់ដឹង អត់មានបានមកឃើញអីបា្រកដផងហ្នឹង»។
ច្បាប់គណបក្សនយោបាយ ដែលត្រូវបានក្រុមសមាជិកសភាបក្សកាន់អំណាចអនុម័តជាបន្តបន្ទាប់នៅក្នុងឆ្នាំ២០១៧កន្លងមក បានហាមឃាត់គណបក្សនយោបាយ មិនឲ្យទទួលវិភាគទានពីបរទេស ទោះជារូបភាពណាក៏ដោយ ហើយបានបើកផ្លូវឲ្យក្រសួងមហាផ្ទៃរំលាយបក្សនយោបាយនោះចោល។
តាមរយៈវិសោធនកម្មច្បាប់គណបក្សនយោបាយនេះ គណបក្សសង្គ្រោះជាតិ ដែលទទួលបានសំឡេងគាំទ្រពីពលរដ្ឋប្រហែល ៣លាននាក់នៅក្នុងការបោះឆ្នោតជាតិកាលពីឆ្នាំ២០១៣នោះ ត្រូវបានតុលាការកំពូលសម្រេចរំលាយចោលតាមបណ្ដឹងពីក្រសួងមហាផ្ទៃកាលពីពាក់កណ្ដាលខែវិច្ឆិកាកន្លងមក។
អ្នកជំនាញច្បាប់ លោកមេធាវី សុក សំអឿន អះអាងថា ករណីច្បាប់ចែងដូចនេះ លោកថា ក្រសួងមហាផ្ទៃមានកាតព្វកិច្ចធ្វើការស៊ើបអង្កេត ដើម្បីបង្ហាញនូវតម្លាភាពនៃការអនុវត្តច្បាប់ដោយមិនរើសអើងគណបក្សនយោបាយ។
លោកថា៖ «បើធ្វើអញ្ចឹង មានន័យថា លម្អៀង ហើយច្បាប់នឹងមិនអាចអនុវត្តបានទេ ទាល់តែមានអ្នកក្លាហានប្ដឹងបានអាចអនុវត្តកើត ហើយមន្ត្រីអនុវត្តច្បាប់លែងជាមន្ត្រីអនុវត្តច្បាប់ ទៅជាមន្ត្រីចាំទទួលបណ្ដឹងវិញហើយ»។
កាលពីអំឡុងខែកញ្ញាឆ្នាំមុន គណបក្សហ៊្វុនស៊ិនប៉ិច និងគណបក្សយុវជនកម្ពុជារបស់លោក ពេជ្រ ស្រស់ បានសម្រេចដាក់ពាក្យបណ្ដឹងទៅក្រសួងមហាផ្ទៃ ដោយបានស្នើសុំឲ្យរំលាយគណបក្សសង្គ្រោះជាតិ បន្ទាប់ពីរដ្ឋាភិបាលបានចោទបក្សប្រឆាំងដ៏ធំមួយនេះថា «បានឃុបឃិតជាមួយបរទេស» ក្នុងបំណងផ្ដួលរំលំរដ្ឋាភិបាល៕